'ಭೀಮ' ಸಿನಿಮಾದಲ್ಲಿ ಕೋಳಿ ಹಿಡಿದು ನಿಂತ ಅಶ್ವಿನಿ: ಯಾರಿದು ನಾಟಿ ಕ್ರಶ್?

'ಭೀಮ'ನ ಬೆಡಗಿ ಪಕ್ಕಾ ನಾಟಿ

'ಸಲಗ' ಸಿನಿಮಾ ಬಳಿಕ ದುನಿಯಾ ವಿಜಯ್ ಮತ್ತೆ ನಿರ್ದೇಶನಕ್ಕೆ ಇಳಿದಿದ್ದಾರೆ. ಜೊತೆಗೆ ಇದೇ ಸಿನಿಮಾದಲ್ಲಿ ಹೀರೊ ಆಗಿಯೂ ನಟಿಸುತ್ತಿದ್ದಾರೆ. ಹೀಗಾಗಿ 'ಭೀಮ' ಮೇಲೆ ಅದೇ ಕುತೂಹಲವಿದೆ. ಈಗ ಈ ಸಿನಿಮಾಗೆ ಹೊಸ ಪ್ರತಿಭೆಯನ್ನು ಹೀರೊಯಿನ್ ಆಗಿ ಪರಿಚಯ ಮಾಡಿಸಲಾಗುತ್ತಿದೆ. ಅವರೇ ಅಶ್ವಿನಿ. ಇವರ ಫಸ್ಟ್ ಲುಕ್ ರಿಲೀಸ್ ಆಗಿದ್ದಷ್ಟೇ, ಸ್ಯಾಂಡಲ್‌ವುಡ್‌ನ ನಾಟಿ ಕ್ರಶ್ ಅಂತ ಕರೆಯೋಕೆ ಶುರು ಮಾಡಿದ್ದಾರೆ.

ರಂಗಭೂಮಿಯಿಂದ ಬಂದ ನಾಟಿ ಕ್ರಶ್

'ಭೀಮ' ಸಿನಿಮಾ ಎಂಟ್ರಿ ಕೊಟ್ಟ ಅಶ್ವಿನಿ ಪಕ್ಕಾ ದೇಸಿ ಪ್ರತಿಭೆ. ಅಪ್ಪಟ ಕನ್ನಡದ ಹುಡುಗಿ. ಬೆಂಗಳೂರಿನಲ್ಲೇ ಬೆಳೆದಿದ್ದರೂ, ತಂದೆ-ತಾಯಿಗೆ ಗ್ರಾಮೀಣ ಪ್ರದೇಶದ ಅನುಭವಿದೆ. ಹಾಗಂತ ದಿಢೀರನೇ ಬಣ್ಣ ಹಚ್ಚಿ ಕನ್ನಡ ಚಿತ್ರರಂಗಕ್ಕೆ ಧುಮುಕಿಲ್ಲ. ರಂಗಭೂಮಿಯ ಹಲವು ನಾಟಕಗಳಲ್ಲಿ ವಿಭಿನ್ನ ಪಾತ್ರಗಳಲ್ಲಿ ನಟಿಸಿದ್ದಾರೆ. ಸುಮಾರು 15ಕ್ಕೂ ಅಧಿಕ ನಾಟಕಗಳಲ್ಲಿ ಅಶ್ವಿನಿ ನಟಿಸಿರುವ ಅನುಭವಿದೆ.

ಅಶ್ವಿನಿಗೆ ಕಲ್ಪನಾ ಪ್ರೇರಣೆ

ಅಶ್ವಿನಿ ರಂಗಭೂಮಿಯಲ್ಲಿ ನಟಿಸಿದ ಅನುಭವವಿದೆ. ಆದರೂ, ನಟನೆಗೆ ಪ್ರೇರಣೆಯಾದರು ಕನ್ನಡ ಚಿತ್ರರಂಗದ ಮಿನುಗುತಾರೆ ಕಲ್ಪನಾ. ಹೀಗಾಗಿ ಫಸ್ಟ್‌ ಲುಕ್‌ನಲ್ಲಿ ಗಮನಸೆಳೆದಿದ್ದಾರೆ. ರಂಗಭೂಮಿ ಕಲಾವಿದೆಯಾಗಿರುವುದರಿಂದ ನಟನೆಯಲ್ಲಿ ಪರಿಣಿತಿಯನ್ನು ಹೊಂದಿದ್ದಾರೆ. ಈ ಕಾರಣಕ್ಕೆ ಕನ್ನಡ ಚಿತ್ರರಂಗಕ್ಕೆ ಹೊಸ ಪ್ರತಿಭೆಯೊಂದು ಸಿಗುವ ಎಲ್ಲಾ ಸಾಧ್ಯತೆಗಳೂ ಇವೆ.

ಅಶ್ವಿನಿಗೆ ಅವಕಾಶ ಸಿಕ್ಕಿದ್ದೇಗೆ?

" ಒಂದು ಬುಕ್ ರಿಲೀಸ್ ಕಾರ್ಯಕ್ರಮದಲ್ಲಿ ಸರ್‌ ನನ್ನನ್ನು ನೋಡಿದ್ದು. ಅಲ್ಲಿ ಒಂದು ಪಾತ್ರ ಇದೆ ಮಾಡುತ್ತೀಯಾ ಅಂತ ಕೇಳಿದ್ರು. ಮಾಡುತ್ತೀನಿ ಅಂತ ಹೇಳಿದೆ. ಆ ಪ್ರಕ್ರಿಯೆ ಶುರುವಾದಾಗ ನನಗೆ ಗೊತ್ತಾಗಿಲ್ಲ. ಆರೇಳು ತಿಂಗಳ ಹಿಂದಷ್ಟೇ ನನಗೆ ಹೀರೊಯಿನ್ ಪಾತ್ರ ಅಂತ ಗೊತ್ತಾಯ್ತು. ಅಲ್ಲಿವರೆಗೂ ನನಗೆ ಹೇಳಿರಲಿಲ್ಲ." ಎಂದು ಅಶ್ವಿನಿ ಹೇಳುತ್ತಾರೆ.