ಪ್ರಭಾಸ್ ಅಭಿನಯದ 'ರಾಧೆ ಶ್ಯಾಮ್'ದಲ್ಲಿ ಶಿವಣ್ಣ: ರಾಜಮೌಳಿ, ಪೃಥ್ವಿರಾಜ್‌ಗೂ ಧನ್ಯವಾದ ಎಂದಿದ್ದೇಕೆ?

ರಾಧೆ ಶ್ಯಾಮ್ ಚಿತ್ರಕ್ಕೆ ಶಿವಣ್ಣ ಧ್ವನಿ

ರಾಧೆ ಶ್ಯಾಮ್ ರಿಲೀಸ್‌ ಸಮೀಪಿಸುತ್ತಿದ್ದಂತೆ ಚಿತ್ರತಂಡ ಮತ್ತಷ್ಟು ಆಕ್ಟೀವ್ ಆಗಿದೆ. ದಕ್ಷಿಣ ಭಾರತದಲ್ಲಿ ಆಯಾ ಭಾಷೆಯಲ್ಲಿಯೇ ಪ್ರೇಕ್ಷಕರನ್ನು ಸೆಳೆಯಲು ಪ್ರಭಾಸ್ ಮತ್ತು ಅವರ ತಂಡ ಹರಸಾಹಸ ಪಡುತ್ತಿದೆ. ಇದರ ಮೊದಲ ಹೆಜ್ಜೆಯಾಗಿ, 'ರಾಧೆ ಶ್ಯಾಮ್' ಕನ್ನಡ ಅವತರಣಿಕೆಗೆ ಶಿವರಾಜ್‌ಕುಮಾರ್ ಬಳಿ ಧ್ವನಿ ಪಡೆದುಕೊಳ್ಳಲಾಗಿದೆ. ಈ ವಿಷಯವನ್ನು ರಾಧೆ ಶ್ಯಾಮ್ ಚಿತ್ರದ ನಿರ್ಮಾಣ ಸಂಸ್ಥೆ ಯುವಿ ಕ್ರಿಯೇಷನ್ಸ್ ಅಧಿಕೃತವಾಗಿ ತನ್ನ ಟ್ವೀಟ್ ಖಾತೆಯಲ್ಲಿ ಹೇಳಿಕೊಂಡಿದೆ.

ರಾಧೆ ಶ್ಯಾಮ್'ಗೆ ಶಿವಣ್ಣ ನಿರೂಪಣೆ

ಪ್ಯಾನ್ ಇಂಡಿಯಾ ಸಿನಿಮಾಗಳು ಕನ್ನಡ ಭಾಷೆಯನ್ನು ಗಂಭೀರವಾಗಿ ಪರಿಗಣಿಸಿದೆ. ಕರ್ನಾಟಕದಲ್ಲಿ ಕನ್ನಡ ಭಾಷೆಯಲ್ಲಿ ಡಬ್ ಆದ ಸಿನಿಮಾವನ್ನು ಬಿಡುಗಡೆ ಮಾಡುತ್ತಿವೆ. ಅದರಂತೆ ರಾಧೆ ಶ್ಯಾಮ್ ತಂಡ ಕೂಡ ಕನ್ನಡದಲ್ಲಿ ಸಿನಿಮಾ ರಿಲೀಸ್ ಮಾಡುತ್ತಿದ್ದಾರೆ. ಹೀಗಾಗಿ ಕನ್ನಡ ಚಿತ್ರರಂಗದ ಸೂಪರ್‌ಸ್ಟಾರ್ ಶಿವರಾಜ್‌ಕುಮಾರ್‌ಗೆ ನಿರೂಪಣೆ ಮಾಡುವಂತೆ ಕೇಳಿಕೊಂಡಿದ್ದರು. ಅದರಂತೆ ಶಿವಣ್ಣ ಕೂಡ ಚಿತ್ರಕ್ಕೆ ಧ್ವನಿ ನೀಡಿದ್ದು, ಚಿತ್ರತಂಡ ಧನ್ಯವಾದ ಹೇಳಿದೆ.

