ಬಿಗ್‌ಬಾಸ್‌ ಮನೆಯಿಂದ ವೈಲ್ಡ್ ಕಾರ್ಡ್ ಎಂಟ್ರಿ ಅವಿನಾಶ್ ಶೆಟ್ಟಿ ಎಲಿಮಿನೇಟ್

ಶೈನ್, ಶುಭಾ ಎಂಟ್ರಿ ಸೂಪರ್ ಸಂಡೇ ಕಾರ್ಯಕ್ರಮ ನಡೆಸಿಕೊಡಲು ಸುದೀಪ್ ಬಂದಿಲ್ಲ. ಬದಲಾಗಿ ಬಿಗ್‌ಬಾಸ್ ಮಾಜಿ ಸ್ಪರ್ಧಿಗಳಾದ ಶೈನ್ ಶೆಟ್ಟಿ ಹಾಗೂ ಶುಭಾ ಪೂಂಜಾ ದೊಡ್ಮನೆಗೆ ಆಗಮಿಸಿದ್ದರು. ಈ ಇಬ್ಬರ ಆಗಮನ ಎಲ್ಲ ಸ್ಪರ್ಧಿಗಳ ಮುಖದಲ್ಲೂ ಸಂತಸ ತರಿಸಿತ್ತು. ಆದರೆ, ಈ ಮಧ್ಯೆ ಎಲಿಮಿನೇಷನ್ ಕೂಡ ನಡೆದಿದೆ. 

ಬಿಗ್‌ಬಾಸ್‌ ಮನೆಯೊಳಗೆ ಎರಡು ಕಾರುಗಳು ಬರುತ್ತವೆ. ಆ ಕಾರಿನೊಳಗೆ ಅವಿನಾಶ್ ಮತ್ತು ಮೈಕಲ್ ಹೋಗುತ್ತಾರೆ. ಈ ಎರಡು ಕಾರುಗಳಲ್ಲಿ ಒಂದು ಕಾರು ಲೇಟ್ ಆಗಿ ಬರುತ್ತೆ. ಆ ಲೇಟ್ ಆಗಿ ಬಂದ ಕಾರಿನಲ್ಲಿರುವವನು ಸೇಫ್. ಅದರಂತೆ ಮೈಕಲ್ ಸೇಫ್ ಆಗಿ ಅವಿನಾಶ್ ಎಲಿಮಿನೇಟ್ ಆಗಿದ್ದಾರೆ. ಬಿಗ್‌ಬಾಸ್‌ 50 ದಿನ ಪೂರೈಸಿದ ಹಿನ್ನೆಲೆಯಲ್ಲಿ ನಟ ಆಸ್ತಿಕ್ ಅವಿನಾಶ್ ಶೆಟ್ಟಿ ಹಾಗೂ ಮಾಡೆಲ್ ಪವಿ ಪೂವಯ್ಯ ವೈಲ್ಡ್ ಕಾರ್ಡ್ ಎಂಟ್ರಿ ಕೊಟ್ಟಿದ್ದರು. ಆದ್ರೆ, ಕಳೆದ ವಾರ ಅವಿನಾಶ್ ಎಲಿಮಿನೇಟ್ ಆಗಿದ್ದರೆ, ಈ ವಾರ ಅವಿನಾಶ್ ಹೊರಹೋಗಿದ್ದಾರೆ. 

ಆಸ್ತಿಕ್ ಅವಿನಾಶ್ ಶೆಟ್ಟಿ ಕನ್ನಡ ಹಾಗೂ ತುಳು ಚಿತ್ರರಂಗದಲ್ಲಿ ಸಕ್ರಿಯವಾಗಿರುವ ನಟ, ಕ್ರಿಕೆಟಿಗ ಮತ್ತು ಮಾಡೆಲ್. ಇವರು ಮೂಲತಃ ಮಂಗಳೂರಿನ ಸುರತ್ಕಲ್‌ನವರು. ಇವರ ತಂದೆ ಶ್ರೀಧರ್ ಶೆಟ್ಟಿ ಹಾಗೂ ತಾಯಿ ಸುಕನ್ಯಾ. ಇವರು ಎಸ್‌ಡಿಎಂ ಕಾಲೇಜ್‌ ಆಫ್ ಮ್ಯಾನೇಜ್‌ಮೆಂಟ್‌ನಲ್ಲಿ BHRD ವಿಷಯದಲ್ಲಿ ಪದವಿ ಪಡೆದಿದ್ದಾರೆ. 

ಅವಿನಾಶ್ 2006ರಲ್ಲಿ ಕೋಕ್‌ ಮತ್ತು 2009ರಲ್ಲಿ MRF ಟೈಯರ್‌ ಜಾಹೀರಾತಿನ ಮೂಲಕ ಗ್ಲಾಮರ್ ಲೋಕಕ್ಕೆ ಕಾಲಿಟ್ಟರು. ನಂತರ 2007ರಲ್ಲಿ 'ಮಿಸ್ಟರ್ ಮಂಗಳೂರು' ಪಟ್ಟ ಗೆದ್ದರು. 2012ರಲ್ಲಿ ಮಿಸ್ಟರ್ ಸೌತ್ ಇಂಡಿಯಾ ಟೈಟಲ್ ಕೂಡ ಗೆದ್ದಿದ್ದಾರೆ.  ಅವಿನಾಶ್ ಕ್ರಿಕೆಟರ್ ಕೂಡ ಹೌದು. ಕ್ರಿಕೆಟರ್ ಆಗಬೇಕೆಂಬ ಕನಸು ಹೊಂದಿದ್ದ ಇವರು ಮಂಗಳೂರು ಝೋನ್‌ನಲ್ಲಿ ಕ್ರಿಕೆಟ್ ಆಡಿದ್ದಾರೆ. 

ಅವಿನಾಶ್ 'ಜೈ ತುಳುನಾಡ್' ಎಂಬ ಸಿನಿಮಾ ಮೂಲಕ ತುಳು ಚಿತ್ರರಂಗಕ್ಕೆ ಕಾಲಿಟ್ಟರು. ನಂತರ ಕೆಲ ತುಳು ಸಿನಿಮಾಗಳಲ್ಲಿ ಅಭಿನಯಿಸಿದ ಇವರು,  ಕನ್ನಡದ ಚೆಲ್ಲಾಪಿಲ್ಲಿ ಸಿನಿಮಾದಲ್ಲಿ ನಾಯಕನಾಗಿ ನಟಿಸಿದ್ದಾರೆ. ಜೊತೆಗೆ ಕನ್ನಡದ ಕಣ್ಮಣಿ ಡಾ.ಪುನೀತ್‌ ರಾಜ್‌ಕುಮಾರ್ ಅವರ 'ಪವರ್' ಸಿನಿಮಾದಲ್ಲಿ ನೆಗೆಟಿವ್ ಕ್ಯಾರೆಕ್ಟರ್‌ನಲ್ಲಿ ಮಿಂಚಿದ್ದಾರೆ. ಡಾಲಿ ಧನಂಜಯ್ ಅವರ ಬದ್ಮಾಶ್ ಸಿನಿಮಾದಲ್ಲೂ ಅಭಿನಯಿಸಿದ್ದಾರೆ.