ಅಪ್ಪು ಜೊತೆ ಶ್ರೀಮುರಳಿ ತೆಗೆಸಿಕೊಂಡ ಕೊನೆ ಫೋಟೊ ನೋಡಿದ್ದೀರಾ?

ಅಪ್ಪು ಜೊತೆ ಶ್ರೀಮುರಳಿ ಕೊನೆ ಫೋಟೊ

"ಇದು ಜಿಮ್‌ನಲ್ಲಿ ಮಾಮಾ ತೆಗೆದ ಫೋಟೊ.. ಒಂದು ದಿನ ಮುಂಚೆ ಅಷ್ಟೇ ಈ ಫೋಟೊವನ್ನು ತೆಗೆದಿದ್ದು. ಇದನ್ನು ಯಾರಿಗೂ ತೋರಿಸಿಲ್ಲ. ಪಕ್ಕದಲ್ಲಿ ಇದ್ದವರು ಇಬ್ಬರೂ ಜೊತೆಯಲ್ಲಿ ಇದ್ದೀರಾ. ಒಂದು ಸೆಲ್ಫಿ ತೆಗೆದುಕೊಳ್ಳೋಣ ಎಂದು ಹೇಳಿದ್ದರು. ಆಗ ತೆಗೆದ ಫೋಟೊ ಇದು." ಎಂದು ಶ್ರೀಮುರಳಿ ಫಿಲ್ಮಿ ಬೀಟ್ ಜೊತೆ ಮಾತಾಡುತ್ತಾ ಭಾವುಕರಾಗಿದ್ದಾರೆ.

ಇಷ್ಟು ಬೇಗ ಕರೆಸಿಕೊಳ್ಳುವುದೇನಿತ್ತು?

"ನನಗೆ 39 ವರ್ಷ. ಅವರಿಗೆ 46.. ಅವರನ್ನು ಕರೆಸಿಕೊಳ್ಳುವಂತಹದ್ದನ್ನು ಅವರು ಏನು ಮಾಡಿದ್ದರು. ಇದು ತುಂಬಾ ಕ್ರೂರ. ಮತ್ತೆ ಇಂತಹದ್ದನ್ನು ಯಾರಿಗೂ ಮಾಡಬೇಡ ಅಂತ ಆ ದೇವರಿಗೆ ಹೇಳುತ್ತೇನೆ. ಹಿಂದಿನ ದಿನ ನಾವಿಬ್ಬರು ಜಿಮ್‌ನಲ್ಲಿ ಭೇಟಿಯಾಗಿದ್ದೆವು. ಆ ದಿನ ನಾನು ಜಿಮ್‌ನಲ್ಲಿದ್ದೆ. ಆದರೆ ಅವರು ಮನೆಯಲ್ಲಿ ವರ್ಕ್‌ಔಟ್ ಮಾಡಿದ್ದರು. ಅದೆಲ್ಲಾ ಆದ್ಮೇಲೆ ಇದೆಲ್ಲಾ ನಡೀತಂತೆ." ಎಂದು ಶ್ರೀಮುರಳಿಲ ಕಣ್ಣೀರು ಹಾಕಿದ್ದಾರೆ.

