ಕನ್ನಡದಲ್ಲಿ ಡೈಲಾಗ್ ಬಿಟ್ಟು 'ಗಾರ್ಗಿ' ಲುಕ್ ಕೊಟ್ಟ ಸಾಯಿ ಪಲ್ಲವಿ ಖದರ್‌ಗೆ ಕನ್ನಡಿಗರು ಫುಲ್ ಖುಷ್

'ಗಾರ್ಗಿ' ಸಾಯಿ ಪಲ್ಲವಿ ಹೊಸ ಸಿನಿಮಾ

ಸೌತ್ ಬ್ಯೂಟಿ ಸಾಯಿ ಪಲ್ಲವಿ ಹೊಸ ಸಿನಿಮಾ ಅನೌನ್ಸ್ ಆಗಿದೆ. ಆ ಸಿನಿಮಾದ ಟೈಟಲ್ 'ಗಾರ್ಗಿ'. ಸಾಯಿ ಪಲ್ಲವಿ ಬರ್ತ್‌ಡೇಗೆ ಅಂತ ರಿಲೀಸ್ ಮಾಡಿರುವ ಮೇಕಿಂಗ್ ವಿಡಿಯೋಗಳನ್ನು ನೋಡಿದರೆ, ಇದು ಪಕ್ಕಾ ಮಹಿಳಾ ಪ್ರಧಾನ ಸಿನಿಮಾ ಅನ್ನೋದನ್ನು ಹೇಳಬಹುದು. ಸೀರೆ, ಚೂಡಿದಾರದಲ್ಲಿ ಪಕ್ಕಾ ಭಾರತೀಯ ಮಹಿಳೆಯ ಅವತಾರವೆತ್ತಿರುವ ಸಾಯಿ ಪಲ್ಲವಿ ಪಾತ್ರದ ಬಗ್ಗೆ ಕುತೂಹಲ ಕೆರಳಿಸುತ್ತಿದೆ. ಗಾರ್ಗಿ ಸಿನಿಮಾ ಕನ್ನಡ, ತೆಲುಗು ಹಾಗೂ ತಮಿಳಿನಲ್ಲಿ ಬಿಡುಗಡೆಯಾಗಲಿದೆ.

ಕನ್ನಡದಲ್ಲಿ ಡಬ್ ಮಾಡಿದ ಸಾಯಿ ಪಲ್ಲವಿ

'ಗಾರ್ಗಿ' ಮೂರು ಭಾಷೆಯಲ್ಲಿ ಬಿಡುಗಡೆಯಾಗಲಿದೆ. ತಮಿಳು ಮೂಲ ಭಾಷೆಯಾಗಿದ್ದರೂ, ತೆಲುಗು ಹಾಗೂ ಕನ್ನಡದಲ್ಲೂ ಈ ಸಿನಿಮಾ ಬಿಡುಗಡೆಗಾಗಲಿದೆ. ಈ ಕಾರಣಕ್ಕೆ ಸ್ವತ: ಸಾಯಿ ಪಲ್ಲವಿ ಕನ್ನಡದಲ್ಲಿ ಇದೇ ಮೊದಲ ಬಾರಿಗೆ ಡಬ್ ಮಾಡಿದ್ದಾರೆ. ಕಷ್ಟ ಪಟ್ಟು ಕನ್ನಡದಲ್ಲಿ ಡಬ್ ಮಾಡಿದ ವಿಡಿಯೋವನ್ನು ಮೇಕಿಂಗ್ ವಿಡಿಯೋ ಮೂಲಕ ಶೇರ್ ಮಾಡಿಕೊಳ್ಳಲಾಗಿದೆ. "ನಾನು ಹೇಳುವುದು ಯಾವುದನ್ನೂ ಸೀರಿಯಸ್‌ ಆಗಿ ತಗೋಳೋದಿಲ್ಲ ಅಲ್ವಾ?" ಇದೊಂದು ಡೈಲಾಗ್ ಕನ್ನಡಿಗರ ದಿಲ್ ಖುಷ್‌ಗೆ ಕಾರಣವಾಗಿದೆ.

