ಹ್ಯಾಪಿ ಬರ್ತಡೇ: ರಮ್ಯಾ ಕೃಷ್ಣನ್ ನಟನೆಯ ಟಾಪ್‌ 5 ಕನ್ನಡ ಸಿನಿಮಾಗಳ ಪಟ್ಟಿ ಇಲ್ಲಿದೆ.

ರಮ್ಯಾ ಕೃಷ್ಣನ್ 1988ರಲ್ಲಿ 'ಕೃಷ್ಣ ರುಕ್ಮಿಣಿ' ಸಿನಿಮಾ ಮೂಲಕ ಕನ್ನಡ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟರು. ಈ ಸಿನಿಮಾದಲ್ಲಿ ಸಾಹಸಸಿಂಹ ವಿಷ್ಣುವರ್ಧನ್ ಅವರಿಗೆ ನಾಯಕಿಯಾಗಿದ್ದರು. ಇದೊಂದು ಪ್ರೇಮಕಥೆ ಹೊಂದಿದ್ದ ಸಿನಿಮಾವಾಗಿದ್ದು, ರಮ್ಯಾ 'ರುಕ್ಮಿಣಿ'ಯಾಗಿ ನಟಿಸಿದ್ದರು. ಚಿತ್ರದಲ್ಲಿ ನೃತ್ಯಗಾರ್ತಿಯಾದ ರುಕ್ಮಿಣಿ ಪ್ರವಾಸ ಮಾರ್ಗದರ್ಶಿ ಕೃಷ್ಣನ ಪ್ರೀತಿಯಲ್ಲಿ ಬೀಳುತ್ತಾಳೆ. ಇವರಿಬ್ಬರ ಪ್ರೀತಿಗೆ ರುಕ್ಮಿಣಿ ಮನೆಯವರು ವಿರೋಧ ವ್ಯಕ್ತಪಡಿಸುತ್ತಾರೆ. ಮುಂದೇನಾಗುತ್ತದೆ ಎಂಬುದೇ ಚಿತ್ರದ ಕಥೆ. 

1993ರಲ್ಲಿ ತೆರೆಕಂಡ ವಿ.ಎಸ್.ರೆಡ್ಡಿ ನಿರ್ದೇಶನದಲ್ಲಿ ಮೂಡಿಬಂದ 'ಗಡಿಬಿಡಿ ಗಂಡ' ಚಿತ್ರದಲ್ಲಿ ರವಿಚಂದ್ರನ್, ಜಗ್ಗೇಶ್, ರಮ್ಯಕೃಷ್ಣನ್ ಮತ್ತು ರೋಜಾ ಮುಖ್ಯಪಾತ್ರದಲ್ಲಿ ನಟಿಸಿದ್ದರು. ಇದು ತೆಲುಗಿನ 'ಅಲ್ಲಾರಿ ಮೊಗಡು' ಎಂಬ ಚಿತ್ರದ ರಿಮೇಕ್. ಚಿತ್ರದಲ್ಲಿ ಗೋಪಾಲ (ರವಿಚಂದ್ರನ್) ಎಂಬ ಹಳ್ಳಿ ಯುವಕ ತನ್ನ ಸಂಗೀತ ಸಾಧನೆಗೆಂದು ಪಟ್ಟಣಕ್ಕೆ ಬರುತ್ತಾನೆ. ಈ ವೇಳೆ ಒತ್ತಾಯಪೂರ್ವಕವಾಗಿ ಮೋಹನ ಎಂಬ ಸಿಟಿ ಹುಡುಗಿಯನ್ನು ಮಸದುವೆಯಾಗುತ್ತಾನೆ. ನಂತರ ತನ್ನ ಬಾಲ್ಯದ ಗೆಳತಿ ನೀಲಾಂಬರಿಯನ್ನು ಮದುವೆಯಾಗುತ್ತದೆ. ನಂತರ ಆತ ಇಬ್ಬರು ಹೆಂಡತಿಯರ ನಡುವೆ ಹೇಗೆ ಒದ್ದಾಡುತ್ತಾನೆ ಎಂಬುದನ್ನು ಹಾಸ್ಯವಾಗಿ ತೆರೆಮೇಲೆ ತರಲಾಗಿತ್ತು. 

