Adipurush Box Office:ಟಿಕೆಟ್ ಬೆಲೆ 150 ರೂ. ಮಾಡಿದ್ರು ಸಿನಿಮಾ ನೋಡ್ತಿಲ್ಲ:7ನೇ ದಿನವೂ ನೆಲಕ್ಕಚ್ಚಿದ 'ಆದಿಪುರುಷ್' ಕಲೆಕ್ಷನ್

ಪೌರಾಣಿಕ ಸಿನಿಮಾ 'ಆದಿಪುರುಷ್' ರಿಲೀಸ್ ಆದ ಮೊದಲ ದಿನವೇ ದಾಖಲೆ ಕಲೆಕ್ಷನ್ ಮಾಡಿತ್ತು. ಮೊದಲ ಮೂರು ದಿನ ಸಿನಿಮಾದ ಕಲೆಕ್ಷನ್ ಸೂಪರ್ ಆಗಿಯೇ ಇತ್ತು. ಆದರೆ, ಮೊದಲ ದಿನವೇ ಈ ಸಿನಿಮಾಗೆ ನೆಗೆಟಿವ್ ರಿವ್ಯೂ ಬಂದಿತ್ತು. ಅಲ್ಲಿಂದ ದಿನದಿಂದ ದಿನಕ್ಕೆ ಕಲೆಕ್ಷನ್‌ನಲ್ಲಿ ಡ್ರಾಪ್ ಆಗುತ್ತಲೇ ಇದೆ.

ದೇಶಾದ್ಯಂತ 'ಆದಿಪುರುಷ್' ಸಿನಿಮಾ ವಿರುದ್ಧ ಆಕ್ರೋಶ ವ್ಯಕ್ತವಾಗುತ್ತಿದೆ. ಕೆಲವರು ಸಿನಿಮಾವನ್ನು ಬ್ಯಾನ್ ಮಾಡುವಂತೆ ಕೇಂದ್ರ ಸರ್ಕಾರಕ್ಕೆ ಒತ್ತಡ ಹೇರುತ್ತಿದ್ದಾರೆ. ಕೆಲವೆಡೆ ಸಿನಿಮಾ ವಿರುದ್ಧ ಆಕ್ರೋಶ ವ್ಯಕ್ತವಾಗುತ್ತಿದೆ. ಇಷ್ಟೆಲ್ಲ ವಿವಾದಗಳಿಂದ ಸುತ್ತಿಕೊಂಡಿರೋ 'ಆದಿಪುರುಷ್' ಬಾಕ್ಸಾಫೀಸ್‌ನಲ್ಲಿ ಮುಳುಗುತ್ತಲೇ ಇದೆ.

ಆದಿಪುರುಷ್ ಅದ್ಭುತ ಕಲೆಕ್ಷನ್ ಅಂತ ಕಂಡಿದ್ದು ಮೊದಲ ಮೂರು ದಿನ ಮಾತ್ರ. ಇನ್ನು ಉಳಿದ ನಾಲ್ಕು ದಿನಗಳ ಗಳಿಕೆ ಅಷ್ಟಕ್ಕಷ್ಟೇ.. ಅದರಲ್ಲೂ 7ನೇ ದಿನವಂತೂ (ಜೂನ್ 22) ತೀರಾ ಕಡಿಮೆ ಕಲೆಕ್ಷನ್ ಆಗಿದೆ. ಹಾಗಿದ್ರೆ, 7ನೇ ದಿನದ ಕಲೆಕ್ಷನ್ ಎಷ್ಟು? ಥಿಯೇಟರ್‌ಗೆ ಎಷ್ಟು ಪರ್ಸೆಂಟ್ ಜನ ಬಂದಿದ್ರು? ಭಾರತದ ಕಲೆಕ್ಷನ್ ಎಷ್ಟು? ವಿಶ್ವದಾದ್ಯಂತ ಕಲೆಕ್ಷನ್ ಎಷ್ಟು? ಅನ್ನೋದನ್ನು ತಿಳಿಯಲು ಮುಂದೆ ಓದಿ..

