ನೀವು ಮಿಸ್ ಮಾಡದೇ ನೋಡಲೇಬೇಕಾದ ಯೋಗರಾಜ್ ಭಟ್ಟರ ಲವ್ 5 ಲವ್ ಸ್ಟೋರಿ ಸಿನಿಮಾಗಳಿವು!

ಗೋಲ್ಡನ್ ಸ್ಟಾರ್ ಗಣೇಶ್ ಹಾಗೂ ಪೂಜಾ ಗಾಂಧಿ ನಟನೆಯ 'ಮುಂಗಾರು ಮಳೆ' ಸ್ಯಾಂಡಲ್‌ವುಡ್‌ನ ಕ್ಲಾಸಿಕ್ ಲವ್ ಸ್ಟೋರಿ ಸಿನಿಮಾಗಳ್ಲೊಂದು. ಕನ್ನಡ ಚಿತ್ರರಂಗದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿದ್ದ ಈ ಚಿತ್ರದಲ್ಲಿ ಲವ್‌ಸ್ಟೋರಿ, ಎಮೋಷನ್, ಗಣೇಶ್ ಡೈಲಾಗ್ ಡೆಲವರಿಯಂತೂ ಸಿಕ್ಕಾಪಟ್ಟೆ ಗಮನ ಸೆಳೆದಿತ್ತು. ಚಿತ್ರದಲ್ಲಿನ ಲವ್‌ಸ್ಟೋರಿ ಪ್ರೇಕ್ಷಕರನ್ನು ಎರಡ್ಮೂರು ಥಿಯೇಟರ್‌ಗೆ ಬರುವಂತೆ ಮಾಡಿತ್ತು. ಸಿನಿಮಾದಲ್ಲಿನ ಪ್ರತಿಯೊಂದು ಹಾಡುಗಳು & ಡೈಲಾಗ್‌ಗಳು ಸೂಪರ್ ಹಿಟ್ ಆಗಿದ್ದವು. ಇನ್ನೆಷ್ಟೇ ವರ್ಷ ಕಳೆದರೂ ಮುಂಗಾರು ಮಳೆ ಸಿನಿಮಾಗಿರುವ ಕ್ರೇಜ್ ಕಡಿಮೆಯಾಗಲ್ಲ.

2009ರಲ್ಲಿ ಬಿಡುಗಡೆಯಾದ  'ಮನಸಾರೆ' ಸಿನಿಮಾದಲ್ಲಿ ದೂದ್ ಪೇಡ ದಿಗಂತ್ ನಾಯಕನಾಗಿ ಹಾಗೂ ಐಂದ್ರಿತಾ ರೇ ನಾಯಕಿಯಾಗಿ ನಟಿಸಿದ್ದರು. ಈ ಚಿತ್ರದ ಮೂಲಕ ಯೋಗರಾಜ್ ಭಟ್ಟರು ಮನಸ್ಸಿಗೆ ಸಂಬಂಧಿಸಿದ ವಿಷಯವನ್ನು ಅತ್ಯಂತ ಸೂಕ್ಷ್ಮವಾಗಿ ಮತ್ತು ನವಿರಾದ ಹಾಸ್ಯದಿಂದ  ಅತ್ಯಂತ ಸಮರ್ಥವಾಗಿ ಪರದೆಯ ಮೇಲೆ ತಂದಿದ್ದರು. ಈ ಸಿನಿಮಾದ ಪ್ರತಿಯೊಂದು ಹಾಡುಗಳು ಹಿಟ್ ಆಗಿದ್ದು, ಸಿನಿಮಾ ಕೂಡ ಪ್ರೇಕ್ಷಕರ ಮನಗೆಲ್ಲುವಲ್ಲಿ ಯಶಸ್ವಿಯಾಗಿತ್ತು.

ಗೋಲ್ಡನ್ ಸ್ಟಾರ್ ಗಣೇಶ್, ದೂದ್ ಪೇಡ ದಿಗಂತ್ ಮಂಚಾಲೆ ಹಾಗೂ ರಾಜೇಶ್ ಕೃಷ್ಣನ್ ಮೂವರ ಸಂಗಮದಲ್ಲಿ ಬಂದಿದ್ದ 'ಗಾಳಿಪಟ' ಚಿತ್ರವು ಆ ಕಾಲದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿತ್ತು. 2008ರಲ್ಲಿ ಬಿಡುಗಡೆಯಾದ ಗಾಳಿಪಟ ಸಿನಿಮಾದಲ್ಲಿ ಡೈಸಿ ಬೋಪಣ್ಣ, ನೀತು ಹಾಗೂ ಭಾವನಾ ರಾವ್ ನಾಯಕಿರಾಗಿ ನಟಿಸಿದ್ದರು. ಚಿತ್ರದಲ್ಲಿ ಮೂವರು ಸ್ನೇಹಿತರ ಸುಂದರ ಕಥೆ, ಕಾಮಿಡಿ, ಲವ್‌ಸ್ಟೋರಿ ಮತ್ತು ಸೊಗಸಾದ ಹಾಡುಗಳು ಪ್ರೇಕ್ಷಕರ ಮನಗೆಲ್ಲುವಲ್ಲಿ ಯಶಸ್ವಿಯಾಗಿತ್ತು. ಗಾಳಿಪಟ ಸಿನಿಮಾ ಇಂದಿಗೂ ಹಲವರ ಫೇವರಿಟ್. ಯಾವಾಗ ಬೇಜಾರಾದರೂ ಈ ಸಿನಿಮಾವನ್ನು ನೋಡಬಹುದು.

