ಶಿವಣ್ಣನ 125ನೇ ಸಿನಿಮಾ 'ವೇದ' ಗೆಲ್ತಾ? ಸೋಲ್ತಾ? ಬಾಕ್ಸಾಫೀಸ್‌ ರಿಪೋರ್ಟ್ ಏನಿದೆ?

ಶಿವಣ್ಣನ 'ವೇದ' ಮೊದಲ ವಾರ ಗಳಿಸಿದ್ದೆಷ್ಟು?

125ನೇ ಸಿನಿಮಾವನ್ನು ಸೆಂಚುರಿ ಸ್ಟಾರ್ ಶಿವಣ್ಣನೇ ನಿರ್ಮಾಣ ಮಾಡುವುದಕ್ಕೆ ಮುಂದಾಗಿದ್ದರು. ಇದು ಶಿವಣ್ಣ ಹಾಗೂ ಎ ಹರ್ಷ ಕಾಂಬಿನೇಷನ್‌ನಲ್ಲಿ ರಿಲೀಸ್ ಆಗಿರೋ 4ನೇ ಸಿನಿಮಾ. ಕ್ರಿಸ್‌ಮಸ್ ರಜೆ ಹಾಗೂ ಹೊಸ ವರ್ಷದ ಸಂಭ್ರಮದಲ್ಲಿಯೇ ಈ ಸಿನಿಮಾ ಬಿಡುಗಡೆಯಾಗಿತ್ತು. ಹೀಗಾಗಿ 'ವೇದ' ಬಾಕ್ಸಾಫೀಸ್‌ನಲ್ಲಿ ಎಷ್ಟು ಕಲೆಕ್ಷನ್ ಮಾಡಿರಬಹುದು ಅನ್ನೋ ಲೆಕ್ಕಾಚಾರ ಶುರುವಾಗಿತ್ತು. ಟ್ರೇಡ್ ಎಕ್ಸ್‌ಪರ್ಟ್‌ಗಳ ಪ್ರಕಾರ, ಮೊದಲನೇ ವಾರ 'ವೇದ' ಸುಮಾರು 19.6 ಕೋಟಿ ರೂ. ಕಲೆಕ್ಷನ್ ಮಾಡಿದೆ.

ಎರಡು ವಾರದಗಳ 'ವೇದ' ಕಲೆಕ್ಷನ್ ಎಷ್ಟು?

'ವೇದ' ಸಿನಿಮಾ ಎರಡನೇ ವಾರದತ್ತ ಮುನ್ನುಗ್ಗುತ್ತಿದೆ. ಹೊಸ ವರ್ಷದ ಬಳಿಕ ಶಿವಣ್ಣನ 125ನೇ ಸಿನಿಮಾ ಕಲೆಕ್ಷನ್ ಕೊಂಚ ಮಟ್ಟಿಗೆ ತಗ್ಗಿದೆ. ಹೀಗಿದ್ದರೂ, ವೇದ ಸಿನಿಮಾ ಲಾಭದಲ್ಲಿದೆ. ಮೊದಲನೇ ವಾರ 19.6 ಕೋಟಿ ರೂ. ಕಲೆಕ್ಷನ್ ಮಾಡಿದರೆ, ಎರಡನೇ ವಾರ 6.50 ಕೋಟಿ ರೂ. ಗಳಿಸಿದೆ. ಎರಡು ವಾರಗಳಲ್ಲಿ ಒಟ್ಟು ಸುಮಾರು 26.1 ಕೋಟಿ ರೂ. (ಗ್ರಾಸ್) ಕಲೆಕ್ಷನ್ ಆಗಿದೆ ಅನ್ನೋದು ವಿತರಕರ ವಲಯದಿಂದ ಕೇಳಿಬರುತ್ತಿರೋ ಸುದ್ದಿ. ಆದರೆ. ಈ ಬಗ್ಗೆ ಗೀತಾ ಆರ್ಟ್ಸ್ ಹಾಗೂ ವಿತರಣಾ ಸಂಸ್ಥೆ ಜೀ ಸ್ಟುಡಿಯೋಸ್ ಅಧಿಕೃತವಾಗಿ ಮಾಹಿತಿಯನ್ನು ಹೊರಹಾಕಿಲ್ಲ.

ವೇದ ಲೈಫ್‌ ಟೈಮ್ ಪ್ರಿಡಿಕ್ಷನ್ ಎಷ್ಟು?

'ವೇದ' ಸಿನಿಮಾ ಬಾಕ್ಸಾಫೀಸ್‌ನಲ್ಲಿ ಒಟ್ಟು ಎಷ್ಟು ಕಲೆಕ್ಷನ್ ಮಾಡಬಹುದು ಅನ್ನೋ ಲೆಕ್ಕಾಚಾರ ಕೂಡ ಶುರುವಾಗಿದೆ. ಟ್ರೇಡ್ ಅನಲಿಸ್ಟ್‌ಗಳ ಪ್ರಕಾರ, 'ವೇದ' ಲೈಫ್‌ ಟೈಮ್ ಕಲೆಕ್ಷನ್ ಸುಮಾರು 30 ಕೋಟಿ ರೂ. ದಾಟಬಹುದು ಎಂದು ಅಂದಾಜಿಸಿದ್ದಾರೆ. ವಿಶ್ವದಾದ್ಯಂತ ಸುಮಾರು 1200 ಸ್ಕ್ರೀನ್‌ಗಳಲ್ಲಿ ಈ ಸಿನಿಮಾ ರಿಲೀಸ್ ಆಗಿತ್ತು. ಕನ್ನಡ, ತೆಲುಗು ಹಾಗೂ ತಮಿಳು ಭಾಷೆಗಳಲ್ಲಿ ಈ ಸಿನಿಮಾ ರಿಲೀಸ್ ಆಗಿ ಮೆಚ್ಚುಗೆ ಗಳಿಸಿತ್ತು.

ಸೆಟ್ಟೇರುತ್ತಾ 'ವೇದ 2'?

ಶಿವರಾಜ್‌ಕುಮಾರ್ ಹಾಗೂ ಎ ಹರ್ಷ ಕಾಂಬಿನೇಷನ್‌ ಸಿನಿಮಾ 'ವೇದ' ಶೇ. 30ರಷ್ಟು ಲಾಭ ಗಳಿಸಿದೆ ಎನ್ನಲಾಗುತ್ತಿದೆ. ಈ ಬೆನ್ನಲ್ಲೇ 'ವೇದ 2' ಮಾಡುವ ಆಲೋಚನೆ ಕೂಡ ಇದೆ ಅನ್ನೋ ಮಾತುಗಳು ಕೂಡ ಕೇಳಿಬರುತ್ತಿವೆ. ಬೆಂಗಳೂರು, ಮೈಸೂರು ಹಾಗೂ ಗಡಿ ಭಾಗಗಳಲ್ಲಿ ಸಿನಿಮಾ ಉತ್ತಮ ಪ್ರತಿಕ್ರಿಯೆ ಸಿಕ್ಕಿದೆ ಎನ್ನಲಾಗುತ್ತಿದೆ. ಇನ್ನುಒಂದೆರಡು ವಾರಗಳಲ್ಲಿ ಹರ್ಷ ಹಾಗೂ ಶಿವಣ್ಣ 'ವೇದ 2' ಕ್ಲಾರಿಟಿ ಕೊಡಬಹುದು ಎಂದು ಅಂದಾಜಿಸಲಾಗಿದೆ.