ಪುನೀತ್ ರಾಜ್‌ಕುಮಾರ್‌ಗೆ ಗೌರವ ಸೂಚಿಸಲು ಅಮೆಜಾನ್ ಪ್ರೈಮ್ ಸಜ್ಜು: ಒಂದು ತಿಂಗಳು ವೀಕ್ಷಣೆ ಉಚಿತ

ಅಮೆಜಾನ್ ಪ್ರೈಮ್ ವತಿಯಿಂದ ಅಪ್ಪುಗೆ ಗೌರವ

ಪುನೀತ್ ರಾಜ್‌ಕುಮಾರ್ ಓಟಿಟಿ ಸಂಸ್ಥೆ ಅಮೆಜಾನ್ ಪ್ರೈಮ್ ಜೊತೆ ಉತ್ತಮ ಸಂಬಂಧವನ್ನು ಹೊಂದಿದ್ದರು. ತಮ್ಮದೇ ಪಿಆರ್‌ಕೆ ಬ್ಯಾನರ್‌ನಲ್ಲಿ ನಿರ್ಮಾಣ ಮಾಡಿದ ಸಾಕಷ್ಟು ಸಿನಿಮಾಗಳು ಅಮೆಜಾನ್ ಪ್ರೈಮ್‌ನಲ್ಲಿ ಬಿಡುಗಡೆಯಾಗಿವೆ. ಹೊಸಬರಿಗಾಗಿ ಅಪ್ಪು ನಿರ್ಮಿಸುತ್ತಿದ್ದ ಸಿನಿಮಾಗಳಿಗೆ ಅಮೆಜಾನ್ ಪ್ರೈಮ್ ವೇದಿಕೆಯಾಗುತ್ತಿತ್ತು. ಹೀಗಾಗಿ ಯಾವಾಗ ಅಪ್ಪು ಸಿನಿಮಾ ನಿರ್ಮಾಣಕ್ಕೆ ಇಳಿದಿದ್ದರೋ ಅಲ್ಲಿಂದ ಅಮೆಜಾನ್ ಜೊತೆ ಉತ್ತಮ ಸಂಬಂಧವನ್ನು ಇಟ್ಟುಕೊಂಡಿದ್ದರು. ಈ ಕಾರಣಕ್ಕಾಗಿಯೇ ಅಮೆಜಾನ್ ಪ್ರೈಮ್ ಅಪ್ಪಗೆ ಗೌರವ ಸೂಚಿಸಲು ಮುಂದಾಗಿದೆ.

ಒಂದು ತಿಂಗಳು ಪುನೀತ್ ಸಿನಿಮಾ ಉಚಿತ

ಅಮೆಜಾನ್ ಪ್ರೈಮ್ ಅಪ್ಪುಗೆ ಗೌರವ ಸೂಚಿಸುವುದರೊಂದಿಗೆ ಅಭಿಮಾನಿಗಳಿಗೆ ಉಚಿತವಾಗಿ ಸಿನಿಮಾ ವೀಕ್ಷಣೆಗೆ ಅನುವು ಮಾಡಿ ಕೊಟ್ಟಿದೆ. ಫೆಬ್ರವರಿ 1 ರಿಂದ ಫೆಬ್ರವರಿ 28ರ ವರೆಗೆ ಅಮೆಜಾನ್‌ನಲ್ಲಿ ಪಿಆರ್‌ಕೆ ಬ್ಯಾನರ್‌ನಲ್ಲಿ ನಿರ್ಮಾಣಗೊಂಡು, ಅಮೆಜಾನ್ ಖರೀದಿಸಿದ ಸಿನಿಮಾಗಳನ್ನು ಉಚಿತವಾಗಿ ವೀಕ್ಷಿಸಲು ಅನುಮತಿ ನೀಡಲಿದೆ. ಈ ವಿಷಯವನ್ನು ಸ್ವತ: ಅಮೆಜಾನ್ ಸೋಶಿಯಲ್ ಮೀಡಿಯಾದಲ್ಲಿ ಶೇರ್ ಮಾಡಿದೆ. 5 ಸಿನಿಮಾಗಳನ್ನು ಫ್ರಿಯಾಗಿ ವೀಕ್ಷಣೆ ಮಾಡುವುದಾಗಿ ಹೇಳಿಕೊಂಡಿದೆ.

ಅಮೆಜಾನ್ ಪ್ರೈಮ್‌ನಲ್ಲಿ ಸಿನಿಮಾ ಫ್ರೀ

ಪುನೀತ್ ರಾಜ್‌ಕುಮಾರ್ ಪಿಆರ್‌ಕೆ ಬ್ಯಾನರ್‌ನಲ್ಲಿ ನಿರ್ಮಿಸಿದ ನಾಲ್ಕು ಸಿನಿಮಾ ಹಾಗೂ ಹೊಂಬಾಳೆ ಫಿಲಂಸ್‌ನ ಒಂದು ಚಿತ್ರವನ್ನು ಒಂದು ತಿಂಗಳು ಉಚಿತವಾಗಿ ನೋಡಬಹುದಾಗಿದೆ. ಹೇಮಂತ್ ರಾವ್ ನಿರ್ದೇಶನದಲ್ಲಿ ರಿಷಿ ನಟಿಸಿದ ಸಿನಿಮಾ ಕವಲುದಾರಿ, ವಸಿಷ್ಠ ಸಿಂಹ ಅಭಿನಯದ ಮಯಾಬಜಾರ್, ಪ್ರಜ್ವಲ್ ಪತ್ನಿ ರಾಗಿಣಿ ಅಭಿನಯದ ಲಾ ಹಾಗೂ ಪನ್ನಗ ಭರಣ ನಿರ್ದೇಶಿಸಿದ ದಾನಿಶ್ ಸೇಠ್ ಚಿತ್ರ ಫ್ರೆಂಚ್ ಬಿರಿಯಾನಿಯನ್ನು ಉಚಿತವಾಗಿ ನೋಡಬಹುದು. ಇದರೊಂದಿಗೆ ಯುವರತ್ನ ಕೂಡ ಫ್ರೀಯಾಗಿ ವೀಕ್ಷಿಸಬಹುದಾಗಿದೆ.

ಪುನೀತ್ ಹುಟ್ಟುಹಬ್ಬಕ್ಕೆ ಫ್ಯಾನ್ಸ್ ಸಜ್ಜು

ಮಾರ್ಚ್ 17ಕ್ಕೆ ಪವರ್‌ಸ್ಟಾರ್ ಪುನೀತ್ ರಾಜ್‌ಕುಮಾರ್ 47ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳಬೇಕಿತ್ತು. ಈ ಕಾರಣಕ್ಕೆ ಅಭಿಮಾನಿಗಳು ತಮ್ಮ ನೆಚ್ಚಿನ ನಟನ ನೆನಪಿಗಾಗಿ ಬರ್ತ್ ಡೇ ಆಚರಣೆ ಮಾಡಲು ಸಜ್ಜಾಗಿದ್ದಾರೆ. ಇದೇ ದಿನ ಪುನೀತ್ ನಟನೆಯ 'ಜೇಮ್ಸ್' ಸಿನಿಮಾ ಕೂಡ ಬಿಡುಗಡೆಯಾಗುತ್ತಿದ್ದು, ಅದ್ಧೂರಿ ಓಪನಿಂಗ್ ನೀಡಲು ಈಗಿನಿಂದಲೇ ಸಿದ್ಧತೆಗಳನ್ನು ಮಾಡಿಕೊಳ್ಳುತ್ತಿದ್ದಾರೆ.