2010ರಲ್ಲಿ ತೆರೆಗೆ ಬಂದ ಪಂಚರಂಗಿ ಸಿನಿಮಾವನ್ನು ಕೂಡ ಯೋಗರಾಜ್ ಭಟ್ಟರೇ ನಿರ್ದೇಶನ ಮಾಡಿದ್ದರು. ಈ ಚಿತ್ರದಲ್ಲಿ ದಿಗಂತ್ ನಾಯಕನಾಗಿ ಮತ್ತು ನಿಧಿ ಸುಬ್ಬಯ್ಯ ನಾಯಕಿಯಾಗಿ ಮುಖ್ಯ ಪಾತ್ರದಲ್ಲಿ ಅಭಿನಯಿಸಿದ್ದರು. ಪ್ರಿಯಾಂಕ ತ್ರಿವೇದಿ, ಅನಂತ್ ನಾಗ್, ರಾಜು ತಾಳಿಕೋಟೆ, ಸುಂದರ್ ರಾಜ್, ಪದ್ಮಜಾ ರಾವ್, ಸುಧಾ ಬೆಳವಾಡಿ, ರಮ್ಯ ಬರ್ನ, ನಾಗಶೇಖರ್, ಸತೀಶ್ ನೀನಾಸಂ ಮೊದಲಾದವರ ತಾರ ಬಳಗವೇ ಚಿತ್ರದಲ್ಲಿತ್ತು. ಈ ಸಿನಿಮಾದಲ್ಲಿ ಅನಂತ್ ನಾಗ್ ವಿಭಿನ್ನ ಪಾತ್ರ ಮಾಡಿದ್ದರು, ಚಿತ್ರ ಗಲ್ಲಾಪೆಟ್ಟಿಗೆಯಲ್ಲಿ ಯಶಸ್ಸು ಗಳಿಸಿತ್ತು.

ಅಪ್ಪು ಅಭಿನಯದ 'ಪರಮಾತ್ಮ' ಇಂದಿಗೂ ಅನೇಕರ ಫೇವರಿಟ್ ಅಂದರೆ ತಪ್ಪಾಗಲ್ಲ. ಪರಮಾತ್ಮ ಇದು ಕೇವಲ ಒಂದು ಚಿತ್ರವಲ್ಲ ಎಮೋಷನ್ ಎಂದು ಹೇಳುವವರೇ ಹೆಚ್ಚಿದ್ದಾರೆ. ಯೋಗರಾಜ್ ಭಟ್ ನಿರ್ದೇಶನದ ಈ ಸಿನಿಮಾದ ಒಂದೊಂದು ಹಾಡುಗಳು ಕೂಡ ಅದ್ಭುತವಾಗಿದ್ದು, ಜನರ ಮನಸಲ್ಲಿ ಅಚ್ಚಳಿಯದೇ ಉಳಿದಿವೆ. ಚಿತ್ರದ ಡೈಲಾಗ್‌ಗಳು, ಸಂಭಾಷಣೆ, ಅನಿರೀಕ್ಷಿತ ಕ್ಲೈಮ್ಯಾಕ್ಸ್ ಎಲ್ಲವೂ ಸಖತ್ ಆಗಿದ್ದವು. ಆದರೆ, ಪರಮಾತ್ಮ ಥಿಯೇಟರ್‌ಗಳಲ್ಲಿ ಓಡಲಿಲ್ಲ. ಚಿತ್ರ ಬಿಡುಗಡೆಯಾದಾಗ ಅದಕ್ಕೆ ಸಿಗಬೇಕಿದ್ದ ಪ್ರಶಂಸೆ ಮತ್ತು ಯಶಸ್ಸು ಸಿಗದೇ ನಂತರದ ದಿನಗಳಲ್ಲಿ ಆ ಚಿತ್ರದ ಬೆಲೆ ಜನರಿಗೆ ಅರ್ಥವಾಗಿ ಇದೊಂದು 'ಮೋಸ್ಟ್ ಅಂಡರ್‌ರೇಟೆಡ್ ಸಿನಿಮಾ ಗುರು ಜನ ನೋಡಲಿಲ್ಲ ಅಷ್ಟೇ' ಎನಿಸಿಕೊಳ್ಳುವ ಚಿತ್ರಗಳಿವೆ. ಅದೇ ಸಾಲಿಗೆ ಪರಮಾತ್ಮ ಸಿನಿಮಾ ಕೂಡ ಸೇರುತ್ತೆ.