ರೀ ಡೈರೆಕ್ಟ್ರೆ ಮಾನಿಟರ್ ಒಳಗೆ ಮುಳುಗಿ ಹೋಗಿದ್ದೀರಾ?: ಬರ್ತ್‌ಡೇಯಂದೇ ಉಪ್ಪಿ ಕೊಟ್ಟ ಸುಳಿವೇನು?

'ಯುಐ' ತಂಡದ ವಿಶಿಷ್ಟ ವಿಡಿಯೋ

ರಿಯಲ್ ಸ್ಟಾರ್ ಬರ್ತ್‌ಡೇಗೆ 'ಯುಐ' ತಂಡ ಸಖತ್ತಾಗಿರೋ ವಿಡಿಯೋ ಒಂದನ್ನು ಬಿಟ್ಟಿದೆ. ಈ ವಿಡಿಯೋದಲ್ಲಿ ಉಪೇಂದ್ರ ಮಾನಿಟರ್ ಒಳಗೆ ಮುಳುಗಿ ಹೋಗಿದ್ದಾರೆ. ಇದರಲ್ಲಿ ಏನು ವಿಶೇಷ ಅಂತಿರಾ? ಪ್ರೇಮ್ ಒಳಗೊಂದು ಪ್ರೇಮ್ ಇಟ್ಟು ತೋರಿಸುವ ತಂಡ ಬ್ಯಾಕ್‌ ಗ್ರೌಂಡ್‌ನಲ್ಲಿ ಡೈಲಾಗ್ ಬಿಡೋವರೆಗೂ ಉಪೇಂದ್ರರನ್ನು ತೋರಿಸೋದಿಲ್ಲ. ರೀ ಡೈರೆಕ್ಟ್ರೆ ಮಾನಿಟರ್ ಒಳಗೆ ಮುಳುಗಿ ಹೋಗಿದ್ದೀರಾ? ಅಂತ ಡೈಲಾಗ್ ಬಿದ್ದಾಗಲೇ ಉಪ್ಪಿ ತಿರುಗಿ ನೋಡೋದು. ಅಷ್ಟಕ್ಕೂ ಉಪ್ಪಿ ಕೊನೆಯಲ್ಲಿ ತಲೆಗೊಂದು ಹುಳ ಬಿಟ್ಟಿದ್ದಾರೆ.

ಉಪ್ಪಿ ಕೊಟ್ಟ ಸುಳಿವೇನು?

'ಯುಐ' ವಿಡಿಯೋ ತೀರಾ ದೊಡ್ಡದೇನು ಅಲ್ಲ. ಆದರೆ, ವಿಶಿಷ್ಠವಾಗಿ ಉಪ್ಪಿ ಶೈಲಿಯಲ್ಲಿಯೇ ಶೂಟ್ ಮಾಡಲಾಗಿದೆ. "ರೀ ಡೈರೆಕ್ಟ್ರೆ ಮಾನಿಟರ್ ಒಳಗೆ ಮುಳುಗಿ ಹೋಗಿದ್ದೀರಾ? ಸ್ವಲ್ಪ ಆಚೆ ಬನ್ನಿ. ಇವತ್ತು ನಿಮ್ಮ ಅಭಿಮಾನಿಗಳ ದಿನ. ಪ್ರಜಾ ಪ್ರಭುಗಳು ನಿಮಗೋಸ್ಕರ ಕಾಯ್ತಿದ್ದಾರೆ. ಬನ್ನಿ ಸಾರ್" ಕ್ಯಾಮರಾ ಹಿಂದಿಂದ ಡೈಲಾಗ್ ಬರ್ತಿದ್ದಂತೆ ಉಪ್ಪಿ ಥಮ್ಸ್ ಅಪ್ ಮಾಡುತ್ತಾರೆ. ಅದರ ಹಿಂದೆನೇ "ಕಮಿಂಗ್ ಸೂನ್" ಅಂತ ಉಪ್ಪಿ ಹೇಳಿದ್ದು, ಫ್ಯಾನ್ಸ್‌ಗಳಿಗೆ ಟ್ರಿಗರ್ ಆಗಿದೆ. ಆದಷ್ಟು ಬೇಗ ಸಿನಿಮಾ ರಿಲೀಸ್ ಆಗುತ್ತೆ ಅಂತನಾ? ಇಲ್ಲಾ ಟೀಸರ್ ಬಿಡ್ತಾರಾ? ಟ್ರೈಲರ್ ಬಿಡ್ತಾರಾ? ಹೀಗೆ ನೂರೆಂಟು ಪ್ರಶ್ನೆಗಳು ಹುಟ್ಟಿಕೊಂಡಿವೆ.

