ಎಲ್ಲಾ ಕಾಲಕ್ಕೂ ಸಲ್ಲುವ 'ಆಚಾರ್ & ಕೋ' ಸಿನಿಮಾವನ್ನು ಈ ಐದು ಕಾರಣಕ್ಕೆ ನೀವು ನೋಡಲೇಬೇಕು!

ಇಂದಿನ ಕಾಲದ ಕಮರ್ಶಿಯಲ್ ಸಿನಿಮಾಗಳನ್ನು ಮಾಡುವುದು ಅಷ್ಟೇನು ಕಷ್ಟದ ಕೆಲಸವಲ್ಲ. ಆದರೆ, 60ರ ದಶಕದ ಕಥೆಯನ್ನು ತೆರೆಮೇಲೆ ತರುವುದು ನಿಜಕ್ಕೂ ಸಹ ಚಾಲೆಂಜಿಂಗ್. ರೆಟ್ರೋ ಸ್ಟೈಲ್ ಸಿನಿಮಾ ಮಾಡುವುದು ನಿಜಕ್ಕೂ ಸವಾಲಿನ ಕೆಲಸ. ನಿರ್ದೇಶಕಿ ಸಿಂಧು ಶ್ರೀನಿವಾಸ್ ಮೊದಲ ಬಾರಿಗೆ ಇಂತಹ ಪ್ರಯತ್ನ ಮಾಡಿ, ಅದರಲ್ಲಿ ಸೂಪರ್ ಸಕ್ಸಸ್ ಕಂಡಿದ್ದಾರೆ. ಬಹಳ ನೀಟ್ ಹಾಗೂ ಫೀಲ್‌ ಗುಡ್ ಸಿನಿಮಾ ಮಾಡಿ ಗಮನ ಸೆಳೆದಿದ್ದಾರೆ. ಪ್ರತಿಯೊಂದು ವಿಚಾರದ ಬಗ್ಗೆ ಬಹಳ ರೀಸರ್ಚ್ ಮಾಡಿ, ಎಲ್ಲೂ ಮಿಸ್ ಆಗದಂತೆ ಸಿನಿರಸಿಕರನ್ನು 65 ವರ್ಷ ಹಿಂದಕ್ಕೆ ಕರೆದುಕೊಂಡು ಹೋಗುತ್ತಾರೆ.

ಬೆಂಗಳೂರಿನ ಜಯನಗರ ನಿವಾಸಿ ಸಿವಿಲ್ ಇಂಜಿನಿಯರ್ ಮಧುಸೂದನ್ ಆಚಾರ್. ಆತನ ಧರ್ಮಪತ್ನಿ ಸಾವಿತ್ರಿ ಆಚಾರ್. ಈ ದಂಪತಿಗೆ ಮೂವರು ಗಂಡು ಮಕ್ಕಳು ಹಾಗೂ 7 ಜನ ಹೆಣ್ಣುಮಕ್ಕಳು ಸೇರಿ ಒಟ್ಟು 10 ಮಕ್ಕಳು.  ತಮ್ಮ ಮೂವರು ಗಂಡುಮಕ್ಕಳು ಕೂಡ ಇಂಜಿನಿಯರ್ ಆಗ್ಬೇಕು ಅನ್ನೋದು ಮಧುಸೂದನ್ ಆಸೆಯಾಗಿರುತ್ತೆ. ಮಕ್ಕಳನ್ನು ಬಹಳ ಸುಸಂಸ್ಕೃತರನ್ನಾಗಿ ಬೆಳೆಸುವ ಹಠ ಅವರದ್ದು. ಆದರೆ, ಅದರಿಂದ ಹೊರಬಂದು ತಮ್ಮಿಷ್ಟದಂತೆ ಇರಬೇಕೆಂಬುದು ಮಕ್ಕಳ ಹಠ. ಈ ನಡುವೆ ಇದ್ದಕ್ಕಿದ್ದಂತೆ ಮಧುಸೂದನ್ ಆಚಾರ್ ಒಂದು ದಿನ ಕೊನೆಯುಸಿರೆಳೆಯುತ್ತಾರೆ. ಪತಿಯ ಅಗಲಿಗೆಯ ನಂತರ ಸಾವಿತ್ರಿ ದೇವರ ಧ್ಯಾನದಲ್ಲಿ ಮುಳುಗುತ್ತಾರೆ. ಮನೆಗೆ ಆಧಾರಸ್ತಂಭವಾಗಿದ್ದ ಅಪ್ಪ ನಿಧನರಾದ ಬಳಿಕ ಮಕ್ಕಳೇ ಎಲ್ಲಾ ಜವಾಬ್ದಾರಿಯನ್ನು ವಹಿಸಿಕೊಳ್ಳಬೇಕಾಗುತ್ತದೆ. ತಮ್ಮ ಕನಸುಗಳನ್ನು ಬದಿಗಿಟ್ಟು ಮನೆಗಾಗಿ ದುಡಿಯಬೇಕಾದ ಅನಿವಾರ್ಯತೆ ಎದುರಾಗುತ್ತೆ. ಆ ಹಾದಿಯಲ್ಲಿ ಏನೆಲ್ಲಾ ಆಗುತ್ತೆ? ಎಂಬುದನ್ನು ಈ ಸಿನಿಮಾದಲ್ಲಿ ಹಾಸ್ಯಲೇಪನದೊಂದಿಗೆ ಕಟ್ಟಿಕೊಡಲಾಗಿದೆ. 

