ಪುನೀತ್ ರಾಜ್‌ಕುಮಾರ್ ಟ್ವಿಟರ್ ಖಾತೆ ಇನ್ನುಂದೆ ಅಧಿಕೃತವಲ್ಲ: ನೀಲಿ ಟಿಕ್ ತೆಗೆದು ಹಾಕಿದ್ದಕ್ಕೆ ಫ್ಯಾನ್ಸ್ ಆಕ್ರೋಶ?

ಅಪ್ಪು ಟ್ವಿಟರ್ ಖಾತೆಯಲ್ಲಿ ನೀಲಿ ಟಿಕ್ ಇಲ್ಲ

ಪವರ್‌ಸ್ಟಾರ್ ಪುನೀತ್ ರಾಜ್‌ಕುಮಾರ್ ಅಗಲಿ ಸುಮಾರು 9 ತಿಂಗಳುಗಳಾಗುತ್ತಿದೆ. ಅಪ್ಪು ಹೆಸರಿನಲ್ಲಿ ಅಭಿಮಾನಿಗಳು ಒಂದಲ್ಲಾ ಒಂದು ಉತ್ತಮ ಕೆಲಸವನ್ನು ಮಾಡುತ್ತಲೇ ಇದ್ದಾರೆ. ಈ ವೇಳೆ ಪುನೀತ್ ರಾಜ್‌ಕುಮಾರ್ ಅಭಿಮಾನಿಗಳಿಗೆ ಬೇಸರ ಆಗುವಂತಹ ಸಂಗತಿಯೊಂದು ಎದುರಾಗಿದೆ. ಇಷ್ಟು ದಿನ ಪುನೀತ್ ರಾಜ್‌ಕುಮಾರ್ ಟ್ವಿಟರ್ ಖಾತೆಯಲ್ಲಿದ್ದ ನೀಲಿ ಟಿಕ್ ಈಗ ಮಾಯವಾಗಿದೆ. ಈ ಬೆಳವಣಿಗೆಯನ್ನು ನೋಡಿ ಪವರ್‌ಸ್ಟಾರ್ ಫ್ಯಾನ್ಸ್ ಮತ್ತಷ್ಟು ನೋವು ಅನುಭವಿಸುವಂತಾಗಿದೆ.

ಈ ನೀಲಿ ಟಿಕ್ ಯಾಕೆ ಇತ್ತು?

ಸೆಲೆಬ್ರೆಟಿಗಳು ಅಂದ್ಮೇಲೆ ಅವರ ಖಾತೆಯನ್ನು ನಕಲು ಮಾಡುವ ಮಂದಿ ಇರುತ್ತಾರೆ. ಪುನೀತ್ ರಾಜ್‌ಕುಮಾರ್ ಹೆಸರಿನಲ್ಲಿಯೇ ಬೇರೆಯವರು ಖಾತೆಯನ್ನು ತೆರೆಯಬಹುದು. ಈ ಕಾರಣಕ್ಕೆ ಟ್ವಿಟರ್ ತನ್ನ ಬಳಕೆದಾರರಿಗೆ ಅವರ ಖಾತೆಯ ಮುಂದೆ ನೀಲಿ ಟಿಕ್ ಅನ್ನು ನೀಡುತ್ತೆ. ಈ ಮೂಲಕ ಇದು ಅವರ ಅಧಿಕೃತ ಖಾತೆ ಎಂದು ದೃಢೀಕರಿಸುತ್ತೆ. ಈ ಕಾರಣಕ್ಕೆ ಪುನೀತ್ ರಾಜ್‌ಕುಮಾರ್ ಖಾತೆಯ ಮುಂದೆನೂ ಟ್ವಿಟರ್ ನೀಲಿ ಟಿಕ್ ಅನ್ನುನೀಡಿತ್ತು. ಈಗ ಅದನ್ನು ತೆಗೆದು ಹಾಕಿದೆ.

ನೀಲಿ ಟಿಕ್ ತೆಗೆದು ಹಾಕಿದ್ದೇಕೆ?

ಪುನೀತ್ ರಾಜ್‌ಕುಮಾರ್ ಟ್ವಿಟಲ್ ಖಾತೆಯಿಂದ ನೀಲಿ ಟಿಕ್ ತೆಗೆದುಹಾಕಲು ಸಾಕಷ್ಟು ಕಾರಣವಿದೆ. ಅಪ್ಪು ಅಗಲಿದ ಬಳಿಕ ಅವರ ಟ್ವಿಟರ್ ಅಕೌಂಟ್ ಅಧಿಕೃತ ಖಾತೆಯಾಗಿ ಉಳಿದಿಲ್ಲ. ಅಲ್ಲದೆ ಕಳೆದ 8 ತಿಂಗಳಿಂದ ಅವರ ಖಾತೆಯನ್ನು ಆಕ್ಟಿವ್ ಆಗಿಲ್ಲ. ಈ ಕಾರಣಕ್ಕೆ ಪುನೀತ್ ರಾಜ್‌ಕುಮಾರ್ ಟ್ವಿಟರ್ ಖಾತೆಯಿಂದ ನೀಲಿ ಟಿಕ್ ಅನ್ನು ತೆಗೆದು ಹಾಕಲಾಗಿದೆ.

ಅಪ್ಪು ಅಭಿಮಾನಿಗಳಿಗೆ ನೋವು

ಪುನೀತ್‌ ರಾಜ್‌ಕುಮಾರ್ ಅಭಿಮಾನಿಗಳು ಟ್ವಿಟರ್ ವಿರುದ್ಧ ಆಕ್ರೋಶ ಹೊರ ಹಾಕುತ್ತಿದ್ದಾರೆ. ಬಾಲಿವುಡ್‌ನ ಸಿದ್ಧಾರ್ಥ್ ಶುಕ್ಲಾ ಅವರ ಟ್ವಿಟರ್ ಖಾತೆಯಲ್ಲಿ ನೀಲಿ ಟಿಕ್ ಇದೆ ಆದರೆ, ಅಪ್ಪು ಖಾತೆಯಿಂದ ನೀಲಿ ಟಿಕ್ ತೆಗೆದಿದ್ದು ಯಾಕೆ? ಎಂದು ಪ್ರಶ್ನೆ ಮಾಡುತ್ತಿದ್ದಾರೆ. ಇದರೊಂದಿಗೆ ಅಭಿಮಾನಿಗಳು ಅಭಿಮಾನ ಮಾಡಲು ಪವರ್‌ಸ್ಟಾರ್ ಅಭಿಮಾನಿಗಳಿಗೆ ಕರೆ ನೀಡಿದ್ದಾರೆ.