ಸಾಯಿ ಪಲ್ಲವಿ ಬಗ್ಗೆ ಕನ್ನಡಿಗರು ಏನಂದ್ರು?

ಕನ್ನಡದಲ್ಲಿ ಸಾಯಿ ಪಲ್ಲವಿ ಧ್ವನಿಯನ್ನು ಕೇಳಿ ಕನ್ನಡಿಗರು ಪುಲ್ ಖುಷಿಯಾಗಿದ್ದಾರೆ. ಕನ್ನಡದಲ್ಲಿ ಡಬ್ ಮಾಡುವುದಕ್ಕಾಗಿ ಸಾಯಿ ಪಲ್ಲವಿ ಹಾಕಿದ ಎಫರ್ಟ್‌ ಕಂಡು ಕನ್ನಡಿಗರು ಹಿರಿಹಿರಿ ಹಿಗ್ಗಿದ್ದಾರೆ. ಮೇಕಿಂಗ್ ವಿಡಿಯೋ ನೋಡಿ ಕಮೆಂಟ್‌ಗಳ ಮೇಲೆ ಕಮೆಂಟ್ ಮಾಡುತ್ತಿದ್ದಾರೆ. " ಸಾಯಿ ಪಲ್ಲವಿ ಕನ್ನಡದಲ್ಲೂ ಡಬ್ ಮಾಡಿದ್ದನ್ನು ನೋಡಿ ಖುಷಿಯಾಗಿದೆ. ಮೇಡಂ ನಿಮ್ಮ ಪ್ರಯತ್ನಕ್ಕೆ ನಿಮ್ಮ ಅಭಿನಂದನೆಗಳು. ನಾವೀಗ ಸಿನಿಮಾವನ್ನು ಎದುರು ನೋಡುತ್ತಿದ್ದೇವೆ." ಎಂದು ಒಬ್ಬರು ಕಮೆಂಟ್ ಮಾಡಿದ್ದಾರೆ. " ಕನ್ನಡಕ್ಕೆ ಡಬ್ ಆದ ಸಿನಿಮಾ ಅದ್ಭುತ ಅಂತ ಅನಿಸುತ್ತೆ." ಎಂದು ಇನ್ನೊಬ್ಬರು ಕಮೆಂಟ್ ಮಾಡಿದ್ದಾರೆ.

ಗಾರ್ಗಿ ಬಗ್ಗೆ ಸಾಯಿ ಪಲ್ಲವಿ ಹೇಳಿದ್ದೇನು?

'ಗಾರ್ಗಿ' ಸಿನಿಮಾ ಬಗ್ಗೆ ಸಾಯಿ ಪಲ್ಲವಿ ಟ್ವೀಟ್ ಮಾಡಿದ್ದು, ಅಭಿಮಾನಿಗಳಿಗೆ ಸಂದೇಶವನ್ನೂ ರವಾನಿಸಿದ್ದಾರೆ. " ಒಂದು ತಿಂಗಳಿನಿಂದ ಈ ಸಿನಿಮಾ ಬಗ್ಗೆ ಮಾತಾಡಲು ನಾನು ಕಾಯುತ್ತಿದ್ದೆ. ಕೊನೆಗೂ, ಹಠಮಾರಿ ತಂಡ ನನ್ನ ಹುಟ್ಟುಹಬ್ಬದಂದೇ ಇದನ್ನು ಬಿಡುಗಡೆ ಮಾಡಲು ನಿರ್ಧರಿಸಿದೆ. ನಾನೀಗ ಗಾರ್ಗಿಯನ್ನು ನಿಮ್ಮ ಮುಂದೆ ತರುತ್ತಿದ್ದೇನೆ. ಇದು ನಿರ್ದೇಶಕ ಗೌತಮ್ ರಾಮಚಂದ್ರನ್ ಅವರ ಬ್ರೈನ್ ಚೈಲ್ಡ್." ಎಂದು ಸಾಯಿ ಪಲ್ಲವಿ ಟ್ವೀಟ್ ಮಾಡಿದ್ದಾರೆ.