ದೇವರಾಜ್‌ ಜೊತೆ ಮೊದಲ ಸಿನಿಮಾ.. ಮಗ ಪ್ರಜ್ವಲ್‌ಗೆ ಕೊನೆ ಸಿನಿಮಾ: ಇದು ಕೋಟಿ ರಾಮು ಸಿನಿಮಾ ಜರ್ನಿ

ದೇವರಾಜ್‌ ನಟನೆಯ 'ಗೋಲಿಬಾರ್' ರಾಮು ನಿರ್ಮಿಸಿದ ಮೊದಲ ಸಿನಿಮಾ

ರಾಮು ಕನ್ನಡ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟಾಗ ಅವರಿಗೆ ವಯಸ್ಸು ಕೇವಲ 21 ವರ್ಷ. ಮೊದಲ ಸಿನಿಮಾವೇ ಮಾಸ್ ಸಿನಿಮಾ. ಆಕ್ಷನ್ ಹೀರೋ ದೇವರಾಜ್ ನಟಿಸಿದ 'ಗೋಲಿಬಾರ್' ಕನ್ನಡ ಚಿತ್ರರಂಗದಲ್ಲಿ ಹೊಸ ಇತಿಹಾಸವನ್ನೇ ಸೃಷ್ಟಿಸಿತ್ತು. ಅದ್ಧೂರಿ ಆಕ್ಷನ್ ಸಿನಿಮಾಗಳಿಗೆ ಪರೋಕ್ಷವಾಗಿ ಮುನ್ನುಡಿ ಬರೆದ ಸಿನಿಮಾ ಆಗಿತ್ತು. ಇಲ್ಲಿಂದ ಕೋಟಿ ರಾಮು ಅಸಲಿ ಸಿನಿಮಾ ಪಯಣ ಆರಂಭ. ಪೊಲೀಸ್ ಪಾತ್ರಗಳಲ್ಲಿ ಹೆಚ್ಚಾಗಿ ನಟಿಸುತ್ತಿದ್ದ ದೇವರಾಜ್‌ 93ರಲ್ಲಿ ರಾಮು ನಿರ್ಮಿಸಿದ್ದ ಸಿನಿಮಾದಲ್ಲಿ ಖಡಕ್ ಪೊಲೀಸ್ ಆಫೀಸರ್ ಆಗಿ ಕಾಣಿಸಿಕೊಂಡಿದ್ದರು. ಅಂದಿನಿಂದ ಡೈನಾಮಿಕ್ ಕುಟುಂಬದೊಂದಿಗೆ ನಿರ್ಮಾಪಕ ರಾಮು ಸಂಬಂಧ ಹಾಗೇ ಮುಂದುವರೆದಿತ್ತು.

ಪ್ರಜ್ವಲ್ ದೇವರಾಜ್‌ಗೆ ರಾಮು ಕೊನೆಯ ಸಿನಿಮಾ

ದೇವರಾಜ್‌ಗೆ ಮೊದಲ ಸಿನಿಮಾ ನಿರ್ಮಾಣ ಮಾಡಿದ್ದರೆ, ಅವರ ಪುತ್ರ ಪ್ರಜ್ವಲ್ ದೇವರಾಜ್‌ಗೆ ಕೊನೆಯ ಸಿನಿಮಾ ನಿರ್ಮಿಸಿರುವುದು ಕಾಕತಾಳೀಯ. 'ಅರ್ಜುನ್ ಗೌಡ' ಸಿನಿಮಾ ರಾಮು ನಿರ್ಮಾಣದ ಕೊನೆಯ ಸಿನಿಮಾ. ಇದು ಕೂಡ ಮಾಸ್ ಸಿನಿಮಾ ಅನ್ನುವುದು ವಿಶೇಷ. ಕೊರೊನಾ ಹಾವಳಿ ಇರದೇ ಹೋಗಿದ್ದರೆ, ನಿರ್ಮಾಪಕ ರಾಮು 'ಅರ್ಜುನ್ ಗೌಡ' ಸಿನಿಮಾವನ್ನು ಈ ವರ್ಷದ ಆರಂಭದಲ್ಲಿಯೇ ಬಿಡುಗಡೆ ಮಾಡಿ ಬಿಡುತ್ತಿದ್ದರು. ಆದರೆ, ವಿಧಿ ಅವರಿಗೆ ಈ ಸಿನಿಮಾ ರಿಲೀಸ್ ಮಾಡುವುದಕ್ಕೆ ಅವಕಾಶವೇ ನೀಡಿರಲಿಲ್ಲ.

