ಪವನ್ ಕಲ್ಯಾಣ್ 'ಭೀಮ್ಲಾ ನಾಯಕ್' ಚಿತ್ರಕ್ಕೆ 10 ಕೋಟಿ ನಷ್ಟ: ಜಗನ್ ಸರ್ಕಾರದ ಮೇಲೆ ಫ್ಯಾನ್ಸ್ ಸಿಟ್ಟು

ಪವನ್ ಸಿನಿಮಾಗೆ 10 ಕೋಟಿ ನಷ್ಟ

ಪವನ್ ಕಲ್ಯಾಣ್ ಸಿನಿಮಾ ಬಾಕ್ಸಾಫೀಸ್‌ನಲ್ಲಿ ದಾಖಲೆ ಬರೆಯುತ್ತವೆ. ಇದುವರೆಗೆ ಬಿಡುಗಡೆಯಾದ ಒಂದೊಂದೂ ಸಿನಿಮಾನೂ ಬಾಕ್ಸಾಫೀಸ್ ರೆಕಾರ್ಡ್ ಮಾಡುತ್ತಲೇ ಇದೆ. ಆದರೆ, ಕಳೆದೆರಡು ಸಿನಿಮಾಗಳು ಮೊದಲ ದಿನದ ಕಲೆಕ್ಷನ್‌ನಲ್ಲಿ ಕೊಂಚ ಹಿನ್ನೆಡೆ ಅನುಭವಿಸಿವೆ. ಇದು ಪವರ್‌ಸ್ಟಾರ್ ಪವನ್ ಕಲ್ಯಾಣ್ ಅಭಿಮಾನಿಗಳನ್ನು ಕೆರಳಿಸಿದೆ. ಇದಕ್ಕೆ ಜಗನ್ ನೇತೃತ್ವದ ಆಂಧ್ರ ಸರ್ಕಾರ ತಂದಿರುವ ಹೊಸ ರೂಲ್ಸ್ ಕಾರಣವೆಂದು ಕಿಡಿಕಾರುತ್ತಿದ್ದಾರೆ. ಈ ನೀತಿಯಿಂದ 'ಭೀಮ್ಲಾ ನಾಯಕ್' ಸಿನಿಮಾಗೆ ಮೊದಲ ದಿನ ಕಮ್ಮಿ ಅಂದರೂ 10 ಕೋಟಿ ನಷ್ಟ ಆಗಿದೆ ಎನ್ನಲಾಗಿದೆ.

ಭೀಮ್ಲಾ ನಾಯಕ್ ನಷ್ಟಕ್ಕೆ ಕಾರಣವೇನು?

ಆಂಧ್ರ ಪ್ರದೇಶ ಸರ್ಕಾರ ಇತ್ತೀಚೆಗೆ ಹೊಸ ನಿಯಮವನ್ನು ಜಾರಿಗೆ ಗೊಳಿಸಿತ್ತು. ಬಿಗ್ ಬಜೆಟ್ ಸಿನಿಮಾಗಳು ಟಿಕೆಟ್ ದರವನ್ನು ಏರಿಕೆ ಮಾಡುವಂತಿಲ್ಲ. ಸರ್ಕಾರ ನಿಗದಿ ಪಡಿಸಿದ ದರದಲ್ಲೇ ಸಿನಿಮಾ ತೋರಿಸಬೇಕು. ಇದರೊಂದಿಗೆ ದಿನಕ್ಕೆ ನಾಲ್ಕು ಶೋಗಳನ್ನು ಮಾತ್ರ ಪ್ರದರ್ಶನ ಮಾಡಬೇಕು ಎಂದು ನಿಯಮ ವಿಧಿಸಿತ್ತು.ಇದರಿಂದ 'ಭೀಮ್ಲಾ ನಾಯಕ್' ಸಿನಿಮಾ ಮೊದಲ ದಿನ ಕೇವಲ ಶೇ. 80ರಷ್ಟು ಮಾತ್ರ ಗಳಿಕೆ ಕಂಡಿದೆ ಎನ್ನಲಾಗಿದೆ. ಹೀಗಾಗಿ ಮೊದಲ ದಿನವೇ 10 ಕೋಟಿ ಹೆಚ್ಚು ಗಳಿಕೆ ಕಾಣಬೇಕಿತ್ತು. ಅಲ್ಲಿ ಈ ಚಿತ್ರಕ್ಕೆ ನಷ್ಟ ಆಗಿದೆ ಎನ್ನಲಾಗಿದೆ.

