ಅಪ್ಪು ಕಟ್ಟಾ ಅಭಿಮಾನಿಗಳಿಂದ ಗುಲಾಬಿ ಹಿಡಿದು ಬರಿಗಾಲಿನಲ್ಲಿ ಪಾದಯಾತ್ರೆ: ಶಿವಣ್ಣನಿಂದ ಚಾಲನೆ

ಅಪ್ಪುಗಾಗಿ ಅಭಿಮಾನಿಗಳಿಂದ ಬರಿಗಾಲಲ್ಲಿ ಪಾದಯಾತ್ರೆ

"ಹೊರಗಡೆ ಇರುವ ಅಭಿಮಾನಿಗಳಿಗೆ ಯಾರೂ ಕಾರ್ಯಕ್ರಮ ಆಯೋಜನೆ ಮಾಡಿರಲಿಲ್ಲ. ಅದಕ್ಕೆ ಅಭಿಮಾನಿಗಳಿಗೆ ಮುಕ್ತ ಆಹ್ವಾನ ಕೊಟ್ಟಿದ್ದೀವಿ. ಜಿಲ್ಲೆಗಳಿಂದ ಎಷ್ಟು ಅಭಿಮಾನಿಗಳು ಬರಲು ಸಾಧ್ಯವೋ ಅಷ್ಟು ಮಂದಿ ಬನ್ನಿ ಅಂತ ಹೇಳಿದ್ದೇವೆ. ಎಷ್ಟೇ ಅಭಿಮಾನಿಗಳು ಬಂದರೂ ಅವರು ಉಳಿದುಕೊಳ್ಳಲು ಶನಿವಾರ ರಾತ್ರಿ 3 ಛತ್ರಗಳನ್ನು ಬುಕ್ ಮಾಡಿದ್ದೇವೆ. ಉಳಿದುಕೊಳ್ಳಲು ವ್ಯವಸ್ಥೆ. ಕಾಫಿ, ತಿಂಡಿ ವ್ಯವಸ್ಥೆ ಎಲ್ಲವನ್ನೂ ಮಾಡಿದ್ದೇವೆ." ಎನ್ನುತ್ತಾರೆ ಪ್ರಿನ್ಸ್ ಮನು.

ಪಾದಯಾತ್ರೆಗೆ ಶಿವಣ್ಣ-ರಾಘಣ್ಣ ಚಾಲನೆ

"ಶಿವಣ್ಣ ವೇದ ಶೂಟಿಂಗ್‌ನಲ್ಲಿ ಇದ್ದಾರೆ. ಬರ್ತೀನಿ ಅಂತ ಹೇಳಿದ್ದಾರೆ. ರಾಘಣ್ಣ ಬರುತ್ತೇನೆ ಅಂತ ಹೇಳಿದ್ದಾರೆ. ಯುವ ರಾಜ್‌ಕುಮಾರ್, ಧೀರೇನ್ ರಾಮ್‌ ಕುಮಾರ್ ಬರುತ್ತಾರೆ. ಲಕ್ಷ್ಮಿ ಅಮ್ಮವರು ಬರುತ್ತಾರೆ. ಎಲ್ಲರಿಗೂ ಆಹ್ವಾನ ಕೊಟ್ಟದ್ದೇವೆ. ಇವರೆಲ್ಲರೂ ಬಂದು ಪುಷ್ಪ ನಮನ ಸಲ್ಲಿಸಿ ಹೊರಡುತ್ತಾರೆ. ಆಮೇಲೆ ನಾವು ಹೌಸಿಂಗ್ ಬೋರ್ಡ್‌ನಿಂದ ಬರಿಗಾಲಲ್ಲಿ ಚಪ್ಪಲಿ ಬಿಟ್ಟು ಪುಣ್ಯಭೂಮಿಗೆ ಒಂದು ಗುಲಾಬಿ ಹೂವು ಹಿಡಿದು ಪುಷ್ಪ ನಮನ ಸಲ್ಲಿಸಲಿದ್ದೇವೆ." ಅಂತ ಪ್ರಿನ್ಸ್ ಮನು ಫಿಲ್ಮಿ ಬೀಟ್‌ಗೆ ಮಾಹಿತಿ ನೀಡಿದ್ದಾರೆ.

5 ಸಾವಿರಕ್ಕೂ ಅಧಿಕ ಮಂದಿ ಸೇರುವ ಸಾಧ್ಯತೆ

"5 ಸಾವಿರ ಜನರ ಎಕ್ಸ್‌ಪೆಕ್ಟೇಷನ್ ಇದೆ. ರಾಜ್ಯದ ವಿವಿಧ ಜಿಲ್ಲೆಯಿಂದ ಈಗಾಲೇ ಸಾಕಷ್ಟು ಮಂದಿ ಹೊರಡಲು ಸಿದ್ಧತೆ ಮಾಡಿಕೊಂಡಿದ್ದಾರೆ. ಯಾರ ಬಳಿನೂ ಒಂದೇ ಒಂದು ರೂಪಾಯಿ ಧನ ಸಹಾಯ ಕೇಳಿಲ್ಲ. ನಾವೇ ಅಭಿಮಾನಿಗಳು ಹಣ ಹೊಂದಿಸಿಕೊಂಡು ಈ ಕಾರ್ಯಕ್ರಮ ಮಾಡಿದ್ದೇವೆ. ಯಾವ ಕಾರ್ಪೊರೇಟರ್, ಶಾಸಕರು, ಯಾರ ಮನೆಯಿಂದಲೂ ಕೇಳಿಲ್ಲ. ಗೋಪಾಲಯ್ಯ ಅವರಿಂದ ಒಂದು ಛತ್ರವನ್ನು ಬಿಡಿಸಿಕೊಂಡಿದ್ದೇವೆ ಅಷ್ಟೇ." ಪ್ರಿನ್ಸ್ ಮನು ತಿಳಿಸಿದ್ದಾರೆ.

ಅಪ್ಪು ಅಭಿಮಾನಿಗಳಿಂದ ನೇತ್ರದಾನ

"ಭಾನುವಾರ ಪಾದಯಾತ್ರೆ ಬರಲಿರುವ ಎಲ್ಲಾ ಅಭಿಮಾನಿಗಳೂ ನೇತ್ರದಾನಕ್ಕೆ ಸಹಿ ಮಾಡಲಿದ್ದಾರೆ. ಬಳಿಕ ಶಿವಣ್ಣ ಅವರ ಮೂಲಕ ಇದನ್ನು ಪುಣ್ಯಕ್ಷೇತ್ರ ಅಂತ ಘೋಷಣೆ ಮಾಡಬೇಕು ಅಂತ ಕೇಳಿಕೊಂಡಿದ್ದೇವೆ. ಅಧಿಕೃತವಾಗಿ ಪುನೀತ್ ರಾಜ್‌ಕುಮಾರ್ ಅವರ ಧ್ವಜ ಬಿಡುಗಡೆ ಮಾಡುತ್ತಿದ್ದೇವೆ. ಮುಂದಿನ ಎಲ್ಲಾ ಕಾರ್ಯಕ್ರಮಗಳಿಗೂ ಆ ಧ್ವಜವನ್ನು ನೋಡಬಹುದು." ಎನ್ನುತ್ತಾರೆ ಪ್ರಿನ್ಸ್ ಮನು.