RRR ಬಳಿಕ ದಕ್ಷಿಣದ ಭಾರತದ ಸಿನಿಮಾಗಳ ಮೇಲೆ ನೆಟ್‌ಫ್ಲಿಕ್ಸ್‌ ಕಣ್ಣು: ಕನ್ನಡ ಲೆಕ್ಕಕ್ಕೇ ಇಲ್ವಾ?

ಬಾಲಿವುಡ್‌ನಿಂದ ಸೌತ್‌ಗೆ ನೆಟ್‌ಫ್ಲಿಕ್ಸ್

ನೆಟ್‌ಫ್ಲಿಕ್ಸ್ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಜನಪ್ರಿಯವಾಗಿರುವ ಓಟಿಟಿ ವೇದಿಕೆ. ಕಂಟೆಂಟ್ ಅದ್ಭುತವಾಗಿದ್ದರೆ, ದುಬಾರಿ ಮೊತ್ತವನ್ನು ನೀಡಿ ಸಿನಿಮಾವನ್ನು ಖರೀದಿ ಮಾಡುತ್ತೆ. ಭಾರತದಲ್ಲಿ ಬಾಲಿವುಡ್ ಸಿನಿಮಾಗಳ ಕಡೆಗೆನೇ ಹೆಚ್ಚು ಗಮನ ಹರಿಸಿತ್ತು. ಬಾಲಿವುಡ್‌ನ ಜನಪ್ರಿಯ ಫಿಲ್ಮ್ ಮೇಕರ್ಸ್ ಸಿನಿಮಾಗಳನ್ನೇ ಖರೀದಿ ಮಾಡಿದೆ. ಅಲ್ಲದೆ ಬಾಲಿವುಡ್ ಸಿನಿಮಾಗಳನ್ನು ನಿರ್ಮಾಣ ಮಾಡಿದೆ. ಈ ಮಧ್ಯೆ ಆಗಾಗ ದಕ್ಷಿಣ ಭಾರತದ ಸಿನಿಮಾಗಳನ್ನು ಖರೀದಿಸಿದ್ದು ಬಿಟ್ಟರೆ, ಹೆಚ್ಚು ಗಮನ ಹರಿಸಿರಲಿಲ್ಲ. RRR ಬಳಿಕ ನೆಟ್‌ಫ್ಲಿಕ್ಸ್ ತನ್ನ ಸ್ಟ್ರಾಟಜಿಯನ್ನು ಬದಲಿಸಿದೆ.

ನೆಟ್‌ಫ್ಲಿಕ್ಸ್‌ಗೆ 'ಗಾಡ್ ಫಾದರ್'

RRR ಯಶಸ್ಸಿನ ಬಳಿಕ ನೆಟ್‌ಫಿಕ್ಸ್ ದಕ್ಷಿಣ ಭಾರತದ ಕಡೆಗೆ ಮುಖ ಮಾಡಿದೆ. ಸದ್ಯ ಮೆಗಾಸ್ಟಾರ್ ಚಿರಂಜೀವಿ ಹಾಗೂ ಸಲ್ಮಾನ್ ಖಾನ್ ಕಾಂಬಿನೇಷನ್‌ ಸಿನಿಮಾ 'ಗಾಡ್ ಫಾದರ್' ಅನ್ನು ದುಬಾರಿ ಮೊತ್ತ ಕೊಟ್ಟು ಖರೀದಿ ಮಾಡಿದೆ. ಮೂಲಗಳ ಪ್ರಕಾರ, ಈ ಸಿನಿಮಾ 67 ಕೋಟಿ ರೂಪಾಯಿಗೆ ಖರೀದಿ ಮಾಡಿದೆ ಎನ್ನಲಾಗಿದೆ. ಇನ್ನು ಚಿರಂಜೀವಿ ಅಭಿನಯದ 154ನೇ ಸಿನಿಮಾವನ್ನೂ 50 ಕೋಟಿ ರೂಪಾಯಿಗೆ ಖರೀದಿ ಮಾಡಿದೆ ಅನ್ನೋ ಸುದ್ದಿನೂ ಇದೆ.

ತೆಲುಗು, ತಮಿಳು, ಮಲಯಾಳಂ ಕಡೆ ಒಲವು

ನೆಟ್‌ಫ್ಲಿಕ್ಸ್ ಸದ್ಯಕ್ಕೀಗ ತೆಲುಗು, ತಮಿಳು ಹಾಗೂ ಮಲಯಾಳಂ ಸಿನಿಮಾಗಳನ್ನು ಖರೀದಿ ಮಾಡಲು ಉತ್ಸಾಹ ತೋರಿದೆ ಎನ್ನಲಾಗಿದೆ. ಮೆಗಾಸ್ಟಾರ್ ಚಿರಂಜೀವಿ, ಜೂ.ಎನ್‌ಟಿಆರ್, ರಾಮ್‌ಚರಣ್, ಪ್ರಭಾಸ್ ಸಿನಿಮಾಗಳ ಮೇಲೆ ಕಣ್ಣಿಟ್ಟಿದೆ. ತಮಿಳಿನಲ್ಲಿ ಪಾ.ರಂಜಿತ್ ನಿರ್ದೇಶನದ ಸಿನಿಮಾವನ್ನು ಖರೀದಿ ಮಾಡುತ್ತಿದೆ ಅನ್ನೋ ಮಾತು ಕೇಳಿ ಬರುತ್ತಿದೆ. ಈ ಮೂಲಕ ಅಮೆಜಾನ್ ಹಾಗೂ ಡಿಸ್ನಿ+ಹಾಟ್‌ಸ್ಟಾರ್‌ಗೆ ಕಾಂಪಿಟೇಷನ್ ಕೊಡುವುದಕ್ಕೆ ಸಜ್ಜಾಗಿದೆ ಅನ್ನೋ ಮಾತು ಕೇಳಿ ಬರುತ್ತಿದೆ.

ಕನ್ನಡ ಸಿನಿಮಾ ಬಗ್ಗೆ ಇನ್ನೂ ಒಲವಿಲ್ಲ

ನೆಟ್‌ಫ್ಲಿಕ್ಸ್ ತೆಲುಗು, ತಮಿಳು, ಮಲಯಾಳಂ ಸಿನಿಮಾಗಳನ್ನು ಖರೀದಿ ಮಾಡಲು ಒಲವು ತೋರಿದೆ ಅಷ್ಟೇ. ಆದರೆ, ಕನ್ನಡ ಸಿನಿಮಾ ಕಡೆ ಮನಸ್ಸು ಕೂಡ ಮಾಡಿಲ್ಲ. 'ಕೆಜಿಎಫ್', 'ವಿಕ್ರಾಂತ್ ರೋಣ'ದಂತಹ ಬ್ಲಾಕ್ಸ್ ಬಸ್ಟರ್ ಸಿನಿಮಾ ನೀಡಿದರೂ, ನೆಟ್‌ಫಿಕ್ಸ್ ಕನ್ನಡ ಸಿನಿಮಾ ಖರೀದಿ ಬಗ್ಗೆ ಮಾತ್ರ ಆಸಕ್ತಿ ತೋರಿಲ್ಲ ಎನ್ನಲಾಗುತ್ತದೆ.