ಟಿಕೆಟ್ ಬೆಲೆ 150ಕ್ಕೆ ಇಳಿಕೆ

'ಆದಿಪುರುಷ್' ಸಿನಿಮಾ ವಿವಾದಕ್ಕೆ ಸಿಕ್ಕಿಕೊಳ್ಳುತ್ತಿದ್ದಂತೆ ಚಿತ್ರತಂಡ ಎಚ್ಚೆತ್ತುಕೊಂಡಿತ್ತು. 500 ರಿಂದ 600 ಕೋಟಿ ರೂ. ಬಜೆಟ್‌ನಲ್ಲಿ ನಿರ್ಮಾಣಗೊಂಡಿರುವ ಈ ಸಿನಿಮಾ ಬಜೆಟ್ ರಿಕವರಿ ಮಾಡುವುದಕ್ಕೆ ಹರಸಾಹಸ ಪಡುತ್ತಿದೆ. ಹೀಗಾಗಿ ಹಿಂದಿ ಬೆಲ್ಟ್‌ಗಳಲ್ಲಿ ಈ ಸಿನಿಮಾದ ಟಿಕೆಟ್ ಬೆಲೆಯನ್ನು 150 ರೂ.ಗೆ ಇಳಿಸಲಾಗಿದೆ.

ಹೀಗಿದ್ದರೂ, 'ಆದಿಪುರುಷ್' ಸಿನಿಮಾ ನೋಡುವುದಕ್ಕೆ ಬರುವವರ ಸಂಖ್ಯೆ ಏನು ಹೆಚ್ಚಾಗಿಲ್ಲ. ಪ್ರಭಾಸ್ ಹಾಗೂ ಓಂ ರಾವುತ್ ಸಿನಿಮಾವನ್ನು ನೇರವಾಗಿ ಪ್ರೇಕ್ಷಕರು ತಿರಸ್ಕರಿಸಿದ್ದಾರೆ. ಹಿಂದಿ ಅಷ್ಟೇ ಅಲ್ಲ, ತೆಲುಗು, ತಮಿಳು, ಕನ್ನಡದಲ್ಲೂ ಈ ಸಿನಿಮಾ ನೋಡುವುದಕ್ಕೆ ಆಸಕ್ತಿ ತೋರುತ್ತಿಲ್ಲ. ಹೀಗಾಗಿ 7ನೇ ದಿನ ಅತೀ ಕಡಿಮೆ ಗಳಿಕೆಯನ್ನು ದಾಖಲಿಸಿದೆ.

'ಆದಿಪುರುಷ್' 7ನೇ ದಿನದ ಕಲೆಕ್ಷನ್ ಎಷ್ಟು?

'ಆದಿಪುರುಷ್' ಸಿನಿಮಾ ಬಾಕ್ಸಾಫೀಸ್ ಕಲೆಕ್ಷನ್ 6ನೇ ದಿನಕ್ಕೆ ಹೋಲಿಸಿದರೆ, 7ನೇ ದಿನ ಮತ್ತಷ್ಟು ಡ್ರಾಪ್ ಆಗಿದೆ. ನಿನ್ನೆ (ಜೂನ್ 22) ಈ ಸಿನಿಮಾ ಕಲೆಕ್ಷನ್ ಕೇವಲ 5.5 ಕೋಟಿ ರೂ. ಪ್ರಭಾಸ್ ಅಂತ ಪ್ಯಾನ್ ಇಂಡಿಯಾ ಸೂಪರ್‌ಸ್ಟಾರ್ ಅನ್ನು ಇಟ್ಟುಕೊಂಡು 7ನೇ ದಿನಕ್ಕೆ ಇಷ್ಟೊಂದು ಕಡಿಮೆ ಕಲೆಕ್ಷನ್ ಮಾಡಿದ್ದೂ ಟೀಕೆಗೆ ಗುರಿಯಾಗಿದೆ.

'ಆದಿಪುರುಷ್' ಬಾಕ್ಸಾಫೀಸ್‌ನಲ್ಲಿ ಹೊಸ ದಾಖಲೆ ಬರೆಯಬಹುದು ಅನ್ನೋ ಲೆಕ್ಕಾಚಾರ ಹಾಕಲಾಗಿತ್ತು. ಆದರೆ, ಅದೀಗ ಅದು ಮರೀಚಿಕೆ. 7ನೇ ದಿನದ ಕಲೆಕ್ಷನ್ ನೋಡಿದರೆ ಈಗಾಗಲೇ ಬಾಕ್ಸಾಫೀಸ್‌ನಲ್ಲಿ ದಾಖಲೆ ಬರೆದ ಸಿನಿಮಾಗಳನ್ನು ಹಿಂದಿಕ್ಕುವುದಿರಲಿ, ಸಮೀಪಕ್ಕೂ ಸುಳಿಯುವುದು ಅಸಾಧ್ಯ ಎನ್ನಲಾಗುತ್ತಿದೆ.

ಎಲ್ಲೆಲ್ಲಿ ಎಷ್ಟೆಷ್ಟು ಕಲೆಕ್ಷನ್?

