Jr. ಎನ್‌ಟಿಆರ್ ಚಿತ್ರದಲ್ಲಿ ರುಕ್ಮಿಣಿ; ಕಂಡೀಷನ್ ಏನು?

By Narayan

| Published: Wednesday, November 27, 2024, 19:32 [IST]

ಬಘೀರ, ಭೈರತಿ ರಣಗಲ್ ಸಿನಿಮಾಗಳಲ್ಲಿ ನಟಿಸಿದ ರುಕ್ಮಿಣಿ ವಸಂತ್ ಮೋಡಿ ಮಾಡಿದ್ದಾರೆ. ನಿಧಾನವಾಗಿ ತೆಲುಗು, ತಮಿಳಿನಿಂದ ಹೆಚ್ಚು ಹೆಚ್ಚು ಅವಕಾಶಗಳು ಹುಡುಕಿ ಬರ್ತಿದೆ. ಜ್ಯೂ. ಎನ್‌ಟಿಆರ್ ಚಿತ್ರಕ್ಕೆ ಆಯ್ಕೆ ಆಗಿದ್ದಾರೆ ಎನ್ನುವ ಮಾತುಗಳು ಕೇಳಿಬರ್ತಿದೆ.

Rukmini Vasanth confirmed as female lead in NTR-Neel film

1/7

ಸ್ಯಾಂಡಲ್‌ವುಡ್ ಮಾತ್ರವಲ್ಲ ಪರಭಾಷೆಗಳಲ್ಲಿ ಕೂಡ ರುಕ್ಕು ಕ್ರೇಜ್ ಜೋರಾಗಿದೆ. 'ಸಪ್ತಸಾಗರದಾಚೆ ಎಲ್ಲೋ' ಸರಣಿ ಸಿನಿಮಾಗಳ ಬಳಿಕ ರುಕ್ಮಿಣಿ ನಟಿಸಿದ 3 ಸಿನಿಮಾಗಳು ತೆರೆಗೆ ಬಂದಿವೆ. 'ಬಾನ ದಾರಿಯಲಿ' ಚಿತ್ರದಲ್ಲಿ ಗಣಿಗೆ ಜೋಡಿ ಆಗಿದ್ದರು.

2/7

'ಬಘೀರ' ಚಿತ್ರದಲ್ಲಿ ಶ್ರೀಮುರಳಿಗೆ ಜೋಡಿಯಾಗಿ ನಟಿಸಿದ್ದಾರೆ. ಸದ್ಯ ಸಿನಿಮಾ ನೆಟ್‌ಫ್ಲಿಕ್ಸ್‌ಗೆ ಬಂದಿದ್ದು ಅಭಿಮಾನಿಗಳು ರುಕ್ಮಿಣಿ ಮೋಹ ಪಾಶಕ್ಕೆ ಸಿಲುಕಿದ್ದಾರೆ. ಇನ್ನು 'ಭೈರತಿ ರಣಗಲ್' ಚಿತ್ರದಲ್ಲಿ ಡಾಕ್ಟರ್ ವೈಶಾಲಿ ಪಾತ್ರದಲ್ಲಿ ಗಮನ ಸೆಳೆದಿದ್ದಾರೆ.

3/7

ತಮಿಳಿನ ಎರಡು ಚಿತ್ರಗಳಲ್ಲಿ ಈಗ ರುಕ್ಮಿಣಿ ವಸಂತ್ ಬಣ್ಣ ಹಚ್ಚಿದ್ದಾರೆ. ಶಿವಕಾರ್ತಿಕೇಯನ್ ಜೋಡಿಯಾಗಿ ಕಾಣಿಸಿಕೊಂಡಿದ್ದಾರೆ. ವಿಜಯ್ ಸೇತುಪತಿ ಜೊತೆಗೂ ತೆರೆ ಹಂಚಿಕೊಂಡಿದ್ದಾರೆ. ಇದೆಲ್ಲದರ ನಡುವೆ ಮತ್ತೆರಡು ಚಿತ್ರಗಳಿಗೆ ಆಕೆಯ ಹೆಸರು ಕೇಳಿಬರ್ತಿದೆ.

