'ಡಿಜೆ ಟಿಲ್ಲು 2' ತೆಲುಗು ಸಿನಿಮಾದಿಂದ ನಟಿ ಶ್ರೀಲೀಲಾ ಔಟ್: ಕಾರಣವೇನು?

'ಡಿಜೆ ಟಿಲ್ಲು 2' ಸಿನಿಮಾದಿಂದ ಶ್ರೀಲೀಲಾ ಔಟ್?

ಶ್ರೀಲೀಲಾ ಕೈಯಲ್ಲಿರುವ ತೆಲುಗು ಸಿನಿಮಾಗಳ ಪೈಕಿ 'ಡಿಜೆ ಟಿಲ್ಲು 2' ಕೂಡ ಒಂದಾಗಿತ್ತು. ಈ ಹಿಂದೆ ತೆರೆಕಂಡಿದ್ದ 'ಡಿಜೆ ಟಿಲ್ಲು' ಚಾಪ್ಟರ್ 1 ಟಾಲಿವುಡ್‌ನಲ್ಲಿ ಸೆನ್ಸೇಷನ್ ಸೃಷ್ಟಿಸಿತ್ತು. ಫಸ್ಟ್ ಪಾರ್ಟ್‌ನಲ್ಲೂ ಕನ್ನಡದ ನಟಿಗೆ ಅವಕಾಶ ಸಿಕ್ಕಿತ್ತು. ನೇಹಾ ಶೆಟ್ಟಿ ಮೊದಲ ಪಾರ್ಟ್‌ನಲ್ಲಿ ನಾಯಕಿಯಾಗಿ ಕಾಣಿಸಿಕೊಂಡಿದ್ದರು. ಪಾರ್ಟ್‌ 2ನಲ್ಲಿ ಶ್ರೀಲೀಲಾ ಹೀರೊಯಿನ್ ಆಗಿ ಆಯ್ಕೆಯಾಗಿದ್ದರು. ಆದ್ರೀಗ ದಿಢೀರನೇ ಸಿನಿಮಾದಿಂದ ಹೊರಬಿದ್ದಿದ್ದಾರೆ ಅನ್ನೋ ಸುದ್ದಿ ಟಾಲಿವುಡ್‌ನಲ್ಲಿ ಹಲ್‌ಚಲ್ ಎಬ್ಬಿಸಿದೆ.

ಶ್ರೀಲೀಲಾ ಸಿನಿಮಾದಿಂದ ಔಟ್ ಆಗಿದ್ದೇಕೆ?

'ಡಿಜೆ ಟಿಲ್ಲು 2' ಸಿನಿಮಾದ ಶೂಟಿಂಗ್ ಈಗಾಗಲೇ ಶುರುವಾಗಿದೆ. ಕೆಲವು ದಿನಗಳು ಶೂಟಿಂಗ್ ಕೂಡ ನಡೆದಿದೆ. ಶ್ರೀಲೀಲಾ ಕೂಡ ಎರಡು ದಿನಗಳ ಕಾಲ ಚಿತ್ರೀಕರಣದಲ್ಲಿ ಭಾಗಿಯಾಗಿದ್ದರು. ಆದರೆ, ಸಿನಿಮಾ ತಂಡದೊಂದಿಗೆ ಹೊಂದಾಣಿಕೆಯಾಗದ ಹಿನ್ನೆಲೆಯಲ್ಲಿ ಸಿನಿಮಾದಿಂದ ಹೊರಬಂದಿದ್ದಾರೆ ಅನ್ನೋ ಸುದ್ದಿ ಹಲ್‌ಚಲ್ ಎಬ್ಬಿಸಿದೆ. ಆದರೆ, ಈ ಸಿನಿಮಾದಿಂದ ಶ್ರೀಲೀಲಾ ಹೊರಬರೋಕೆ ನಿಖರವಾದ ಕಾರಣವೇನು? ಅನ್ನೋದು ಇನ್ನೂ ತಿಳಿದು ಬಂದಿಲ್ಲ.

ಶ್ರೀಲೀಲಾ ವಿವಾದಗಳು

ಟಾಲಿವುಡ್‌ನಲ್ಲಿ ಹೆಚ್ಚಾಗಿ ಆಕ್ಟಿವ್ ಆಗಿರುವ ನಟಿ ಶ್ರೀಲೀಲಾ ವಿವಾದಗಳಿಗೇನು ಕಮ್ಮಿಯಿಲ್ಲ. ಆರಂಭದಿಂದಲೇ ಒಂದಲ್ಲ ವಿವಾದಗಳು ಇಲ್ಲವೇ ಬೇಡದ ಸುದ್ದಿಗಳು ಇವರನ್ನು ಸುತ್ತಿಕೊಳ್ಳುತ್ತಲೇ ಇವೆ. ಇತ್ತೀಚೆಗೆಷ್ಟೇ 7 ಸ್ಟಾರ್ ಹೋಟೆಲ್‌ನಲ್ಲಿ ಶ್ರೀಲೀಲಾ ಉಳಿದುಕೊಂಡಿರೋ ಐಶಾರಾಮಿ ರೂಮಿನ ಬಗ್ಗೆ ಟಾಲಿವುಡ್ ಮಾಧ್ಯಮಗಳು ವರದಿ ಮಾಡಿದ್ದರು. ಸಿನಿಮಾದ ಜೊತೆ ಜೊತೆಗೆ ಶ್ರೀಲೀಲಾ ನಾನಾ ಕಾರಣಕ್ಕೆ ಸುದ್ದಿಯಾಗುತ್ತಿದ್ದಾರೆ.

ಶ್ರೀಲೀಲಾ ಕೈಯಲ್ಲಿರೋ ಸಿನಿಮಾಗಳು

ಕೇವಲ 21 ವರ್ಷದ ನಟಿ ಶ್ರೀಲೀಲಾ ಟಾಲಿವುಡ್‌ನ ಬೇಡಿಕೆಯ ನಟಿ ಎನಿಸಿಕೊಳ್ಳುತ್ತಿದ್ದಾರೆ. ಮಾಸ್ ಮಹಾರಾಜ ರವಿತೇಜಾ ಸಿನಿಮಾ 'ಧಮಾಕಾ'ದಲ್ಲೂ ಶ್ರೀಲೀಲಾ ನಟಿಸುತ್ತಿದ್ದಾರೆ. ಬಾಲಕೃಷ್ಣ ಹಾಗೂ ಅನಿಲ್ ರವಿಪುಡಿ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಈ ಸಿನಿಮಾ ಶ್ರೀಲೀಲಾ ಬಾಲಯ್ಯನ ಮಗಳಾಗಿ ಕಾಣಿಸಿಕೊಳ್ಳಲಿದ್ದಾರೆ. 'ಉಪ್ಪೇನಾ' ಹೀರೊ ವೈಷ್ಣವ್ ತೇಜ್ ಸಿನಿಮಾಗೂ ನಾಯಕಿ. ಇದರೊಂದಿಗೆ ಜರ್ನಾರ್ಧನ ರೆಡ್ಡಿ ಪುತ್ರ ಕಿರೀಟಿ ನಟಿಸುತ್ತಿರುವ ಸಿನಿಮಾಗೂ ಶ್ರೀಲೀಲಾನೇ ನಾಯಕಿ. ಆದ್ರೀಗ ಕೈಯಲ್ಲಿದ ಸಿನಿಮಾಗಳಲ್ಲಿ ಒಂದರಿಂದ ಹೊರಬಂದಿದ್ದಾರೆ.