ಶಾಕುಂತಲೆ ರೂಪದಲ್ಲಿ ಸಮಂತಾ: ಅಲೌಕಿಕ ಸುಂದರಿ ಲುಕ್‌ಗೆ ಫ್ಯಾನ್ಸ್ ಫಿದಾ!

'ಶಾಕುಂತಲೆ' ರೂಪದಲ್ಲಿ ನಟಿ ಸಮಂತಾ ಸಂಚಲನ!

ನಟಿ ಸಮಂತಾ ಈ ಚಿತ್ರದಲ್ಲಿ ಶಾಕುಂತಲೆ ಪಾತ್ರ ಮಾಡುತ್ತಿದ್ದಾರೆ. ಸಮಂತಾ ಶಾಕುಂತಲೆ ರೂಪದಲ್ಲಿ ಹೇಗೆ ಕಾಣುತ್ತಾರೆ ಎನ್ನುವ ಕುತೂಹಲಗಳಿಗೆ ಫಸ್ಟ್ ಲುಕ್ ಬ್ರೇಕ್ ಹಾಕಿದೆ. ಪೋಸ್ಟರ್‌ನಲ್ಲಿ ಸಮಂತಾ ಬಿಳಿ ಬಣ್ಣದ ಪೌರಾಣಿಕ ಸಾಂಪ್ರದಾಯಿಕ ಉಡುಗೆ ತೊಟ್ಟಿದ್ದಾರೆ. ಅದಕ್ಕೆ ಹೂವಿನ ಅಲಂಕಾರವಿದೆ. ಜೊತೆಗೆ ಹೂವಿ ಆಭರಣಗಳನ್ನು ತೊಟ್ಟಿದ್ದಾರೆ. ಇನ್ನು ಶಾಕುಂತಲೆ ರೂಪದಲ್ಲಿ ಇರುವ ಸಮಂತಾ ಸುತ್ತಲು, ನವಿಲು, ಜಿಂಕೆ, ಮೊಲ, ಗಿಳಿ, ಬಾತುಕೋಳಿ ಇವೆ. ಕಾಡಿನ ಸುಂದರ ಪರಿಸರದಲ್ಲಿ ಅಲೌಕಿಕ ಸುಂದರಿ ಶಾಕುಂತಲೇ ದುಶ್ಯಂತನಿಗಾಗಿ ಕಾಯುತ್ತಿರುವ ಹಾಗೆ ಈ ಪೋಸ್ಟರ್ ಕಂಡು ಬಂದಿದೆ.

ಟ್ವೀಟ್ ಮಾಡಿ ಸಂತಸ ಹಂಚಿಕೊಂಡ ಸಮಂತಾ!

ನಟಿ ಸಮಂತಾ 'ಶಾಕುಂತಲಂ' ಚಿತ್ರದ ಫಸ್ಟ್ ಲುಕ್ ಪೋಸ್ಟರನ್ನು ತಮ್ಮ ಸಾಮಾಜಿಕ ಜಾಲತಾಣದ ಖಾತೆಗಳಲ್ಲಿ ಹಂಚಿಕೊಂಡಿದ್ದಾರೆ. ಪೋಸ್ಟ್ ಹಂಚಿಕೊಂಡು, ಶಾಕುಂತಲೆ ಪಾತ್ರದ ಬಗ್ಗೆ ಒಂದೆರಡು ಸಾಲುಗಳನ್ನು ಬರೆದುಕೊಂಡಿದ್ದಾರೆ. "ಪ್ರಸ್ತುತಪಡಿಸಲಾಗುತ್ತಿದ್ದೇವೆ 'ಶಾಕುಂತಲಂ' ಚಿತ್ರದಿಂದ, ಪ್ರಕೃತಿ ಪ್ರಿಯೆ, ಅಲೌಕಿಕ ಸುಂದರಿ ಮತ್ತು ಬಿಗುಮಾನದ ಶಾಕುಂತಲೆ" ಎಂದು ಬರೆದು ಚಿತ್ರದ ಫಸ್ಟ್ ಲುಕ್ ಪೋಸ್ಟ್ ಮಾಡಿದ್ದಾರೆ.

ಫಸ್ಟ್ ಲುಕ್‌ಗೆ ಸಕಾರಾತ್ಮಕ ಪ್ರತಿಕ್ರಿಯೆ!

'ಶಾಕುಂತಲಂ' ಚಿತ್ರದ ಫಸ್ಟ್ ಲುಕ್ ನೋಡುಗರ ಮನ ಸೆಳೆದಿದೆ. ಈ ಪೊಸ್ಟರ್ ರಿಲೀಸ್ ಆಗುತ್ತಲೇ ವೈರಲ್ ಆಗಿದೆ. ಪೊಸ್ಟರ್‌ಗೆ ಸಾಕಷ್ಟು ಮೆಚ್ಚುಗೆ ವ್ಯಕ್ತವಾಗಿದೆ. ಇದು ಹೊಸತನ ಹೊಂದಿರುವ ಪೊಸ್ಟರ್, ಸುಂದರವಾಗಿದೆ ಎನ್ನುವ ಅಭಿಪ್ರಾಯಗಳು ಸೋಷಿಯಲ್ ಮಿಡಿಯಾದಲ್ಲಿ ವ್ಯಕ್ತವಾಗಿದೆ. ಈ ಫಸ್ಟ್ ಲುಕ್ ಚಿತ್ರದ ಮೇಲಿನ ನಿರೀಕ್ಷೆ ಹೆಚ್ಚಿಸಿದ್ದು, ಸಿನಿಮಾ ರಿಲೀಸ್ ಯಾವಾಗ ಎನ್ನುವ ಪ್ರಶ್ನೆ ಚಿತ್ರತಂಡಕ್ಕೆ ಎದುರಾಗಿದೆ.

ದುಶ್ಯಂತ ಹಾಗೂ ಶಾಕುಂತಲೆ ಪ್ರೇಮ ಕತೆ ಇದು!

'ಶಾಕುಂತಲಂ' ಒಂದು ಪೌರಾಣಿಕ ಸಿನಿಮಾ. ಇದು ರಾಜ ದುಶ್ಯಂತ ಹಾಗೂ ಶಾಕುಂತಲೆ ಅವರ ಕಥೆ. ದೇವ್ ಮೋಹನ್ ಎಂಬುವವರು ರಾಜ ದುಶ್ಯಂತ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರೆ, ಶಾಕುಂತಲೆ ಪಾತ್ರದಲ್ಲಿ ಸಮಂತಾ ಕಾಣಿಸಿಕೊಂಡಿದ್ದಾರೆ. ಅಲ್ಲು ಅರ್ಜುನ್ ಪುತ್ರಿ ಅರ್ಹ ಈ ಸಿನಿಮಾ ಮೂಲಕ ಚಿತ್ರರಂಗ ಪ್ರವೇಶ ಮಾಡಿದ್ದು, ಭರತನ ಪಾತ್ರದಲ್ಲಿ ನಟಿಸಿದ್ದಾಳೆ. ಈ ಸಿನಿಮಾವನ್ನು ನೀಲಿಮಾ ಗುನಾ ನಿರ್ಮಾಣ ಮಾಡಿದ್ದಾರೆ, ಗುಣಶೇಖರ್ ಈ ಪೌರಾಣಿಕ ಚಿತ್ರದ ನಿರ್ದೇಶಕರು.