ಜಗನ್‌ಗೆ ಟಾಂಗ್ ಕೊಡಲು ಹಳೆ ವೈರಿಯನ್ನು ಹೊಗಳಿದ ಪವನ್ ಕಲ್ಯಾಣ್!

ತೆಲಂಗಾಣ ಸಿಎಂ ಕೆಸಿಆರ್ ಅನ್ನು ಟೀಕಿಸಿದ್ದ ಪವನ್

ಆದರೆ ಕೆಸಿಆರ್ ವಿರುದ್ಧ ಹಿಂದೊಮ್ಮೆ ಪವನ್ ಕಲ್ಯಾಣ್ ನಾಲಗೆ ಹರಿಬಿಟ್ಟಿದ್ದರು ಅದಕ್ಕೆ ಪ್ರತಿಯಾಗಿ ಕೆಸಿಆರ್ ಸಹ ಪವನ್ ಕಲ್ಯಾಣ್ ಅನ್ನು ಏಕವಚನದಲ್ಲಿ ಬೈದಿದ್ದರು. 2014ರಲ್ಲಿ ವಾರಂಗಲ್‌ನಲ್ಲಿ ಚುನಾವಣಾ ಪ್ರಚಾರ ಸಭೆಯಲ್ಲಿ ಮಾತನಾಡಿದ್ದ ಪವನ್ ಕಲ್ಯಾಣ್, ನನ್ನನ್ನು ಬೈಯ್ದರೆ ಪರವಾಗಿಲ್ಲ ಆದರೆ ದೇಶದ ಪ್ರಧಾನ ಮಂತ್ರಿ ಆಗುತ್ತಿರುವವನ್ನು ಬೈದರೆ ನಿನ್ನ ಹೊಡೆಯುತ್ತೇನೆ (ತಾಟ ತೀಸ್ತ) ಎಂದಿದ್ದರು.

ಚಿಟಿಕೆ ಹೊಡೆದರೆ ನೂರು ಹೋಳಾಗುತ್ತಾನೆ ಎಂದಿದ್ದ ಕೆಸಿಆರ್

ಪವನ್‌ ಕಲ್ಯಣ್‌ರ ಬಹಿರಂಗ ಬೆದರಿಕೆಗೆ ಪ್ರತಿಯಾಗಿ ಮಾತನಾಡಿದ್ದ ಕೆಸಿಆರ್, ''ಅವನು ಸಿನಿಮಾ ನಟನಾ, ನನಗಂತೂ ಗೊತ್ತಿಲ್ಲ. ತೆಲಂಗಾಣದಲ್ಲಿ ನಿಂತುಕೊಂಡು ನನಗೇ ಹೊಡೆಯುತ್ತೀನಿ ಅನ್ನುತ್ತಾನಲ್ಲ. ಒಂದು ಚಿಟಕೆ ಹೊಡೆದರೆ ನೂರು ಪೀಸ್ ಆಗಿಬಿಡುತ್ತಾನೆ, ಬಚ್ಚಾ ನನ್ನ ಮಗ ಎಂದಿದ್ದರು ಕೆಸಿಆರ್. ಮುಂದುವರೆದು, ಇಂಥಹಾ ಹತ್ತು ನಾಯಿಗಳು ಪ್ರತಿದಿನ ನನ್ನನ್ನು ಬೈದುಕೊಳ್ಳುತ್ತವೆ ಅದಕ್ಕೆಲ್ಲ ನಾನು ತಲೆ ಕೆಡಿಸಿಕೊಳ್ಳುವುದಿಲ್ಲ'' ಎಂದಿದ್ದರು.

ಕೆಸಿಆರ್ ಅನ್ನು ಹೊಗಳಿದ ಪವನ್ ಕಲ್ಯಾಣ್

ನಿನ್ನೆ ನಡೆದ ಕಾರ್ಯಕ್ರಮದಲ್ಲಿ ವರಸೆ ಬದಲಾಯಿಸಿಕೊಂಡ ಪವನ್ ಕಲ್ಯಾಣ್, ''ಚೆನ್ನೈನಲ್ಲಿ ಸ್ಥಿತವಾಗಿದ್ದ ತೆಲುಗು ಚಿತ್ರರಂಗವನ್ನು ಅವಿಭಜಿತ ಆಂಧ್ರದ ರಾಜಧಾನಿಯಾದ ಹೈದರಾಬಾದ್‌ಗೆ ತರುವ ಕಾರ್ಯವನ್ನು ಕೀರ್ತಿಶೇಷ ಚೆನ್ನಾರೆಡ್ಡಿ ಅಂಥಹಾ ಮಹನೀಯರು ಮಾಡಿದರು. ಇಂದಿನ ದಿನ ಮುಖ್ಯಮಂತ್ರಿ ಚಂದ್ರಶೇಖರ ರಾವ್ ಅವರು ಸಿನಿಮಾ ರಂಗವನ್ನು ಮುಂದಕ್ಕೆ ತೆಗೆದುಕೊಂಡು ಹೋಗುವ ಕಾರ್ಯ ಮಾಡುತ್ತಿದ್ದಾರೆ. ಚಿತ್ರರಂಗದೊಂದಿಗೆ ಸಹಯೋಗ ಸಾಧಿಸಿ ಚಿತ್ರರಂಗಕ್ಕೆ ಬೆಂಬಲವಾಗಿ ನಿಂತು ಅದಕ್ಕೆ ಹೆಗಲಿಗೆ ಹೆಗಲು ಕೊಡುವ ಕಾರ್ಯವನ್ನು ಅವರು ಮಾಡಿದ್ದಾರೆ. ಅದಕ್ಕೆ ನಾನು ಅವರಿಗೆ ಧನ್ಯವಾದ ಹೇಳುತ್ತೇನೆ'' ಎಂದರು.

ತೆಲಂಗಾಣ ಸರ್ಕಾರದ ಸಚಿವರನ್ನು ಹೊಗಳಿದ ಪವನ್ ಕಲ್ಯಾಣ್

ನಿನ್ನೆ ನಡೆದ ಕಾರ್ಯಕ್ರಮದಲ್ಲಿ ತೆಲಂಗಾಣ ಸರ್ಕಾರದ ಸಿನಿಮಾಟೊಗ್ರಫಿ ಸಚಿವ ತಲಸಾನಿ ಶ್ರೀನಿವಾಸ ಯಾದವ್ ಅವರು ಭಾಗವಹಿಸಿದ್ದರು. ಅವರನ್ನೂ ಸಹ ಹೊಗಳಿದ ಪವನ್ ಕಲ್ಯಾಣ್, ''ಚಿತ್ರರಂಗದ ಯಾರೇ ಅವರನ್ನು ಸಂಪರ್ಕಿಸಿದರೂ ಶೀಘ್ರವಾಗಿ ಸಹಾಯವನ್ನು ಅವರು ಮಾಡುತ್ತಿದ್ದಾರೆ ಅವರಿಗೂ ಧನ್ಯವಾದ ಹೇಳುತ್ತೇನೆ. ಸಿನಿಮಾ ರಂಗದಲ್ಲಿ ಲಾಭ ನಷ್ಟಗಳು, ಕಷ್ಟ ಸುಖಗಳು ಇರುತ್ತಾವೆ ಅವುಗಳನ್ನೆಲ್ಲ ಗಣನೆಗೆ ತೆಗೆದುಕೊಂಡು ಸಹಕಾರ ನೀಡುತ್ತಿರುವುದಕ್ಕೆ ಅವರಿಗೆ ಧನ್ಯವಾದ ಹೇಳುತ್ತೇನೆ'' ಎಂದರು.