ಆಚಾರ್ & ಕೋ ಸಿನಿಮಾದಲ್ಲಿ 60ರ ದಶಕದ ಕಥೆ ಇದ್ದರೂ ಇದು ಎಲ್ಲ ಕಾಲಕ್ಕೂ ಸಲ್ಲುವಂತಹದ್ದು. ಅಂದಿಗೂ, ಇಂದಿಗೂ, ಎಂದಿಗೂ ಇರುವಂತಹ ಕೆಲ ಸಮಸ್ಯೆಗಳ ಬಗ್ಗೆ ಈ ಚಿತ್ರದಲ್ಲಿ ಚರ್ಚಿಸಲಾಗಿದೆ. ಎಲ್ಲೂ ಸಹ ಬೋರ್ ಹೊಡೆಸದಂತೆ, ಭಾಷಣದಂತೆಯೂ ಭಾಸವಾಗದಂತೆ ಮನೋರಂಜನೆ ಜೊತೆಗೆ ಚರ್ಚಿಸುವಂತ, ಥಿಯೇಟರ್‌ನಿಂದ ಹೊತ್ತು ತರುವಂತಹ ಅಂಶಗಳು ಕೂಡ ಚಿತ್ರದಲ್ಲಿವೆ. ಇನ್ನು ಸ್ತ್ರೀಶಕ್ತಿಯ ಸಬಲೀಕರಣದ ವಿಚಾರವೂ ಚಿತ್ರದಲ್ಲಿ ಚರ್ಚಿಸಲಾಗಿದೆ. 60 ವರ್ಷ ಹಿಂದೆ ಹೋಗಿ ಅಂದಿನ ಸಮಾಜ, ಜನ, ರೀತಿ ರಿವಾಜು, ಕಟ್ಟುಪಾಡು ಎಲ್ಲವನ್ನು ಕೆದಕಿ ನೋಡುವ ಪ್ರಯತ್ನವನ್ನು ಈ ಸಿನಿಮಾದಲ್ಲಿ ಮಾಡಲಾಗಿದೆ.

ಆಚಾರ್ & ಕೋ ಚಿತ್ರದಲ್ಲಿ ನಟ ಅಶೋಕ್ ಗಂಭೀರ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಕೆಲವೇ ಹೊತ್ತು ಅವರು ತೆರೆಮೇಲೆ ಕಾಣಿಸಿಕೊಂಡರೂ ಅವರ ಅಭಿನಯ ಸಖತ್ ಇಷ್ಟವಾಗುತ್ತದೆ. ಇನ್ನು, ನಿರ್ದೇಶಕಿ ಸಿಂಧು ಕೂಡ ಸುಮಾ ಎಂಬ ಪಾತ್ರದಲ್ಲಿ ಇಷ್ಟವಾಗುತ್ತಾರೆ. ಮದುವೆ ಆಗಿ ಲಂಡನ್‌ಗೆ ಹೋಗುವ ಕನಸು ಕಾಣುವ ಮಧ್ಯಮ ವರ್ಗದ ಕುಟುಂಬದ ಹುಡುಗಿಯಾಗಿ ಅವರು ಇಷ್ಟವಾಗುತ್ತಾರೆ. ಇನ್ನುಳಿದಂತೆ ಎಲ್ಲರೂ ಕೂಡ ತಮ್ಮ ತಮ್ಮ ಪಾತ್ರಗಳಿಗೆ ನ್ಯಾಯ ಸಲ್ಲಿಸಿದ್ದಾರೆ. 

ಒಂದು ಕೂಡು ಕುಟುಂಬದ ಕಥೆ ಆಚಾರ್ & ಕೋ ಚಿತ್ರದಲ್ಲಿದೆ. ಯಾವುದೇ ರಕ್ತಪಾತ, ಐಟಂ ಸಾಂಗ್, ಆಕ್ಷನ್ ಸನ್ನಿವೇಶ, ಬಿಲ್ಡಪ್ ಸೀನ್‌ಗಳು ಈ ಚಿತ್ರದಲ್ಲಿಲ್ಲ. ಒಂದೊಳ್ಳೆ ಕಥೆ, ಸೊಗಸಾದ ನಿರೂಪಣೆ, ಒಂದಷ್ಟು ಭಾವನಾತ್ಮಕ ಸನ್ನಿವೇಶಗಳು, ಇನ್ನುಳಿದಂತೆ ಫ್ಯಾಮಿಲಿ ಡ್ರಾಮಾ, ಹಾಸ್ಯ ಗಮನ ಸೆಳೆಯುತ್ತವೆ. ಕಥೆಗೆ ಬೇಕಾಗಿದ್ದನ್ನೆಲ್ಲಾ ಕೊಟ್ಟು ಅಶ್ವಿನಿ ಪುನೀತ್ ರಾಜ್‌ಕುಮಾರ್ ಒಂದು ಸದಭಿರುಚಿ ಸಿನಿಮಾ ನಿರ್ಮಿಸಿದ್ದಾರೆ. ಕಾಸ್ಟ್ಯೂಮ್ಸ್ ಹಾಗೂ ಲುಕ್ಸ್ ವಿಚಾರದಲ್ಲೂ ಚಿತ್ರತಂಡ ಬಹಳ ಹೋಂವರ್ಕ್ ಮಾಡಿಕೊಂಡಿರುವುದು ಸಿನಿಮಾದಲ್ಲಿ ಗೊತ್ತಾಗುತ್ತದೆ.