ಅಕ್ಟೋಬರ್‌ನಿಂದ ಬಿಗ್‌ಬಾಸ್ ಸೀಸನ್ 10 ಪ್ರಾರಂಭ: ಕಲರ್ಸ್ ಕನ್ನಡದ ಈ ಧಾರಾವಾಹಿಗಳು ಮುಕ್ತಾಯ

Author Sowmya Bairappa | Published: Tuesday, September 12, 2023, 05:32 PM [IST]

ಕನ್ನಡ ಕಿರುತೆರೆಯ ಅತಿದೊಡ್ಡ ರಿಯಾಲಿಟಿ ಶೋ ಬಿಗ್ ಬಾಸ್ ಸೀಸನ್ ೧೦ಕ್ಕೆ ದಿನಗಣನೆ ಶುರುವಾಗಿದೆ. ಪ್ರತಿ ಬಾರಿಯಂತೆ ಈ ಬಾರಿಯೂ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಅವರೇ ಬಿಗ್ ಬಾಸ್ ನಿರೂಪಣೆ ಮಾಡಲಿದ್ದಾರೆ. ಕಿಚ್ಚನ ಬರ್ತಡೇ ದಿನದಂದು ಸೀಸನ್ ೧೦ರ ಪ್ರೋಮೋ ರಿಲೀಸ್ ಆಗಿದೆ. ಪ್ರತಿ ಬಾರಿ ಬಿಗ್‌ ಬಾಸ್ ಶೋ ಆರಂಭವಾಗುವ ಒಂದೆರಡು ಕಾರ್ಯಕ್ರಮಗಳು ಅಥವಾ ಧಾರಾವಾಹಿಗಳು ಮುಕ್ತಾಯವಾಗುತ್ತವೆ. ಅದರಂತೆ ಈ ಬಾರಿ ಕೂಡ ಮೂರು ಧಾರಾವಾಹಿಗಳು ಎಂಡ್ ಆಗುತ್ತಿವೆ. ಆ ಸೀರಿಯಲ್‌ಗಳು ಯಾವವು ಎಂಬ ಮಾಹಿತಿ ಇಲ್ಲಿದೆ.

Table of content

ಜಗನ್ ಚಂದ್ರಶೇಖರ್, ವಿಜಯಲಕ್ಷ್ಮೀ ಹಾಗೂ ಸುಕೃತಾ ನಾಗ್ ಮುಖ್ಯಭೂಮಿಕೆಯ 'ಲಕ್ಷಣ' ಧಾರಾವಾಹಿ ಬಿಗ್‌ ಬಾಸ್ ಸೀಸನ್ 10 ಆರಂಭವಾಗುತ್ತಿರುವ ಬೆನ್ನಲ್ಲೇ ಮುಕ್ತಾಯಗೊಳ್ಳುತ್ತಿದೆ. ಈ ಸೀರಿಯಲ್‌ ರಾತ್ರಿ 8.30ಕ್ಕೆ ಪ್ರಸಾರವಾಗುತ್ತಿತ್ತು. 2021ರ ಆಗಸ್ಟ್ ತಿಂಗಳಲ್ಲಿ ಆರಂಭವಾಗಿದ್ದ ಈ ಧಾರಾವಾಹಿ ಈವರೆಗೆ 507 ಎಪಿಸೋಡ್‌ಗಳನ್ನು ಪೂರೈಸಿದೆ.

ರಾತ್ರಿ 9.30ಕ್ಕೆ ಪ್ರಸಾರವಾಗುತ್ತಿದ್ದ ತ್ರಿಪುರ ಸುಂದರಿ ಧಾರಾವಾಹಿ ಕೂಡ ಬಿಗ್‌ ಬಾಸ್ ಪ್ರಯುಕ್ತ ಎಂಡ್ ಆಗುತ್ತಿದೆ. ಈ ಸೀರಿಯಲ್‌ನಲ್ಲಿ ಬಿಗ್‌ಬಾಸ್ ಖ್ಯಾತಿಯ ದಿವ್ಯಾ ಸುರೇಶ್ ಹಾಗೂ ಅಭಿನ್ ವಿಶ್ವನಾಥ್‌ನ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. 2023ರ ಜನವರಿಯಲ್ಲಿ ಆರಂಭವಾಗಿದ್ದ ಈ ಸೀರಿಯಲ್‌ ಇದೀಗ ಮುಕ್ತಾಯವಾಗುತ್ತಿದೆ.

ಬಿಗ್‌ಬಾಸ್ ಕನ್ನಡ ಸೀಸನ್ 9 ಮುಕ್ತಾಯವಾದಾಗ ಭುವನ್ ಹಾಗೂ ಪ್ರಿಯಂಕಾ ಮುಖ್ಯಭೂಮಿಕೆಯ 'ಪುಣ್ಯವತಿ' ಧಾರಾವಾಹಿ ಆರಂಭವಾಗಿತ್ತು. ರಾತ್ರಿ 10 ಗಂಟೆಗೆ ಪ್ರಸಾರವಾಗ್ತಿದ್ದ ಈ ಧಾರಾವಾಹಿಬಿಗ್‌ ಬಾಸ್ ಸೀಸನ್ 10 ಆರಂಭವಾಗುತ್ತಿದ್ದಂತೆ ಎಂಡ್ ಆಗ್ತಿದೆ.