4/7

ತೆಲುಗಿನಲ್ಲಿ ಜ್ಯೂ. ಎನ್‌ಟಿಆರ್ ಜೊತೆ ಪ್ರಶಾಂತ್ ನೀಲ್ ಒಂದು ಸಿನಿಮಾ ಮಾಡ್ತಿದ್ದಾರೆ. ಚಿತ್ರಕ್ಕೆ 'ಡ್ಯ್ರಾಗನ್' ಎಂಬ ಟೈಟಲ್ ಫೈನಲ್ ಆಗುವ ಸಾಧ್ಯತೆ ಇದೆ. ಇದೇ ಚಿತ್ರದಲ್ಲಿ ರುಕ್ಮಿಣಿ ನಟಿಸುತ್ತಾರೆ ಎನ್ನಲಾಗ್ತಿದೆ. ಈ ಬಗ್ಗೆ ಆಕೆಗೆ ಹಿಂದೆ ಪ್ರಶ್ನೆ ಎದುರಾಗಿತ್ತು.

5/7

ನಾನು ಜ್ಯೂ. ಎನ್‌ಟಿಆರ್ ಚಿತ್ರಕ್ಕೆ ಆಯ್ಕೆ ಆಗಿರುವ ಬಗ್ಗೆ ನನಗೆ ಮಾಹಿತಿ ಇಲ್ಲ ಎಂದು ರುಕ್ಮಿಣಿ ಹೇಳಿದ್ದರು. ಆದರೆ ಅಂತಹ ಯಾವುದೇ ಚರ್ಚೆ ಆಗಿಲ್ಲ ಎಂದು ಆಕೆ ಹೇಳಿರಲಿಲ್ಲ. ಡಿಸೆಂಬರ್‌ನಲ್ಲಿ 'ಡ್ಯ್ರಾಗನ್' ಚಿತ್ರೀಕರಣದ ಶುರುವಾಗಲಿದೆ. ಆಕೆ ನಾಯಕಿಯಾಗಿ ನಟಿಸೋದು ಪಕ್ಕಾ ಎನ್ನಲಾಗ್ತಿದೆ.

6/7

'ಡ್ಯ್ರಾಗನ್' ಚಿತ್ರಕ್ಕಾಗಿ ಶೀಘ್ರದಲ್ಲೇ ರುಕ್ಮಿಣಿ ಲುಕ್ ಟೆಸ್ಟ್ ಮಾಡುತ್ತಾರೆ ಎನ್ನುವ ಮಾತುಗಳು ಕೇಳಿಬರ್ತಿದೆ. ಇನ್ನು ಈ ಸಿನಿಮಾ ಮುಗಿಯುವರೆಗೆ ಹೊಸ ಚಿತ್ರ ಒಪ್ಪಿಕೊಳ್ಳಬಾರದು ಎನ್ನುವ ಷರತ್ತು ಕೂಡ ಚಿತ್ರತಂಡ ವಿಧಿಸಿದೆ ಅಂತೆ. ಆದರೆ ಈ ಬಗ್ಗೆ ಖಚಿತ ಮಾಹಿತಿ ಇನ್ನಷ್ಟೆ ಬರಬೇಕಿದೆ.

7/7

ಈಗಾಗಲೇ ಪ್ರಶಾಂತ್ ನೀಲ್ ತೆಲುಗಿನಲ್ಲಿ 'ಸಲಾರ್' ಸಿನಿಮಾ ಮಾಡಿ ಗೆದ್ದಿದ್ದಾರೆ. ಬಳಿಕ ಸೀಕ್ವೆಲ್ ಕೂಡ ಮಾಡುತ್ತಿದ್ದಾರೆ. ನಂತರ 'ಡ್ಯ್ರಾಗನ್' ಸಿನಿಮಾ ಮೂಡಿ ಬರಲಿದೆ. ತಾರಕ್- ನೀಲ್ ಕಾಂಬಿನೇಷನ್ ಕುತೂಹಲ ಮೂಡಿಸಿದೆ. ಈ ಚಿತ್ರಕ್ಕೆ ರುಕ್ಮಿಣಿ ನಾಯಕಿ ಆಗಿ ಆಯ್ಕೆ ಆದರೆ ಅಭಿಮಾನಿಗಳಿಗೆ ಹಬ್ಬವೇ ಸರಿ. ದುಲ್ಕರ್ ಸಲ್ಮಾನ್ ಮುಂದಿನ ಚಿತ್ರಕ್ಕೂ ರುಕ್ಕು ನಾಯಕಿ ಎನ್ನಲಾಗ್ತಿದೆ.