ಭಾವನಾತ್ಮಕ ವಿಡಿಯೋ ಹಂಚಿಕೊಂಡ ರಾಕಿಂಗ್ ಸ್ಟಾರ್ ಯಶ್

ತಂಗಿಗಾಗಿ ತೆರಳಿದ್ದ ಯಶ್

ಸೋಮವಾರ ರಕ್ಷಾ ಬಂಧನದ ಸಂದರ್ಭದಲ್ಲಿ ಯಶ್, ಹಾಸನದಲ್ಲಿರುವ ತಂಗಿ ನಂದಿನಿ ಅರುಣ್ ಕುಮಾರ್ ಅವರನ್ನು ಭೇಟಿ ಮಾಡಿ ರಾಖಿ ಕಟ್ಟಿಸಿಕೊಂಡಿದ್ದಾರೆ. ರಕ್ಷಾಬಂಧನ ಸಹೋದರ-ಸಹೋದರಿಯರ ನಡುವಿನ ಬಾಂಧವ್ಯದ ಸಂಕೇತ. ಪ್ರತಿ ವರ್ಷ ಈ ಗಳಿಗೆಯನ್ನು ಮಿಸ್ ಮಾಡಿಕೊಳ್ಳದ ಯಶ್, ಈ ಬಾರಿ ಕೂಡ ತಂಗಿ ಮನೆಗೆ ಹೋಗಿದ್ದಾರೆ.

ಹೃದಯಸ್ಪರ್ಶಿ ವಿಡಿಯೋ

ಯಶ್ ಅವರಿಗೆ ಆರತಿ ಎತ್ತಿ, ಹಣೆಗೆ ತಿಲಕವಿಟ್ಟು, ರಾಖಿ ಕಟ್ಟಿರುವ ಸಹೋದರಿ ನಂದಿನಿ, ಕೇಸರಿಬಾತ್ ತಿನ್ನಿಸಿದ್ದಾರೆ. ಯಶ್ ಕೂಡ ಅವರಿಗೆ ಕೇಸರಿಬಾತ್ ತಿನ್ನಿಸುವ ಮೂಲಕ ಸಿಹಿ ವಿನಿಮಯ ಮಾಡಿಕೊಂಡಿದ್ದಾರೆ. ಹಿತವಾದ ಸಂಗೀತದ ಹಿನ್ನೆಲೆ ಇರುವ ಈ ವಿಡಿಯೋ ಹೃದಯಸ್ಪರ್ಶಿಯಾಗಿದೆ.

ಶುಭಾಶಯ ತಿಳಿಸಿದ ಯಶ್

ರಕ್ಷಾ ಬಂಧನದ ಶುಭಾಶಯಗಳು ನಂದು ಎಂದು ತಂಗಿಗೆ ಶುಭಾಶಯ ಕೋರಿರುವ ಯಶ್, ಎಲ್ಲ ಸಹೋದರ- ಸಹೋದರಿಯರಿಗೂ ರಕ್ಷಾ ಬಂಧನದ ಶುಭಾಶಯ ತಿಳಿಸಿದ್ದಾರೆ. ಹಾಸನದ ಫಾರ್ಮ್ ಹೌಸ್‌ನಲ್ಲಿ ನಡೆದ ರಕ್ಷಾ ಬಂಧನದ ಸಂಭ್ರಮಾಚರಣೆಯ ಫೋಟೊಗಳನ್ನು ನಂದಿನಿ ಹಂಚಿಕೊಂಡಿದ್ದಾರೆ.

ಶಿವಾನಂದ ಕಳವೆ ಭೇಟಿ

ಸಿನಿಮಾದಾಚೆಗೆ ಪರಿಸರ ಸಂರಕ್ಷಣೆಗೆ ಸಂಬಂಧಿಸಿದ ಚಟುವಟಿಕೆಗಳಲ್ಲಿಯೂ ತೊಡಗಿಸಿಕೊಂಡಿರುವ ಯಶ್, ಶಿರಸಿಯ ಪರಿಸರವಾದಿ, ಕೃಷಿಕ ಮತ್ತು ಬರಹಗಾರ ಶಿವಾನಂದ ಕಳವೆ ಅವರನ್ನೂ ಭೇಟಿಯಾಗಿದ್ದಾರೆ. ಈ ಸಂದರ್ಭದಲ್ಲಿ ತಮ್ಮ ರಚನೆಯ 'ಮಧ್ಯ ಘಟ್ಟ' ಕಾದಂಬರಿ ಹಾಗೂ ಪಶ್ಚಿಮ ಘಟ್ಟದ ವಿಶೇಷ ಸತ್ಯ ಸೀತಾ ಅಶೋಕವನ್ನು ಉಡುಗೊರೆಯಾಗಿ ನೀಡಿದ್ದಾರೆ.

ಐರಾ-ತಮ್ಮನ ರಾಖಿ ಹಬ್ಬ

ಅಮೆರಿಕದಲ್ಲಿರುವ ಸಹೋದರ ಗೌರಂಗ್‌ಗೆ ರಾಖಿ ಕಟ್ಟಲಾಗದ ಬೇಸರ ಹಂಚಿಕೊಂಡಿದ್ದ ನಟಿ ರಾಧಿಕಾ ಪಂಡಿತ್, ತಮ್ಮ ಇಬ್ಬರು ಮಕ್ಕಳ ಮೊದಲ ರಕ್ಷಾಬಂಧನದ ಸಂಭ್ರಮವನ್ನು ತೋರಿಸಿದ್ದರು. ಐರಾ ಮುದ್ದು ತಮ್ಮನಿಗೆ ಮೊದಲ ಬಾರಿ ರಾಖಿ ಕಟ್ಟಿ, ಆರತಿ ಮಾಡುತ್ತಿರುವ ಫೋಟೊಗಳು ವೈರಲ್ ಆಗಿವೆ.