'ಫ್ಯಾಂಟಮ್‌'ಗಾಗಿ ಸುದೀಪ್ ಸಿಕ್ಸ್ ಪ್ಯಾಕ್: ಬೆರಗಾದ ನಿರ್ದೇಶಕ ಅನೂಪ್ ಭಂಡಾರಿ

ಮತ್ತೊಂದು ಹಂತಕ್ಕೆ ಫಿಟ್ನೆಸ್

ಸುದೀಪ್ ಪ್ರಯತ್ನವನ್ನು ನಿರ್ದೇಶಕ ಅನೂಪ್ ಭಂಡಾರಿ ಕೊಂಡಾಡಿದ್ದಾರೆ. ಫ್ಯಾಂಟಮ್ ಚಿತ್ರದಲ್ಲಿ ಅವರ ಪಾತ್ರಕ್ಕೆ ಟೋನ್ಡ್ ಬಾಡಿ ಬೇಕು ಎಂದು ಆಲೋಚಿಸಲಾಗಿತ್ತು. ಪೈಲ್ವಾನ್ ಚಿತ್ರಕ್ಕೆ ವರ್ಕೌಟ್ ಆರಂಭಿಸಿದ ಬಳಿಕ ತಮ್ಮ ಫಿಟ್ನೆಸ್ ನೀತಿಯನ್ನು ಮುಂದುವರಿಸಿದ್ದಾರೆ. ಈಗ ಅವರ ದೇಹದಾರ್ಢ್ಯತೆ ಮತ್ತೊಂದು ಮಟ್ಟಕ್ಕೆ ತಲುಪಿದೆ ಎಂದು ಅನೂಪ್ ಹೇಳಿದ್ದಾರೆ.

ಸಿಕ್ಸ್ ಪ್ಯಾಕ್ ಖಾತರಿಯಿತ್ತು

'ಚಿತ್ರಕ್ಕೆ ಸಿಕ್ಸ್ ಪ್ಯಾಕ್ ಎಂದೇನೂ ನಾವು ಕೇಳಿರಲಿಲ್ಲ. ಆದರೆ ಅವರು ಅದನ್ನು ಮಾಡಿಕೊಂಡು ಬರುತ್ತಾರೆ ಎನ್ನುವುದು ನನಗೆ ಖಚಿತವಾಗಿತ್ತು. ಅವರು ಪಡುತ್ತಿರುವ ಶ್ರಮವನ್ನು ನಾವು ಈಗಲೇ ಸಾಮಾಜಿಕ ಜಾಲತಾಣದಲ್ಲಿ ನೋಡಿದ್ದೇವೆ' ಎಂದು ತಿಳಿಸಿದ್ದಾರೆ.

ನಾನೂ ಜಿಮ್ ಮಾಡುವಂತಾಯ್ತು

'ಮೊದಲ ಷೆಡ್ಯೂಲ್ ಶೂಟಿಂಗ್ ಸಂದರ್ಭದಲ್ಲಿ ಪ್ಯಾಕ್ ಅಪ್ ನಂತರ ಜಿಮ್‌ಗೆ ಹೋಗುವುದಾಗಿ ನಾನು ಅವರಿಗೆ ಭರವಸೆ ನೀಡಿದ್ದೆ. ಇದೊಂಥರ ನನಗೆ ಕಷ್ಟಕರ ವರವಾಗಿತ್ತು. ಇಲ್ಲದಿದ್ದರೆ ನಾನು ಫಿಟ್ ಆಗುವ ಯಾವುದೇ ಪ್ರಯತ್ನವನ್ನು ಕೂಡ ಮಾಡುತ್ತಿರಲಿಲ್ಲ' ಎಂದು ತಮ್ಮ ಮೇಲೆ ಸುದೀಪ್ ಬೀರಿದ ಪ್ರಭಾವವನ್ನು ಹೇಳಿದ್ದಾರೆ.

ನಾಯಕಿ ಅಂತಿಮಗೊಂಡಿಲ್ಲ

'ಫ್ಯಾಟಂ' ಚಿತ್ರದ ಮೊದಲ ಷೆಡ್ಯೂಲ್ ಲಾಕ್ ಡೌನ್‌ಗೆ ಮೊದಲೇ ಆರಂಭವಾಗಿತ್ತು. ನಂತರದ ಅವಧಿಯಲ್ಲಿ ಸುದೀಪ್ ಮತ್ತಷ್ಟು ವ್ಯಾಯಾಮ ಮಾಡಿದ್ದಾರೆ. ಈ ಚಿತ್ರದಲ್ಲಿ ನಿರೂಪ್ ಭಂಡಾರಿ ಮತ್ತು ಶ್ರದ್ಧಾ ಶ್ರೀನಾಥ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಆದರೆ ಸುದೀಪ್ ಅವರಿಗೆ ನಾಯಕಿ ಯಾರು ಎನ್ನುವುದು ಇನ್ನೂ ಅಂತಿಮಗೊಂಡಿಲ್ಲ.