Prakash Raj: 'ದಿ ಕಾಶ್ಮೀರ್ ಫೈಲ್ಸ್' ಬಳಿಕ ಈ ಸಿನಿಮಾಗಳು ಯಾವಾಗ ಎಂದ ಪ್ರಕಾಶ್ ರಾಜ್?

ಪ್ರಕಾಶ್ ರಾಜ್ ಹೇಳಿದ 6 ಸಿನಿಮಾ ಯಾವುದು?

ಬಹುಭಾಷಾ ನಟ ಪ್ರಕಾಶ್ ರಾಜ್ 'ದಿ ಕಾಶ್ಮೀರ್ ಫೈಲ್ಸ್' ಬಿಡುಗಡೆಗೊಂಡ ಬಿಳಿಕ ಸರಣಿ ಟ್ವೀಟ್‌ಗಳನ್ನು ಮಾಡುತ್ತಿದ್ದಾರೆ. ಕಾಶ್ಮೀರ್ ಫೈಲ್ಸ್ ಅಂತೆಯೇ ಇನ್ನೂ ಆರು ಸಿನಿಮಾಗಳು ಯಾವಾಗ ಬರುತ್ತೆ ಎಂದು ಪ್ರಶ್ನೆ ಮಾಡಿದ್ದಾರೆ. ಪ್ರಕಾಶ್ ರಾಜ್ ಪ್ರಕಾರ, 'ಗೋದ್ರಾ ಫೈಲ್ಸ್', 'ದೆಹಲಿ ಫೈಲ್ಸ್', 'ಜಿಎಸ್‌ಟಿ ಫೈಲ್ಸ್', ' ಡಿಮಾನಿಟೈಜೇಷನ್ ಫೈಲ್ಸ್', ಕೋವಿಡ್ ಫೈಲ್ಸ್ ಹಾಗೂ 'ಗಂಗಾ ಫೈಲ್ಸ್' ಈ ಆರೂ ಸಿನಿಮಾಗಳು ಯಾವಾಗ ಬರುತ್ತೆ ಎನ್ನುವ ಅರ್ಥದಲ್ಲಿ ಕೇಳಿದ್ದಾರೆ. " ನಿರ್ಮಾಪಕರಾಗಿ ಬದಲಾದ ಪ್ರೀತಿಯ ಸುಪ್ರೀಂ ನಟರೇ, ನೀವು ಈ ಸಿನಿಮಾಗಳನ್ನು ಯಾವಾಗ ಮಾಡುತ್ತೀರಾ?" ಎಂದು ಹೇಳಿದ್ದಾರೆ.

ಕಾಶ್ಮೀರ್ ಫೈಲ್ಸ್ ಬಗ್ಗೆ ಟ್ವೀಟ್

ಈ ಟ್ವೀಟ್‌ಗೂ ಮುನ್ನ ಪ್ರಕಾಶ್ ರಾಜ್ ಹಲವು ಟ್ವೀಟ್‌ಗಳನ್ನು ಮಾಡಿದ್ದರು. "ದಿ ಕಾಶ್ಮೀರ್ ಫೈಲ್ಸ್ ಸಿನಿಮಾ ಮಾಡಿದ್ದು ಏನಕ್ಕೆ? ಇದು ಗಾಯವನ್ನು ದೊಡ್ಡದು ಮಾಡುವುದಕ್ಕೋ? ಇಲ್ಲಾ ದ್ವೇಷ ಹರಡುತ್ತಿದೆಯೋ?" ಎಂದು ಪ್ರಶ್ನೆ ಮಾಡಿದ್ದರು. ಈಗ ಮತ್ತೆ ' ದಿ ಕಾಶ್ಮೀರ್ ಫೈಲ್ಸ್' ಬಗ್ಗೆ ಕಿಡಿಕಾರಿ ಟ್ವೀಟ್ ಮಾಡಿದ್ದಾರೆ. ಕಾಶ್ಮೀರ್ ಫೈಲ್ಸ್ ಅಂತೆಯೇ ಯಾವ್ಯಾವ ಸಿನಿಮಾ ಬರೆಬೇಕೆಂದು ಟ್ವೀಟ್ ಮಾಡಿದ್ದಾರೆ. ಇತ್ತ ಪ್ರಕಾಶ್ ರಾಜ್ ಟ್ವೀಟ್ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಪ್ರಕಾಶ್‌ ರಾಜ್‌ಗೆ ಟಾಂಗ್ ಕೊಟ್ಟಿದ್ದಾರೆ.