ಮಾಂಗಲ್ಯಂ ತಂತುನಾನೇನಾ ಸಿನಿಮಾದಲ್ಲಿ ರಮ್ಯಾ ಕೃಷ್ಣನ್ ರವಿಚಂದ್ರನ್‌ಗೆ ನಾಯಕಿಯಾಗಿ ನಟಿಸಿದ್ದರು.1998ರಲ್ಲಿ ತೆರೆಕಂಡ ಈ ಸಿನಿಮಾ ತೆಲುಗಿನ ಪವಿತ್ರ ಬಂಧನ್ ಚಿತ್ರದ ರಿಮೇಕ್ ಆಗಿತ್ತು. ಸಿನಿಮಾದಲ್ಲಿ ವಿಜಯ್ (ರವಿಚಂದ್ರನ್) ತಂದೆ ಆತನಿಗೆ ಮದುವೆಯಾಗುವಂತೆ ಒತ್ತಾಯಿಸುತ್ತಿರುತ್ತಾನೆ. ತಂದೆಯ ಬಲವಂತದಿಂದ ಬೇಸತ್ತ ವಿಜಯ್, ಒಪ್ಪಂದದ ಮದುವೆಗೆ ಒಪ್ಪುತ್ತಾನೆ. ಈ ಒಪ್ಪಂದ ಪ್ರಕಾರ, ವಿಜಯ್‌ಗೆ ರಾಧಾ (ರಮ್ಯಾ ಕೃಷ್ಣನ್) ಮೇಲೆ ಒಂದು ವರ್ಷದೊಳಗೆ ಪ್ರೀತಿ ಮೂಡಿದರೆ ಮಾತ್ರ ಆಕೆಯ ಜೊತೆ ಸಂಸಾರ ನಡೆಸುತ್ತಾನೆ. ಇಲ್ಲವಾದರೆ ಈ ಮದುವೆ ಮುಂದುವರೆಯುವುದಿಲ್ಲ ಎಂದಿರುತ್ತಾನೆ. ಕೊನೆಯಲ್ಲಿ ವಿಜಯ್‌ಗೆ ರಾಧಾ ಮೇಲೆ ಪ್ರೀತಿಯಾಗುತ್ತದೆಯಾ? ಇಲ್ಲವಾ ಅನ್ನೋದೇ ಸಿನಿಮಾ ಕಥೆ. 

ಸಾಧುಕೋಕಿಲ ಅವರ ಮೊದಲ ನಿರ್ದೇಶನದ ಸಿನಿಮಾ 'ರಕ್ತ ಕಣ್ಣೀರು'. ಉಪೇಂದ್ರ, ರಮ್ಯಾಕೃಷ್ಣ, ಅಭಿರಾಮಿ, ಕುಮಾರ್ ಬಂಗಾರಪ್ಪ ನಟಿಸಿದ್ದ ಈ ಸಿನಿಮಾ ಸೂಪರ್, ಡೂಪರ್ ಹಿಟ್ ಆಗಿತ್ತು. ತಮಿಳು ರಿಮೇಕ್ ಆದ 'ರಕ್ತ ಕಣ್ಣೀರು' ಕನ್ನಡ ಮತ್ತು ತೆಲುಗು ಭಾಷೆಯಲ್ಲಿ ಏಕಕಾಲದಲ್ಲಿ ತಯಾರಾಗಿತ್ತು. ಈ ಚಿತ್ರದಲ್ಲಿ ರಮ್ಯಾ ಕೃಷ್ಣನ್ ನೆಗಿಟಿವ್ ರೋಲ್‌ನಲ್ಲಿ ಕಾಣಿಸಿಕೊಂಡಿದ್ದರು. ಈ ಚಿತ್ರ ಅಭೂತಪೂರ್ವ ಯಶಸ್ಸನ್ನು ಕಂಡು 2003ರಲ್ಲಿ ಅತಿಹೆಚ್ಚು ಗಳಿಕೆ ಕಂಡ ಕನ್ನಡ ಚಿತ್ರವಾಗಿತ್ತು.

ನೀಲಾಂಬರಿ ಸಿನಿಮಾದಲ್ಲಿ ರಮ್ಯಾ ಕೃಷ್ಣನ್, ದೇವರಾಜ್ ಮತ್ತು ಪ್ರೇಮಾ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಸೂರ್ಯ ನಿರ್ದೇಶನದ ಈ ಸಿನಿಮಾ 2001ರಲ್ಲಿ ತೆರೆಗೆ ಬಂದಿತ್ತು. ನೀಲಿ ಬೆಟ್ಟ ಎಂಬ ಗ್ರಾಮದಲ್ಲಿ ನಡೆಯು ನರಬಲಿ ಸುತ್ತ ಸಾಗುವ ಈ ಸಿನಿಮಾ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ಗಳಿಸಿತ್ತು.