'ಐಸ್ ಮಹಲ್' ಶೂಟಿಂಗ್ ವೇಳೆ ಟ್ರಾಕ್ಟರ್ ಪಲ್ಟಿ, ಪ್ರಾಣಾಪಾಯದಿಂದ ಸಹನಟ ಪಾರು

ಹೊಸಬರ 'ಐಸ್ ಮಹಲ್' ಎನ್ನುವ ಸಿನಿಮಾದ ಚಿತ್ರೀಕರಣದ ವೇಳೆ ದುರಂತವೊಂದು ಸಂಭವಿಸಿದೆ.

'ಐಸ್ ಮಹಲ್'... ಹೊಸ ಪ್ರತಿಭೆ ಕಿಶೋರ್ ಅಭಿನಯದ ಸಿನಿಮಾ. ಈ ಚಿತ್ರದಲ್ಲಿ ನಾಯಕನಾಗಿ ಅಭಿನಯಿಸುವುದರ ಜೊತೆಗೆ ನಿರ್ದೇಶನವನ್ನೂ ಮಾಡುತ್ತಿರುವ ಕಿಶೋರ್, ಸಹೋದರ ಕೃಷ್ಣ ಟ್ರಾಕ್ಟರ್ ಓಡಿಸುವ ಸೀನ್ ನ ಶೂಟಿಂಗ್ ಮಾಡುತ್ತಿದ್ದರು. ಈ ವೇಳೆಯಲ್ಲಿ ಟ್ರಾಕ್ಟರ್ ಪಲ್ಟಿಯಾಗಿ, ಕೃಷ್ಣ ಅವರ ಕೈ ಮುರಿದಿದೆ.

ಕಡೂರಿನ ವಗರೆಹಳ್ಳಿಯ ಹೊಲವೊಂದರಲ್ಲಿ 'ಐಸ್ ಮಹಲ್' ಸಿನಿಮಾದ ಕೊನೆಯ ದಿನದ ಚಿತ್ರೀಕರಣವನ್ನ ನಡೆಸಲಾಗುತ್ತಿತ್ತು. ಈ ಸಂದರ್ಭದಲ್ಲಿ ಅವಘಡ ನಡೆದಿದ್ದು, ಸಹನಟ ಕೃಷ್ಣ ಕೂದಲೆಳೆಯ ಅಂತರದಲ್ಲಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಸದ್ಯ ವಗೆರೆಹಳ್ಳಿ ಬಳಿ ಇರುವ ಖಾಸಗಿ ಆಸ್ಪತ್ರೆಯಲ್ಲಿ ಕೃಷ್ಣ ಚಿಕಿತ್ಸೆ ಪಡೆಯುತ್ತಿದ್ದಾರೆ.