Exclusive: ಉಮಾಪತಿ ಕೈಯಲ್ಲಿ ಶಿವಣ್ಣನ ಟೈಟಲ್: 'ದೊರೆ' ಆಗಬೇಕಿತ್ತು ಪುನೀತ್!

ಚಿಕ್ಕಂದಿನಿಂದಲೂ 'ದೊರೆ' ಟೈಟಲ್ ಇಷ್ಟ

ಚಿಕ್ಕಣ್ಣ ಹೀರೊ ಆಗಿ ನಟಿಸುತ್ತಿರುವ 'ಉಪಾಧ್ಯಕ್ಷ' ಸಿನಿಮಾ ಇಂದು ( ಜೂನ್ 16) ಸೆಟ್ಟೇರಿದೆ. ನಿರ್ಮಾಪಕ ಉಮಾಪತಿ ಈ ಸಿನಿಮಾವನ್ನು ನಿರ್ಮಿಸುತ್ತಿದ್ದಾರೆ ಈ ವೇಳೆ 'ದೊರೆ' ಟೈಟಲ್ ತಮ್ಮ ಬಳಿ ಇದೆ ಎಂದು ಹೇಳಿದ್ದಾರೆ. ಅಷ್ಟಕ್ಕೂ ಶಿವಣ್ಣ ಅಭಿನಯದ 'ದೊರೆ' ಟೈಟಲ್ ಅನ್ನು ರಿಜಿಸ್ಟರ್ ಮಾಡಿಸಿದ್ದು ಯಾಕೆ? ಅನ್ನು ಸೀಕ್ರೆಟ್ ಅನ್ನು ಫಿಲ್ಮಿಬೀಟ್‌ಗೆ ತಿಳಿಸಿದ್ದಾರೆ. "ನನಗೆ ಚಿಕ್ಕಂದಿನಿಂದಲೂ 'ದೊರೆ' ಅನ್ನುವ ಟೈಟಲ್ ತುಂಬಾನೇ ಇಷ್ಟ. 'ದೊರೆ' ಸಿನಿಮಾನೂ ಇಷ್ಟಪಟ್ಟಿದ್ದೇನೆ. ಅದಕ್ಕೆ ಈ ಟೈಟಲ್‌ ಅನ್ನು ನನ್ನ ಬ್ಯಾನರ್‌ನಲ್ಲಿ ರಿಜಿಸ್ಟರ್ ಮಾಡಿಸಿಟ್ಟುಕೊಂಡಿದ್ದೇನೆ." ಎನ್ನುತ್ತಾರೆ ನಿರ್ಮಾಪಕ ಉಮಾಪತಿ.

ಶಿವಣ್ಣನೇ ಈ ಸಿನಿಮಾಗೆ ಮೊದಲ ಆಯ್ಕೆ

ನಿರ್ಮಾಪಕ ಉಮಾಪತಿ ಬಳಿ 'ದೊರೆ' ಟೈಟಲ್ ಇದೆ. ಆದರೆ, ಈ ಟೈಟಲ್ ಇಟ್ಟುಕೊಂಡು ಯಾರಿಗೆ ಸಿನಿಮಾ ಮಾಡುತ್ತಾರೆ ಅನ್ನುವುದೇ ಪ್ರಶ್ನೆ. "ದೊರೆ ಟೈಟಲ್‌ ಅನ್ನು ನಾಲ್ಕು ವರ್ಷದ ಹಿಂದೆನೇ ರಿಜಿಸ್ಟರ್ ಮಾಡಿದ್ದೇನೆ. ಅಲ್ಲಿಂದಲೂ ಸಿನಿಮಾ ಮಾಡಬೇಕು ಅಂತಲೇ ಇದ್ದೇನೆ. ಅದ್ಯಾವಾಗ ಕೈಗೂಡುತ್ತೋ ಗೊತ್ತಿಲ್ಲ. 'ದೊರೆ' ಟೈಟಲ್ ಇಟ್ಟು ಸಿನಿಮಾ ಮಾಡುವುದಾದರೆ ಮೊದಲ ಆಯ್ಕೆ ಶಿವಣ್ಣನೇ ಆಗಿರುತ್ತಾರೆ. ಒಂದ್ವೇಳೆ ಅವರು ಒಪ್ಪದೆ ಇದ್ದರೆ ಮುಂದೆ ಬೇರೆ ಆಲೋಚನೆ ಮಾಡುತ್ತೇವೆ." ಎನ್ನುತ್ತಾರೆ ಉಮಾಪತಿ.

ಅಪ್ಪು ಸಿನಿಮಾಗೆ 'ದೊರೆ' ಟೈಟಲ್

ಪುನೀತ್ ರಾಜ್‌ಕುಮಾರ್‌ಗೆ ಉಮಾಪತಿ ಒಂದು ಸಿನಿಮಾ ನಿರ್ಮಾಣ ಮಾಡಬೇಕಿತ್ತು. ಅಪ್ಪು ಸಿನಿಮಾಗೆ 'ದೊರೆ' ಅಂತ ಟೈಟಲ್ ಇಡುವುದಕ್ಕೆ ಮುಂದಾಗಿದ್ದರು. ಆದರೆ, ಅಷ್ಟರಲ್ಲೇ ಪುನೀತ್ ರಾಜ್‌ಕುಮಾರ್ ಅವರನ್ನು ಕಳೆದುಕೊಂಡಿದ್ದರಿಂದ ಸಿನಿಮಾ ಅಲ್ಲಿಗೆ ನಿಂತಿದೆ ಎನ್ನುತ್ತಾರೆ ಉಮಾಪತಿ. "ಪವರ್‌ಸ್ಟಾರ್ ಪುನೀತ್ ರಾಜ್‌ಕುಮಾರ್ ಅವರಿಗಾಗಿ ಮಾಡಬೇಕಿದ್ದ ಸಿನಿಮಾಗೆ 'ದೊರೆ' ಟೈಟಲ್ ಇಡಬೇಕು ಅಂದುಕೊಂಡಿದ್ದೆವು. ಆದರೆ, ನಾವು ಪುನೀತ್ ರಾಜ್‌ಕುಮಾರ್ ಅವರನ್ನು ಕಳೆದುಕೊಂಡೆವು. ಈಗ 'ದೊರೆ' ಟೈಟಲ್ ಹಾಗೇ ಉಳಿದಿದೆ. ಮುಂದೆ ನೋಡುತ್ತೇವೆ."

'ಸಿಂಧೂರ ಲಕ್ಷ್ಮಣ' ಯಾವಾಗ?

"ಸದ್ಯ 'ಉಪಾಧ್ಯಕ್ಷ' ಸಿನಿಮಾ ಸೆಟ್ಟೇರಿದೆ. ಮನೋರಂಜನೆ ನೀಡುವ ಸಿನಿಮಾವನ್ನು ಮಾಡುತ್ತಿದ್ದೇವೆ. ಈ ಸಿನಿಮಾದ ಬಳಿಕ 'ಸಿಂಧೂರ ಲಕ್ಷಣ' ಸಿನಿಮಾ ಸೆಟ್ಟೇರಲಿದೆ. ಮುಂದೆ ಒಂದೊಂದೇ ಸಿನಿಮಾಗಳು ಸೆಟ್ಟೇರಲಿವೆ." ಎನ್ನುತ್ತಾರೆ ನಿರ್ಮಾಪಕ ಉಮಾಪತಿ.