ಅಪ್ಪು ಮತ್ತು ಮಗನಿಗೆ ತಲಾ ಮೂರು ಸಿನಿಮಾ ನಿರ್ಮಾಣ

ತಂದೆ ದೇವರಾಜ್‌ ಹಾಗೂ ಪುತ್ರ ಪ್ರಜ್ವಲ್ ದೇವರಾಜ್‌ಗೆ ನಿರ್ಮಾಪಕ ರಾಮು ತಲಾ ಮೂರು ಸಿನಿಮಾ ನಿರ್ಮಾಣ ಮಾಡಿರುವುದು ವಿಶೇಷ. ದೇವರಾಜ್‌ಗೆ ರಾಮು ತನ್ನ ಮೊದಲ ಸಿನಿಮಾ ಗೋಲಿಬಾರ್ ನಿರ್ಮಿಸಿದ್ದರೆ, ಎರಡನೇ ಸಿನಿಮಾ ಲಾಕಪ್‌ಡೆತ್‌ನಲ್ಲೂ ದೇವರಾಜ್‌ ನಟಿಸಿದ್ದರು. ಹಾಗೇ ಮಾಲಾಶ್ರೀ ಹಾಗೂ ದೇವರಾಜ್ ನಟಿಸಿದ ಸರ್ಕಲ್ ಇನ್ಸ್‌ಪೆಕ್ಟರ್ ರಾಮು ಹಾಗೂ ದೇವರಾಜ್ ಕಾಂಬಿನೇಷನ್‌ನಲ್ಲಿ ಬಂದ ಮೂರನೇ ಸಿನಿಮಾ. ಹಾಗೆನೇ ಪುತ್ರ ಪ್ರಜ್ವಲ್‌ಗೂ ಮೂರು ಸಿನಿಮಾ ನಿರ್ಮಾಣ ಮಾಡಿದ್ದಾರೆ. ಗುಲಾಮ, ಸಾಗರ್ ಹಾಗೂ ಬಿಡುಗಡೆಗೆ ಸಜ್ಜಾಗಿರುವ ಅರ್ಜುನ್ ಗೌಡ ಮೂರನೇ ಸಿನಿಮಾ.

'ಅರ್ಜುನ್ ಗೌಡ' ಡಿಸೆಂಬರ್ ರಿಲೀಸ್

ಪತಿ ರಾಮು ನಿರ್ಮಿಸಿದ ಕೊನೆಯ ಸಿನಿಮಾ 'ಅರ್ಜುನ್ ಗೌಡ' ಸಿನಿಮಾವನ್ನು ಪತ್ನಿ ಮಾಲಾಶ್ರೀ ಬಿಡುಗಡೆ ಮಾಡುತ್ತಿದ್ದಾರೆ. ಡಿಸೆಂಬರ್ 31ರಂದು ಈ ಸಿನಿಮಾ ಬಿಡುಗಡೆಯಾಗಿದ್ದು, ಸ್ವತಃ" ಮಾಲಾಶ್ರೀ ಅವರೇ ಮುಂದೆ ನಿಂತ ಪತಿಯ ಕನಸನ್ನು ನನಸು ಮಾಡಲು ಮುಂದಾಗಿದ್ದಾರೆ. ಬಿಡುಗಡೆಗೂ ಮುನ್ನ ಸ್ಯಾಂಡಲ್‌ವುಡ್‌ನಲ್ಲಿ ಅದ್ಧೂರಿ ಕಾರ್ಯಕ್ರಮ ಮಾಡಲು ಪ್ಲ್ಯಾನ್ ಕೂಡ ನಡೆಯುತ್ತಿದೆ.