ಫಸ್ಟ್ ಡೇ ಕಲೆಕ್ಷನ್ ಎಷ್ಟು?

ಭೀಮ್ಲಾ ನಾಯಕ್ ಸಿನಿಮಾ ಮೊದಲ ದಿನ ತೆಲುಗು ರಾಜ್ಯಗಳಲ್ಲಿ ಭರ್ಜರಿ ಬ್ಯಾಟಿಂಗ್ ಮಾಡಿದೆ. ಮೊದಲ ದಿನ 'ಭೀಮ್ಲಾ ನಾಯಕ್' ಗಳಿಸಿದ್ದು, ಬರೋಬ್ಬರಿ 37.3 ಕೋಟಿ ರೂಪಾಯಿ. ವಿಶ್ವದಾದ್ಯಂತ ಈ ಚಿತ್ರ ಗಳಿಸಿದ್ದು 50 ಕೋಟಿ ರೂಪಾಯಿ ಎಂದು ಅಂದಾಜಿಸಲಾಗಿದೆ. ಆಂಧ್ರ ಹಾಗೂ ತೆಲಂಗಾಣದಲ್ಲಿ ಗಳಿಸಿರುವ 37.3 ಕೋಟಿಗೆ ಇನ್ನೂ 10 ಹೆಚ್ಚು ಸೇರಬೇಕಿತ್ತು ಎಂಬುದು ಪವನ್ ಅಭಿಮಾನಿಗಳ ಆಕ್ರೋಶ. ಆಂಧ್ರ ಸಿಎಂ ಜಗನ್ ಹೊಸ ನೀತಿಯಿಂದ ನಿರ್ಮಾಪಕರಿಗೆ 10 ಕೋಟಿ ನಷ್ಟ ಆಗಿದೆ ಎನ್ನುವ ಮಾತು ಕೇಳಿಬರುತ್ತಿದೆ.

ತಮಿಳಿನಲ್ಲೂ ಭೀಮ್ಲಾ ನಾಯಕ್

'ಭೀಮ್ಲಾ ನಾಯಕ್' ಮಲಯಾಳಂ ಸಿನಿಮಾ ರಿಮೇಕ್. ಆಂಧ್ರದಲ್ಲಿ 'ಭೀಮ್ಲಾ ನಾಯಕ್' ಚಿತ್ರಕ್ಕೆ ಸಿಕ್ಕಿರುವ ಹೈಪ್ ನೋಡಿ ತಮಿಳಿನಲ್ಲಿಯೂ ಸಿನಿಮಾ ಮಾಡಲು ಸಜ್ಜಾಗಿದ್ದಾರೆ. ಮಲಯಾಳಂ ಸಿನಿಮಾ 'ಅಯ್ಯಪ್ಪನುಂ ಕೋಶಿಯುಂ' ಚಿತ್ರವನ್ನು ಯತಾವತ್ತಾಗಿ ತೆರೆಮೇಲೆ ತರಲು ನಿರ್ಧರಿಸಿದ್ದಾರೆ. ತಮಿಳಿನಲ್ಲಿ ಶರತ್ ಕುಮಾರ್ ಹಾಗೂ ಶಶಿಕುಮಾರ್ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈಗಾಗಲೇ ಈ ಸಿನಿಮಾಗೆ ಸಕಲ ಸಿದ್ಧತೆಗಳೂ ನಡೆಯುತ್ತಿವೆ.