ಪ್ರತಿ ಬಾರಿ ಇನೋವೇಟಿವ್ ಫಿಲಂ ಸಿಟಿಯಲ್ಲಿ ಬಿಗ್‌ಬಾಸ್ ಸೆಟ್ ಹಾಕಲಾಗುತ್ತಿತ್ತು. ಆದರೆ, ಈ ಬಾರಿ ದೊಡ್ಡ ಆಲದ ಮರದ ಬಳಿ ಸೆಟ್ ನಿರ್ಮಾಣವಾಗುತ್ತಿದೆ. ಅಕ್ಟೋಬರ್ ಎರಡನೇ ಅಥವಾ ಮೂರನೇ ವಾರ ಬಿಗ್‌ಬಾಸ್ ಆರಂಭಗೊಳ್ಳಲಾಗುತ್ತಿದೆ ಎನ್ನಲಾಗಿದ್ದು, ಈ ಬಾರಿಯೂ ಕಿಚ್ಚ ಸುದೀಪ್ ಅವರೇ ನಿರೂಪಣೆ ಮಾಡಲಿದ್ದಾರೆ. ಈ ಬಾರಿ ಶೋನ ಸ್ವರೂಪದಲ್ಲಿ ಒಂದಷ್ಟು ಬದಲಾವಣೆಗಳು ಇರಲಿವೆಯಂತೆ. ಈ ಬಾರಿ ಓಟಿಟಿ ಇರುವುದಿಲ್ಲ.

ಈ ಹಿಂದಿನಂತೆ ಸೋಮವಾರದಿಂದ ಶುಕ್ರವಾರದವರೆಗೆ ಬಿಗ್‌ಬಾಸ್ ರಾತ್ರಿ ೮ರಿಂದ ೧೦.೩೦ರ ವರೆಗೆ ಪ್ರಸಾರವಾಗಲಿದೆ. ವಾರಾಂತ್ಯದಲ್ಲಿ ವಾರದ ಕಥೆ ಕಿಚ್ಚನ ಜೊತೆ ಇರಲಿದೆ. ಇಷ್ಟು ವರ್ಷ ಬಿಗ್‌ಬಾಸ್ ಕನ್ನಡ ನಿರ್ದೇಶಿಸುತ್ತಿದ್ದ ಪರಮೇಶ್ವರ್ ಗುಂಡ್ಕಲ್ ಈ ವರ್ಷ ಜೀ ಸ್ಟುಡಿಯೋಸ್‌ಗೆ ವರ್ಗಾವಣೆಗೊಂಡಿದ್ದಾರೆ. ಸದ್ಯ ಕಲರ್ಸ್ ಕನ್ನಡ ವಾಹಿನಿಯ ನಾನ್‌ಫಿಕ್ಷನ್ ಹೆಡ್‌ ಆಗಿರುವ ಪ್ರಕಾಶ್ ಈ ಬಾರಿ ಬಿಗ್‌ಬಾಸ್ ಡೈರೆಕ್ಷನ್ ಮಾಡುವ ನಿರೀಕ್ಷೆಯಿದೆ.

ಈಗಾಗಲೇ ಸಾಮಾಜಿಕ ಜಾಲತಾಣಗಳಲ್ಲಿ ಈ ಬಾರಿ ಯಾರೆಲ್ಲಾ ದೊಡ್ಮನೆ ಪ್ರವೇಶ ಮಾಡಲಿದ್ದಾರೆ ಎಂಬುದರ ಬಗ್ಗೆ ಸಾಕಷ್ಟು ಚರ್ಚೆಗಳು ಆರಂಭವಾಗಿದೆ. ಒಂದಷ್ಟು ಸಂಭಾವ್ಯ ಸ್ಪರ್ಧಿಗಳ ಹೆಸರು ಕೂಡ ಹೊರಬಿದ್ದಿದೆ. ಜೊತೆ ಜೊತೆಯಲಿ ಖ್ಯಾತಿಯ ಮೇಘಾ ಶೆಟ್ಟಿ, ರಕ್ಷಕ್ ಬುಲೆಟ್, ಡ್ರೋಣ್ ಪ್ರತಾಪ್‌, ರೇಖಾ ವೇದಾವ್ಯಾಸ್, ಸುನೀಲ್ ರಾವ್, ನಮ್ರತಾ ಗೌಡ, ರಾಜೇಶ್ ಧ್ರುವಾ, ಸಿಂಗರ್ ಇಶಾನಿ, ಭೂಮಿಕಾ ಬಸವರಾಜ್ ಪಟ್ಟಿಯಲ್ಲಿದ್ದಾರೆ.