ನಾವಿಬ್ಬರೂ ಕ್ಲೋಸ್ ಆಗಿದ್ದೇ 2014ರ ಬಳಿಕ

"ನಮ್ಮ ಸಂಬಂಧಿಕರೆಲ್ಲಾ ಸೇರಿಕೊಂಡು ಫ್ಯಾಮಿಲಿ ಕಾರ್ಯಕ್ರಮದಲ್ಲಿ ಡ್ಯಾನ್ಸ್ ಮಾಡುತ್ತಿದ್ದೆವು. 2014ರಲ್ಲಿ ತುಂಬಾನೇ ಕ್ಲೋಸ್ ಆದೆವು. ಅದಕ್ಕಿಂತ ಮುಂಚೆ ನನಗೆ ಲೈಫ್‌ನಲ್ಲಿ ಸಿಕ್ಕಾಪಟ್ಟೆ ತೊಂದರೆ ಇತ್ತು. ಗ್ಯಾಪ್ ಇತ್ತು ನನಗೂ ಅವರಿಗೂ ಜಾಸ್ತಿ ಸಿಗುವುದಕ್ಕೆ ಆಗುತ್ತಿರಲಿಲ್ಲ. ಆದರೆ ಏನೇ ಆದರೂ ಫೋನ್‌ನಲ್ಲಿ ಟಚ್‌ನಲ್ಲಿ ಇರುತ್ತಿದ್ದೆವು. 2014 ಬಳಿಕ ಈ ಸಿನಿಮಾಗಳೆಲ್ಲಾ ಬಂದಾಗ ಅವರು ನನ್ನ ಜೊತೆಗಿದ್ದಿದ್ದು. ನನ್ನ ಜೊತೆ ಅವರು ಮಾತಾಡುತ್ತಿದ್ದಿದ್ದು, ಯಾರ ಬಗ್ಗೆನೂ ಅವರು ನೆಗೆಟಿವ್ ಆಗಿ ಮಾತಾಡುತ್ತಿರಲಿಲ್ಲ. ಏನೂ ಬೇಜಾರು ಮಾಡಿಕೊಳ್ಳುತ್ತಿರಲಿಲ್ಲ. ಬರೀ ಪಾಸಿಟಿವ್ ಆಗಿ ಇರುತ್ತಿದ್ದೆವು. ಆಗ ಯಾವಾಗಲೂ ಅವರು ಅಪ್ಪಿಕೊಂಡು ತಬ್ಬಿಕೊಂಡು ಮಾತಾಡೋರು. ಆ ಗುಣ ತುಂಬಾನೇ ಇಷ್ಟ." ಎಂದು ಶ್ರೀ ಮುರಳಿ ಫಿಲ್ಮಿ ಬೀಟ್‌ಗೆ ಹೇಳಿದ್ದಾರೆ.

ನಾವು ಯಾರಿಗಿಂತಲೂ ದೊಡ್ಡವರಲ್ಲ ಎನ್ನುತ್ತಿದ್ದರು

"ನಾವು ಯಾರಿಗಿಂತ ದೊಡ್ಡವರಲ್ಲ ಅನ್ನುವುದನ್ನು ಕಲಿತೆ. ಈಗ ಅದೂ ನಿಜ ಆಗಿ ಹೋಯ್ತಲ್ಲ. ಆ ಟೈಮ್ ಎಲ್ಲದಕ್ಕಿಂತ ದೊಡ್ಡದು. ಇದನ್ನೆಲ್ಲಾ ಹೇಳಿದ್ದು. ಇದೆಲ್ಲಾ ತುಂಬಾ ಡಿಸ್ಟರ್ಬ್ ಆಗುತ್ತೆ. ನಾನು ಅವರನ್ನು ಮಿಸ್ ಮಾಡಿಕೊಳ್ಳುತ್ತೇನೆ. ನಾನು ಅವರನ್ನು ತುಂಬಾ ಪ್ರೀತಿಸುತ್ತೇನೆ. ನಾವು ತೋರಿಸಿಕೊಳ್ಳುತ್ತಿರಲಿಲ್ಲ. ಇದೆಲ್ಲ ನಮಗೆ ಬೇಕಾಗಿರಲಿಲ್ಲ. ಒಬ್ಬ ಕಸಿನ್ ಆಗಿ ಇಷ್ಟು ಬೇಗ ಬಿಟ್ಟು ಹೋದರಲ್ಲ ಅಂತ ನೋವಾಗುತ್ತೆ." ಎಂದು ಶ್ರೀಮುರಳಿ ಫಿಲ್ಮಿಬೀಟ್ ಜೊತೆ ಮಾತಾಡುತ್ತಾ ಭಾವುಕರಾಗಿದ್ದರು.