'ಆದಿಪುರುಷ್' ಹಿಂದಿ ಬೆಲ್ಟ್‌ಗಳಲ್ಲಿ ಸಾಧಾರಣ ಕಲೆಕ್ಷನ್ ಮಾಡುತ್ತಿದೆ. 6ನೇ ದಿನ ಹಿಂದಿ ವರ್ಷನ್ ಸುಮಾರು 3.8 ಕೋಟಿ ರೂ. ಗಳಿಸಿತ್ತು. 7ನೇ ದಿನ ಇದು 3.15 ಕೋಟಿ ರೂ.ಗೆ ಡ್ರಾಪ್ ಆಗಿದೆ. ಈ ಮೂಲಕ ಭಾರತದಾದ್ಯಂತ ಕೇವಲ ಶೇ.10.17ರಷ್ಟು ಜನ ಮಾತ್ರ ಥಿಯೇಟರ್‌ಗೆ ಬಂದು ಸಿನಿಮಾ ನೋಡಿದ್ದಾರೆ.

7ನೇ ದಿನದ ಅಂತ್ಯಕ್ಕೆ ಭಾರತದ ಕಲೆಕ್ಷನ್ ಕೇವಲ 260.55 ಕೋಟಿ ರೂ. ಈಗ ಸದ್ಯಕ್ಕೆ ಆಗುತ್ತಿರುವ ಕಲೆಕ್ಷನ್ ನೋಡಿದರೆ, ಭಾರತದ ಬಾಕ್ಸಾಫೀಸ್‌ನಲ್ಲಿ 300 ಕೋಟಿ ಕ್ಲಬ್ ಸೇರುವುದು ಕೂಡ ಅನುಮಾನ ಎಂದು ಟ್ರೇಡ್ ಎಕ್ಸ್‌ಪರ್ಟ್‌ಗಳ ಲೆಕ್ಕಾಚಾರ. ಒಂದ್ವೇಳೆ ವೀಕೆಂಡ್‌ನಲ್ಲಿ ಸಿನಿಮಾ ಕಲೆಕ್ಷನ್‌ನಲ್ಲಿ ಏರಿಕೆಯಾದರೆ, ನಷ್ಟದಿಂದ ಪಾರಾಗಬಹುದು.

'ಆದಿಪುರುಷ್' ಕಲೆಕ್ಷನ್‌ನಲ್ಲಿ ಗೊಂದಲ

'ಆದಿಪುರುಷ್' ಕಲೆಕ್ಷನ್ ವಿಚಾರದಲ್ಲೂ ಗೊಂದಲವಿದೆ. ಟಿ ಸೀರಿಸ್ ಸಂಸ್ಥೆ ನಿನ್ನೆ (ಜೂನ್ 22) ವಿಶ್ವದಾದ್ಯಂತ 410 ಕೋಟಿ ರೂ. ಕಲೆಕ್ಷನ್ ಮಾಡಿದೆ ಎಂದು ಹೇಳಿಕೊಂಡಿತ್ತು. ಆದರೆ, ಟ್ರೇಡ್ ಎಕ್ಸ್‌ಪರ್ಟ್‌ಗಳ ಪ್ರಕಾರ, ಈ ಸಿನಿಮಾದ ಕಲೆಕ್ಷನ್ 370.15 ಕೋಟಿ ರೂ. ಹೀಗಾಗಿ ಯಾವುದು ಸತ್ಯ? ಅನ್ನೋದೇ ಗೊಂದಲಕ್ಕೆ ಎಡೆ ಮಾಡಿಕೊಟ್ಟಿದೆ.

'ಆದಿಪುರುಷ್' ಡೈಲಾಗ್‌ಗಳಲ್ಲಿ ಬದಲಾವಣೆ ಮಾಡಲಾಗಿತ್ತು. ಟಿಕೆಟ್ ದರವನ್ನು ಕಡಿತಗೊಳಿಸಲಾಗಿದೆ. ಹೀಗಿದ್ದರೂ, ಬಾಕ್ಸಾಫೀಸ್‌ನಲ್ಲಿ ಮಾತ್ರ ಏರಿಕೆ ಕಾಣುತ್ತಿಲ್ಲ. ಇದೇ ಮೊದಲ ಬಾರಿಗೆ ಪ್ರಭಾಸ್ ಸಿನಿಮಾ ವಿವಾದಕ್ಕೆ ಸಿಲುಕಿದ್ದು, ಕಲೆಕ್ಷನ್ ಮೇಲೆ ಎಲ್ಲರ ಕಣ್ಣು ಬಿದ್ದಿದೆ.