ತಲೆಗೆ ಹುಳ ಬಿಡ್ತಾರೆ ಉಪ್ಪಿ

ಉಪೇಂದ್ರ ನಿರ್ದೇಶನ ಮಾಡುವ ಸಿನಿಮಾ ಕಾಮನ್ ಅಲ್ಲ. ಈ ಹಿಂದೆ ಅವರು ನಿರ್ದೇಶಿಸಿದ ಸಿನಿಮಾಗಳೆಲ್ಲವೂ ಇಂತಹ ಅನುಭವಗಳನ್ನು ನೀಡಿದೆ. "ಯುಐ' ಕೂಡ ಸಿನಿಪ್ರಿಯರನ್ನು ಆಲೋಚನೆಗೀಡು ಮಾಡುವ ಸಿನಿಮಾ" ಅಂತ ಉಪ್ಪಿ ಸಿನಿಮಾ ಆರಂಭ ಮಾಡುವಾಗ ಹೇಳಿದ್ದರು. ಈ ಮೂಲಕ ಅದ್ಭುತವಾದ ಸಿನಿಮ್ಯಾಟಿಕ್‌ ಎಕ್ಸ್‌ಪಿರಿಯನ್ಸ್‌ ಅನ್ನು 'ಯುಐ'ನಲ್ಲಿ ನಿರೀಕ್ಷೆ ಮಾಡಬಹುದಾಗಿದೆ.

ಪ್ಯಾನ್ ಇಂಡಿಯಾ ರಿಲೀಸ್

'ಕಬ್ಜ' ಸಿನಿಮಾ ಜೊತೆ ಉಪೇಂದ್ರ ಪ್ಯಾನ್ ಇಂಡಿಯಾ ಅಖಾಡಕ್ಕೆ ಇಳಿಯುತ್ತಿದ್ದಾರೆ. ಇದರ ಹಿಂದೆನೇ ತಾವೇ ನಿರ್ದೇಶಿಸಿದ 'ಯುಐ' ಸಿನಿಮಾವನ್ನೂ ಪ್ಯಾನ್ ಇಂಡಿಯಾ ಲೆವೆಲ್‌ನಲ್ಲಿ ಬಿಡುಗಡೆ ಮಾಡಲಾಗುತ್ತೆ. ಈಗಾಗಲೇ ಉಪೇಂದ್ರ ತೆಲುಗು ಹಾಗೂ ತಮಿಳಿನಲ್ಲಿ ಚಿರಪರಿಚಿತ. ಹೀಗಾಗಿ 'ಯುಐ' ಬಾಕ್ಸಾಫೀಸ್‌ ಮೇಲೆ ಎಲ್ಲರ ಕಣ್ಣಿದೆ. ವಿಡಿಯೋದಲ್ಲಿ ಸುಳಿವು ಕೊಟ್ಟಂತೆ ಇದೇ ವರ್ಷ ಸಿನಿಮಾ ರಿಲೀಸ್ ಮಾಡುತ್ತಾರಾ? ಅನ್ನೋದನ್ನು ಎದುರು ನೋಡಬೇಕಿದೆ.