ಪ್ರಕಾಶ್‌ ರಾಜ್‌ಗೆ ನೆಟ್ಟಿಗರು ಪ್ರಶ್ನೆ

ಪ್ರಕಾಶ್ ರಾಜ್ ಸರಣಿ ಟ್ವೀಟ್‌ನಲ್ಲಿ ದಿ ಕಾಶ್ಮೀರ್ ಫೈಲ್ಸ್' ಬಗ್ಗೆ ಅನುಮಾನ ವ್ಯಕ್ತಪಡಿಸಿದ್ದರು. ಇದು ಬಿಜೆಪಿ ಪಕ್ಷಕ್ಕೆ ಮಾಡಿದ ಸಿನಿಮಾನಾ ಅಂತ ಪ್ರಶ್ನೆ ಮಾಡಿದ್ದರು. ಇಂದು (ಮಾರ್ಚ್ 19) ಮಾಡಿದ ಟ್ವೀಟ್‌ನಲ್ಲಿ ಸುಪ್ರೀಂ ಎನ್ನುವ ಪದವನ್ನು ಬಳಿಸಿದ್ದರು. ಇದು ಮೋದಿಗೆ ಟಾಂಗ್ ಕೊಟ್ಟಿದ್ದಾರೆ ಎನ್ನುವ ಮಾತು ಕೇಳಿ ಬಂದಿತ್ತು. ಇತ್ತ ನೆಟ್ಟಿಗರು ಪ್ರಕಾಶ್‌ ರಾಜ್‌ಗೆ ಟಾಂಗ್ ಕೊಟ್ಟಿದ್ದಾರೆ. " ನೀವೂ ಸಿನಿಮಾ ಮಾಡಿ. ನೀವೂ ಕೂಡ ನಿರ್ಮಾಪಕರಾಗಿ ಬದಲಾದ ಸುಪ್ರೀಂ ಹೀರೊ ತಾನೇ." ಎಂದಿದ್ದಾರೆ. " ಇನ್ನೊಬ್ಬರು ನೀವೇ ಸಿನಿಮಾ ಮಾಡಿ" ಎಂದಿದ್ದಾರೆ.

'ದಿ ಕಾಶ್ಮೀರ್ ಫೈಲ್ಸ್' 100 ಕೋಟಿ ಗಳಿಕೆ

'ದಿ ಕಾಶ್ಮೀರ್ ಫೈಲ್ಸ್' ಸಿನಿಮಾ ದೇಶಾದ್ಯಂತ ಬಿಡುಗಡೆಯಾಗಿದೆ. ಈ ಸಿನಿಮಾ ಬಗ್ಗೆ ಆರೋಪ ಹಾಗೂ ಪ್ರತ್ಯಾರೋಪ ಕೇಳಿ ಬರುತ್ತಿದ್ದರೂ, 'ದಿ ಕಾಶ್ಮೀರ್ ಫೈಲ್ಸ್' ಸಿನಿಮಾಗೆ ಪ್ರತಿಕ್ರಿಯೆ ಸಿಕ್ಕಿದೆ. ಬಾಕ್ಸಾಫೀಸ್‌ನಲ್ಲಿ ಭರ್ಜರಿ ದಾಖಲೆ ಮಾಡಿದೆ. ಸುಮಾರು 100 ಕೋಟಿ ಈಗಾಗಲೇ ಗಳಿಕೆ ಮಾಡಿದೆ.