ನಿಯಮ ಉಲ್ಲಂಘಿಸಿ ಚೆನ್ನೈನಿಂದ ಹೊರ ಹೋಗಿದ್ದಾರೆಯೇ ರಜನಿಕಾಂತ್?

ಫಾರ್ಮ್‌ ಹೌಸ್‌ನಲ್ಲಿ ರಜನಿ

ಚೆನ್ನೈನ ನಿವಾಸದಲ್ಲಿ ನೆಲೆಸಿದ್ದ ರಜನಿಕಾಂತ್, ಮಗಳು ಸೌಂದರ್ಯ, ಅಳಿಯ ವಿಶಾಗನ್ ವನಂಗಮುಡಿ ಮತ್ತು ಮೊಮ್ಮಗ ವೇದ್ ಕೃಷ್ಣ ಜತೆ ಚೆಂಗಲಪೆಟ್ಟು ಜಿಲ್ಲೆಯಲ್ಲಿರುವ ಕೆಳಂಬಕ್ಕಮ್‌ನ ಫಾರ್ಮ್‌ ಹೌಸ್‌ಗೆ ಕಾರ್‌ನಲ್ಲಿ ತೆರಳಿದ್ದರು. ಫಾರ್‌ ಹೌಸ್‌ನಲ್ಲಿ ಅವರು ವಾಯುವಿಹಾರ ಮಾಡುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡಿತ್ತು.

ಅಂತರ್ ಜಿಲ್ಲಾ ಪ್ರಯಾಣಕ್ಕೆ ಪಾಸ್ ಬೇಕು

ಈ ವಿಡಿಯೋ ನೋಡಿದ ನೆಟ್ಟಿಗರು, ಚೆನ್ನೈನಿಂದ ತೆರಳಲು ಅವರ ಕುಟುಂಬ ಇ-ಪಾಸ್ ಪಡೆದುಕೊಂಡಿತ್ತೇ? ಎಂದು ಅನುಮಾನ ವ್ಯಕ್ತಪಡಿಸಿದ್ದರು. ಚೆನ್ನೈನ ಹೊರವಲಯದಲ್ಲಿರುವ ಕೆಳಂಬಕ್ಕಂಗೆ ತೆರಳಲು ಇ-ಪಾಸ್ ಬೇಕಾಗಿದೆಯೇ ಎಂದು ಚೆನ್ನೈನ ಪಾಲಿಕೆ ಆಯುಕ್ತ ಜಿ. ಪ್ರಕಾಶ್ ಅವರನ್ನು ಪತ್ರಿಕಾಗೋಷ್ಠಿಯಲ್ಲಿ ಪ್ರಶ್ನಿಸಿದಾಗ ಒಂದು ಜಿಲ್ಲೆಯಿಂದ ಮತ್ತು ಜಿಲ್ಲೆಗೆ ಹೋಗಲು ಇ-ಪಾಸ್ ಅಗತ್ಯವಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.

ತನಿಖೆ ನಡೆಸಬೇಕಿದೆ

ರಜನಿಕಾಂತ್ ಮತ್ತು ಅವರ ಕುಟುಂಬ ಇ-ಪಾಸ್ ಪಡೆಯಲು ಅರ್ಜಿ ಸಲ್ಲಿಸಿತ್ತೇ ಎಂದು ಕೇಳಿದಾಗ, ಇದರ ಬಗ್ಗೆ ನಾವು ತನಿಖೆ ನಡೆಸಬೇಕಿದೆ. ನೀವು ಒಂದೆರಡು ಘಟನೆಗಳನ್ನು ಉಲ್ಲೇಖಿಸಿದರೆ ಈ ಬಗ್ಗೆ ವಿವರವಾದ ವಿಚಾರಣೆ ನಡೆಸಿ ಬಳಿಕ ಮಾಧ್ಯಮಗಳಿಗೆ ಮಾಹಿತಿ ನೀಡುತ್ತೇವೆ. ಈ ಪ್ರಕರಣದ ಬಗ್ಗೆ ನಿರ್ದಿಷ್ಟವಾಗಿ ಪರಿಶೀಲಿಸುತ್ತೇವೆ ಎಂದು ತಿಳಿಸಿದ್ದಾರೆ.

ಸೀಮಿತ ಇ-ಪಾಸ್

ತಮಿಳುನಾಡಿನಲ್ಲಿ ಜುಲೈ 31ರವರೆಗೂ ಲಾಕ್ ಡೌನ್ ಮುಂದುವರಿಯಲಿದ್ದು, ವೈದ್ಯಕೀಯ ತುರ್ತು ಸೇವೆ, ಮದುವೆ, ಅಂತ್ಯಸಂಸ್ಕಾರ ಮತ್ತು ಬೇರೆ ಬೇರೆ ಕಡೆಗಳಲ್ಲಿ ಸಿಲುಕಿರುವ ನಾಗರಿಕರಿಗೆ ಮಾತ್ರವೇ ಇ-ಪಾಸ್ ಸೌಲಭ್ಯ ನೀಡಲಾಗುತ್ತಿದೆ.