ಒಟಿಟಿಗೆ ಸಾಯಿ ಪಲ್ಲವಿ 'ಗಾರ್ಗಿ'; ಯಾವಾಗ? ಎಲ್ಲಿಗೆ?

ಆಗಸ್ಟ್ 12ಕ್ಕೆ ಒಟಿಟಿಗೆ 'ಗಾರ್ಗಿ'

ಒಳ್ಳೆ ಪ್ರತಿಕ್ರಿಯೆ ಪಡೆದುಕೊಂಡರೂ ಪ್ರೇಕ್ಷಕರು ಥಿಯೇಟರ್‌ಗೆ ಬಂದು 'ಗಾರ್ಗಿ' ಸಿನಿಮಾ ನೋಡಲಿಲ್ಲ. ಆಗಸ್ಟ್ 12ರಂದು ಒಟಿಟಿಯಲ್ಲಿ ಸಿನಿಮಾ ಮೂಡಿ ಬರಲಿದೆ. ಸೋನಿ ಲಿವ್‌ ಡಿಜಿಟಲ್ ಫ್ಲಾಟ್‌ಫಾರ್ಮ್‌ನಲ್ಲಿ 'ಗಾರ್ಗಿ' ಕಥೆಯನ್ನು ನೋಡಬಹುದು.

'ಗಾರ್ಗಿ' ಒನ್‌ಲೈನ್ ಸ್ಟೋರಿ

ಆಕೆಯ ಹೆಸರು ಗಾರ್ಗಿ. ಮಧ್ಯಮ ವರ್ಗದ ಕುಟುಂಬದ ಹೆಣ್ಣು. ಶಾಲಾ ಶಿಕ್ಷಕಿಯ ಕೆಲಸ.ತಂದೆ ಅಪಾರ್ಟ್‌ಮೆಂಟ್‌ನಲ್ಲಿ ಸೆಕ್ಯುರಿಟಿ ಗಾರ್ಡ್. ಒಬ್ಬಳು ತಂಗಿ. ದೋಸೆ ಹಿಟ್ಟು ಮಾರಿ ಕುಟುಂಬ ನಡೆಸುವ ತಾಯಿ. ಎಲ್ಲವನ್ನು ಏಗಿಕೊಂಡು ಬದುಕುವ ಕುಟುಂಬದಲ್ಲಿ ಅದೊಂದು ಘಟನೆ ಅಲ್ಲೋಲ ಕಲ್ಲೋಲ ಸೃಷ್ಟಿಸಿಬಿಡುತ್ತೆ. ಮಾಡದ ತಪ್ಪಿಗೆ ತಂದೆ ಜೈಲು ಸೇರುವಂತಾಗುತ್ತದೆ. ನ್ಯಾಯಕ್ಕಾಗಿ ಕೋರ್ಟ್‌ ಮೆಟ್ಟಿಲೇರುವ 'ಗಾರ್ಗಿ' ತಂದೆಯನ್ನು ಬಿಡಿಸಿಕೊಂಡು ಬರಲು ಏನೆಲ್ಲಾ ಹೋರಾಟ ನಡೆಸುತ್ತಾಳೆ ಅನ್ನುವುದು ಸಿನಿಮಾ ಕಥೆ.

ಫಸ್ಟ್‌ ವೀಕೆಂಡ್‌ ಸಿನಿಮಾ ಗಳಿಕೆ?

ಕನ್ನಡ, ತೆಲುಗು, ತಮಿಳು ಭಾಷೆಗಳಲ್ಲಿ ರಿಲೀಸ್ ಆಗಿದ್ದ'ಗಾರ್ಗಿ' ಸಿನಿಮಾ ಫಸ್ಟ್ ವೀಕೆಂಡ್ ಗಳಿಸಿದ್ದು ಕೇವಲ 2.77 ಕೋಟಿ ರೂ. ಮಾತ್ರ. ಶುಕ್ರವಾರ 67 ಲಕ್ಷ ರೂ., ಶನಿವಾರ 98 ಲಕ್ಷ ರೂ. ಹಾಗೂ ಭಾನುವಾರ 1.12 ರೂ. ಅಷ್ಟೇ ಸಿನಿಮಾ ಕಲೆಕ್ಷನ್ ಮಾಡಿ ನಿರಾಸೆ ಮೂಡಿಸಿತ್ತು. ಲೇಡಿ ಪವರ್ ಸ್ಟಾರ್ ಖ್ಯಾತಿಯ ಸಾಯಿ ಪಲ್ಲವಿ ಕ್ರೇಜ್‌ಗೆ ಇದು ಬಹಳ ಕಮ್ಮಿ ಆಯಿತು.

ಸ್ವತಃ ಕನ್ನಡದಲ್ಲಿ ಸಾಯಿ ಪಲ್ಲವಿ ಡಬ್ಬಿಂಗ್

ಸಾಯಿ ಪಲ್ಲವಿ ಕನ್ನಡ ಕಲಿತು ತಮ್ಮ ಪಾತ್ರಕ್ಕೆ ತಾವೇ ಡಬ್ ಮಾಡಿದ್ದು, ಕನ್ನಡ ಪ್ರೇಕ್ಷಕರ ಗಮನ ಸೆಳೆದಿತ್ತು. ಕನ್ನಡದವರೇ ತಮ್ಮ ಪಾತ್ರಕ್ಕೆ ಡಬ್ ಮಾಡಲು ಹಿಂದು ಮುಂದು ನೋಡುವಾಗ ತಮಿಳು ನಟಿ ಅಂತಹ ಪ್ರಯತ್ನ ಮಾಡಿದ್ದು ವಿಶೇಷ. ನಿರ್ದೇಶಕಿ ಶೀತಲ್ ಶೆಟ್ಟಿ ಸಾಯಿ ಪಲ್ಲವಿಗೆ ಕನ್ನಡ ಕಲಿಸಿದ್ದರು.