ರಾಜಮೌಳಿ, ಪ್ರಥ್ವಿರಾಜ್ ನಿರೂಪಣೆ

ಕನ್ನಡ, ತಮಿಳು, ಮಲಯಾಳಂ, ಹಿಂದಿ ಈ ನಾಲ್ಕು ಭಾಷೆಗಳಿಗೂ 'ರಾಧೆ ಶ್ಯಾಮ್' ಸಿನಿಮಾ ಡಬ್​ ಆಗಿ ರಿಲೀಸ್​ ಆಗುತ್ತಿದೆ. ಒಂದೊಂದು ಭಾಷೆಯಲ್ಲೂ ಒಬ್ಬೊಬ್ಬ ದಿಗ್ಗಜರೊಂದಿಗೆ ಸಿನಿಮಾ ನಿರೂಪಣೆ ಮಾಡಿಸಲಾಗಿದೆ. ಇತ್ತೀಚೆಗೆ ಹಿಂದಿ ವರ್ಷನ್‌ಗೆ ಅಮಿತಾಬ್ ಬಚ್ಚನ್ ನಿರೂಪಣೆ ಮಾಡಿದ್ದರು. 'ರಾಧೆ ಶ್ಯಾಮ್​' ಚಿತ್ರದ ಕನ್ನಡ ಅವತರಣಿಕೆಗೆ​ ಶಿವಣ್ಣ ನಿರೂಪಣೆ ಮಾಡಿದ್ದರೆ, ತೆಲುಗಿಗೆ ರಾಜಮೌಳಿ ಹಾಗೂ ಮಲಯಾಳಂ ವರ್ಷನ್‌ಗೆ ಪೃಥ್ವಿರಾಜ್​ ಸುಕುಮಾರನ್​ ನಿರೂಪಣೆ ಮಾಡಿದ್ದಾರೆ. ಹೀಗಾಗಿ ನಿರ್ಮಾಣ ಸಂಸ್ಥೆ 'ನಿಮ್ಮ ಧ್ವನಿಯಿಂದ ಈ ರೊಮ್ಯಾಂಟಿಕ್​ ಸ್ಟೋರಿಯನ್ನು ಮತ್ತಷ್ಟು ಮಧುರವಾಗಿಸಿದ್ದಕ್ಕೆ ಧನ್ಯವಾದಗಳು' ಎಂದು ಶಿವಣ್ಣ​, ರಾಜಮೌಳಿ ಹಾಗೂ ಪೃಥ್ವಿರಾಜ್​ ಸುಕುಮಾರನ್‌ಗೆ 'ರಾಧೆ ಶ್ಯಾಮ್​' ತಂಡ ಟ್ವೀಟ್​ ಮೂಲಕ ತಿಳಿಸಿದೆ.

ಮಾರ್ಚ್ 11ಕ್ಕೆ 'ರಾಧೆ ಶ್ಯಾಮ್'

ಬಾಹುಬಲಿ, ಸಾಹೋ ಅಂತ ಪವರ್‌ಫುಲ್ ಸಿನಿಮಾಗಳಲ್ಲಿ ನಟಿಸಿದ್ದ ಪ್ರಭಾಸ್, ರೊಮ್ಯಾಂಟಿಕ್ ಮೂಡ್‌ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈಗಾಗಲೇ ಹಿಂದಿ ಭಾಷೆಗೆ ಬೇರೆ ಹಾಡುಗಳು ಹಾಗೂ ದಕ್ಷಿಣ ಭಾರತದ ಭಾಷೆಗಳಿಗೆ ಬೇರೆ ಹಾಡುಗಳನ್ನು ರಿಲೀಸ್ ಮಾಡಲಾಗಿದೆ. ಚಿತ್ರದ ಟೀಸರ್, ಟ್ರೈಲರ್‌ ನಿರೀಕ್ಷೆಯನ್ನು ದುಪ್ಪಟ್ಟು ಮಾಡಿದೆ. ಮಾರ್ಚ್ 11ರಂದು ವಿಶ್ವದಾದ್ಯಂತ 'ರಾಧೆ ಶ್ಯಾಮ್' ರಿಲೀಸ್ ಆಗುತ್ತಿದ್ದು, 'ಬಾಹುಬಲಿ', 'ಸಾಹೋ' ಚಿತ್ರದಂತೆಯೇ ಒಪನಿಂಗ್ ಪಡೆದುಕೊಂಡರೆ, ರೊಮ್ಯಾಂಟಿಕ್ ಸಿನಿಮಾಗಳೂ ಪ್ಯಾನ್ ಇಂಡಿಯಾ ಲೆವೆಲ್‌ನಲ್ಲಿ ಬಿಡುಗಡೆಯಾಗಲು ದಾರಿ ಮಾಡಿ ಕೊಡುತ್ತದೆ.