ಒಂದು ಕಾಲದಲ್ಲಿ ಪೈಪೋಟಿಗೆ ಬಿದ್ದಿದ್ದ ರಮ್ಯಾ ಮತ್ತು ರಕ್ಷಿತಾ ಈಗ ಫ್ರೆಂಡ್ಸ್!

ನಂಬರ್ ಒನ್ ಸ್ಥಾನಕ್ಕೆ ಪೈಪೋಟಿ

ರಮ್ಯಾ ಅಥವಾ ರಕ್ಷಿತಾ ಇಬ್ಬರ ನಡುವೆ ನಂಬರ್ ಒನ್ ಯಾರು ಎಂಬ ಪೈಪೋಟಿಯ ಚರ್ಚೆ ಚಿತ್ರರಂಗದಲ್ಲಿ ನಡೆಯುತ್ತಿತ್ತು. ಇಬ್ಬರೂ ಪೈಪೋಟಿಗೆ ಬಿದ್ದವರಂತೆ ಸಿನಿಮಾಗಳಲ್ಲಿ ನಟಿಸುತ್ತಿದ್ದರು. ಅವರ ಸಿನಿಮಾಗಳು ಮಿನಮಮ್ ಗ್ಯಾರಂಟಿಯ ಗೆಲುವನ್ನು ತಂದುಕೊಡುತ್ತಿದ್ದವು. ಈ ಕಾರಣದಿಂದ ಇಬ್ಬರ ನಡುವೆಯೂ ವೃತ್ತಿ ಮಾತ್ಸರ್ಯ ಇರುವುದು ಗುಟ್ಟಾಗೇನೂ ಇರಲಿಲ್ಲ.

ಒಟ್ಟಿಗೆ ಸಿನಿಮಾದಲ್ಲಿ ನಟನೆ

ಈ ಜಿದ್ದಾಜಿದ್ದಿನ ಸ್ಪರ್ಧೆಯಿಂದಾಗಿ ಇಬ್ಬರ ಮಧ್ಯೆ ಸ್ನೇಹ ಬೆಳೆಯಲಿಲ್ಲ ಎನ್ನಲಾಗಿತ್ತು. 2006ರಲ್ಲಿ ಕವಿತಾ ಲಂಕೇಶ್ ನಿರ್ದೇಶನದ 'ತನನಂ ತನನಂ' ಚಿತ್ರದಲ್ಲಿ ಮೊದಲ ಹಾಗೂ ಕೊನೆಯ ಬಾರಿಗೆ ಇಬ್ಬರೂ ಒಟ್ಟಿಗೆ ತೆರೆ ಹಂಚಿಕೊಂಡಿದ್ದರು. ತಮಿಳು ನಟ ಶಾಮ್ ಈ ಸಿನಿಮಾ ಮೂಲಕ ಕನ್ನಡ ಚಿತ್ರರಂಗಕ್ಕೆ ಕಾಲಿಟ್ಟಿದ್ದರು.

ಚುನಾವಣೆ ಸ್ಪರ್ಧೆಯ ಸುದ್ದಿ

ರಮ್ಯಾ ಚಿತ್ರರಂಗದಿಂದ ದೂರವಾಗಿ ಮಂಡ್ಯ ಲೋಕಸಭೆ ಕ್ಷೇತ್ರದಿಂದ ಕಣಕ್ಕಿಳಿಯುವಾಗ ಅವರಿಗೆ ಎದುರಾಳಿಯಾಗಿ ರಕ್ಷಿತಾ ಸ್ಪರ್ಧಿಸಲಿದ್ದಾರೆ ಎಂದು ಹೇಳಲಾಗಿತ್ತು. ಇಬ್ಬರೂ ಜತೆಯಾಗಿ ನಟಿಸಿದ ಮರುವರ್ಷ ಒಂದೆರಡು ಸಿನಿಮಾ ಮಾಡಿದ ರಕ್ಷಿತಾ, ನಿರ್ದೇಶಕ ಪ್ರೇಮ್ ಅವರನ್ನು ಮದುವೆಯಾಗಿ ಸಿನಿಮಾರಂಗದಿಂದ ದೂರವಾಗಿದ್ದರು. ಆದರೆ ರಕ್ಷಿತಾ ಚುನಾವಣೆಯಲ್ಲಿ ಸ್ಪರ್ಧೆಗೆ ಇಳಿದಿರಲಿಲ್ಲ. ಅತ್ತ ರಾಜಕೀಯದಲ್ಲಿ ಸಕ್ರಿಯರಾದ ರಮ್ಯಾ ಕೂಡ ಸಿನಿ ರಂಗದಿಂದ ದೂರ ಸರಿದರು.

ಆನ್‌ಲೈನ್‌ನಲ್ಲಿ ಫ್ರೆಂಡ್ಸ್ ಆದ ರಕ್ಷಿತಾ-ರಮ್ಯಾ

ಈಗ ಇಬ್ಬರ ಅಭಿಮಾನಿಗಳಿಗೆ ಖುಷಿಯ ಸುದ್ದಿಯೊಂದು ದೊರಕಿದೆ. ಚಿತ್ರರಂಗದಲ್ಲಿ ತಮ್ಮದೇ ಕ್ರೇಜ್ ಸೃಷ್ಟಿಸಿದ್ದ ರಮ್ಯಾ ಮತ್ತು ರಕ್ಷಿತಾ ಇಬ್ಬರೂ ಈಗ ಆನ್‌ಲೈನ್ ಗೆಳತಿಯರಾಗಿದ್ದಾರೆ. ಇನ್‌ಸ್ಟಾಗ್ರಾಂನಲ್ಲಿ ರಮ್ಯಾ ಮತ್ತು ರಕ್ಷಿತಾ ಪರಸ್ಪರ ಹಿಂಬಾಲಿಸಲು ಆರಂಭಿಸತೊಡಗಿದ್ದಾರೆ. ಇವರಿಬ್ಬರೂ ಸಿನಿಮಾರಂಗದಲ್ಲಿ ಮುಂಚೂಣಿಯಲ್ಲಿದ್ದ ಸಂದರ್ಭದಲ್ಲಿ ಸಾಮಾಜಿಕ ಜಾಲತಾಣಗಳು ಈ ರೀತಿ ಸಕ್ರಿಯವಾಗಿ ಇರಲಿಲ್ಲ. ಈಗ ಇಬ್ಬರೂ ಸ್ನೇಹಿತರಾಗಿರುವುದು ಕುತೂಹಲ ಮೂಡಿಸಿದೆ.