'83' ಸಿನಿಮಾದಿಂದ ಆದ ನಷ್ಟ ನಿಗಿಸಿಕೊಳ್ಳಲು ಮಾಸ್ಟರ್ ಪ್ಲ್ಯಾನ್: ಒಂದೇ ಸಿನಿಮಾ 2 ಒಟಿಟಿಗಳಲ್ಲಿ ರಿಲೀಸ್

83 ಒಟಿಟಿ ಎಂಟ್ರಿಗೆ ವೇದಿಕೆ

ಬಾಲಿವುಡ್ ನಟ ರಣವೀರ್​ ಸಿಂಗ್ ಅಭಿನಯದ '83' ಸೋಲಿಗೆ ಕಾರಣವೇನು ಅನ್ನುವುದು ಇನ್ನೂ ಬಾಲಿವುಡ್ ಮಂದಿಗೆ ಯಕ್ಷ ಪ್ರಶ್ನೆಯಾಗಿಯೇ ಉಳಿದಿದೆ. ವಿಮರ್ಶಕರು ಸಿನಿಮಾಗೆ ಗ್ರೀನ್ ಸಿಗ್ನಲ್ ಕೊಟ್ಟಿದ್ದರೂ, '83' ಬಾಕ್ಸಾಫೀಸ್‌ನಲ್ಲಿ ಮಕಾಡೆ ಮಲಗಿದ್ದು ದೊಡ್ಡ ನಿರಾಸೆಯನ್ನೇ ತಂದಿದೆ. ಬಾಕ್ಸಾಫೀಸ್‌ನಲ್ಲಿ ಕೇವಲ ​ 100 ಕೋಟಿ ರೂಪಾಯಿ ಗಳಿಸಲು ಈ ಸಿನಿಮಾ ಪರದಾಡಿದ್ದು, ಇಡೀ ತಂಡಕ್ಕೆ ದೊಡ್ಡ ಪೆಟ್ಟು ಕೊಟ್ಟಂತಾಗಿದೆ. ಹೀಗಾಗಿ ಈ ಸಿನಿಮಾ ಒಟಿಟಿಯಲ್ಲಿ ಬಿಡುಗಡೆಗೆ ಸಜ್ಜಾಗಿದೆ. ಇಲ್ಲಾದರೂ ಸಿನಿಮಾ ನೋಡಿ ಜನರು ಮೆಚ್ಚಿಕೊಳ್ಳಬಹುದು ಎಂಬ ನಿರೀಕ್ಷೆಯಿದೆ.

2 ಒಟಿಟಿಗಳಲ್ಲಿ '83' ರಿಲೀಸ್

ಭಾರತೀಯ ಚಿತ್ರರಂಗದ ಇತಿಹಾಸ ಸೃಷ್ಟಿಸಲು ಹೊರಟಿದ್ದ ಸಿನಿಮಾ ಎರಡು ಒಟಿಟಿಗಳಲ್ಲಿ ಬಿಡುಗಡೆಯಾಗುತ್ತಿದೆ. '83' ಸಿನಿಮಾ ನೆಟ್‌ಫ್ಲಿಕ್ಸ್ ಹಾಗೂ ಡಿಸ್ನಿ+ಹಾಟ್‌ಸ್ಟಾರ್‌ನಲ್ಲಿ ಬಿಡುಗಡೆಯಾಗಲಿದೆಯಂತೆ. '83' ಸಿನಿಮಾದ ಹಿಂದಿ ಅವತರಣಿಕೆ ನೆಟ್‌ಫ್ಲಿಕ್ಸ್‌ನಲ್ಲಿಯೂ, ಕನ್ನಡ, ತಮಿಳು, ಮಲಯಾಳಂ ಹಾಗೂ ತೆಲುಗು ವರ್ಷನ್ ಡಿಸ್ನಿ+ಹಾಟ್‌ಸ್ಟಾರ್‌ನಲ್ಲಿಯೂ ರಿಲೀಸ್ ಆಗುತ್ತಿದೆ.

'ತಲೈವಿ' 2 ಒಟಿಟಿ ವೇದಿಕೆಯಲ್ಲಿ ರಿಲೀಸ್

ಒಂದೇ ಸಿನಿಮಾ ಎರಡು ಒಟಿಟಿಗಳಲ್ಲಿ ಬಿಡುಗಡೆಯಾಗುತ್ತಿರುವುದು ಇದೇ ಮೊದಲೇನಲ್ಲ. ಈ ಹಿಂದೆ ಕೂಡ ಎರಡು ಒಟಿಟಿಗಳಲ್ಲಿ ಸಿನಿಮಾ ಬಿಡುಗಡೆಯಾಗಿದೆ. ಕಂಗನಾ ರನೌತ್ ಅಭಿನಯದ 'ತಲೈವಿ' ಸಿನಿಮಾದ ಹಿಂದಿ ಅವತರಣಿಕೆ​ ನೆಟ್​ಫ್ಲಿಕ್ಸ್ ಬಿಡುಗಡೆಯಾಗಿತ್ತು. ಬೇರೆ ಭಾಷೆಯ ಅವತರಣಿಕೆಗಳನ್ನು ಅಮೆಜಾನ್​ ಪ್ರೈಮ್​ ವಿಡಿಯೋಗೆ ನೀಡಲಾಗಿತ್ತು. ಈ ಸಿನಿಮಾ ಕೂಡ ಬಾಕ್ಸಾಫೀಸ್‌ನಲ್ಲಿ ಮಕಾಡೆ ಮಲಗಿತ್ತು.

ನಷ್ಟದಿಂದ ತಪ್ಪಿಸಿಕೊಳ್ಳಲು ಈ ಯತ್ನ

'83' ಸಿನಿಮಾ ದೊಡ್ಡ ದೊಡ್ಡ ಸಿನಿಮಾ ನಿರ್ಮಾಣ ಸಂಸ್ಥೆಗಳೇ ಕೈ ಜೋಡಿಸಿದ್ದವು. ಬಿಡುಗಡೆ ವೇಳೆ ಕನ್ನಡ ಕಿಚ್ಚ ಸುದೀಪ್ ಜೊತೆಯಾಗಿದ್ದರೆ, ತೆಲುಗಿನಲ್ಲಿ ಅಕ್ಕಿನೇನಿ ನಾಗಾರ್ಜುನ, ತಮಿಳಿನಲ್ಲಿ ಕಮಲ್ ಹಾಸನ್ ನಿರ್ಮಾಣ ಸಂಸ್ಥೆಗಳು ಬಿಡುಗಡೆಗೆ ಸಹಕರಿಸಿದ್ದವು. ಆದರೂ ಸಿನಿಮಾ ಸೋಲನ್ನು ಅನುಭವಿಸಿತ್ತು. ಹೀಗಾಗಿ ಈ ನಷ್ಟವನ್ನು ಭರಿಸಿಕೊಳ್ಳಲು ಎರಡು ಒಟಿಟಿ ವೇದಿಕೆಗಳಿಗೆ ಸಿನಿಮಾ ಮಾರಾಟ ಮಾಡಿದೆ ಎನ್ನಲಾಗುತ್ತಿದೆ. ಮೂಲಗಳ ಪ್ರಕಾರ ಫೆಬ್ರವರಿ 18 ಅಥವಾ 25ಕ್ಕೆ ಬಿಡುಗಡೆಯಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ.