ನರಕ ಸೇರಿದ ವಕೀಲ್ ಸಾಬ್: ಮೊದಲ ವಾರ ಬಿಗ್‌ಬಾಸ್ ಮನೆಯಿಂದ ಯಮುನಾ ಶ್ರೀನಿಧಿ ಎಲಿಮಿನೇಟ್!

ಬಿಗ್‌ಬಾಸ್‌ ಕನ್ನಡ ಸೀಸನ್ 11ರ ಮೊದಲ ವಾರ ಯಮುನಾ ಶ್ರೀನಿಧಿ ಎಲಿಮಿನೇಟ್ ಆಗಿದ್ದಾರೆ ಎನ್ನಲಾಗಿದೆ. ಮೊದಲ ವಾರ  ಮನೆಯಿಂದ ಹೊರಹೋಗಲು ಭವ್ಯಾ ಗೌಡ, ತುಕಾಲಿ ಮಾನಸ, ಲಾಯರ್ ಜಗದೀಶ್, ಹಂಸ, ಯಮುನಾ ಶ್ರೀನಿಧಿ, ಗೌತಮಿ ಜಾದವ, ಚೈತ್ರಾ ಕುಂದಾಪುರ, ಶಿಶಿರ್ ಶಾಸ್ತ್ರಿ, ಮೋಕ್ಷಿತಾ ಪೈ ನಾಮಿನೇಟ್ ಆಗಿದ್ದರು. ಇದೀಗ ಯಮುನಾ ಶ್ರೀನಿಧಿ ಹೊರಬಂದಿದ್ದಾರೆ ಎನ್ನಲಾಗಿದ್ದು ಈ ಬಗ್ಗೆ ಖಚಿತ ಮಾಹಿತಿ ಇನ್ನು ಸಿಕ್ಕಿಲ್ಲ.  'ಸೂಪರ್ ಸಂಡೇ ವಿತ್ ಸುದೀಪ' ಶೋನಲ್ಲಿ ಇದು ಗೊತ್ತಾಗಲಿದೆ.

ಈ ಬಾರಿ ದೊಡ್ಮನೆಯನ್ನು ಸ್ವರ್ಗ ಮತ್ತು ನರಕ ಅಂತ ಎರಡು ಭಾಗಗಳಾಗಿ ಮಾಡಲಾಗಿತ್ತು. ಏಳು ಮಂದಿ ನರಕ ಸೇರಿದ್ರೆ, 10 ಸ್ಪರ್ಧಿಗಳು ಸ್ವರ್ಗವಾಸಿಗಳಾಗಿದ್ದರು. ಇದೀಗ ಲಾಯರ್ ಜಗದೀಶ್ ಅವರನ್ನು ನರಕಕ್ಕೆ ಕಳುಹಿಸಲಾಗಿದ್ದು, ರಂಜಿತ್ ಕುಮಾರ್ ಅವರನ್ನು ಸ್ವರ್ಗಕ್ಕೆ ಬರಮಾಡಿಕೊಳ್ಳಲಾಗಿದೆ.

ಮೊದಲ ವಾರ ಬಿಗ್‌ಬಾಸ್‌ ಮನೆಯಲ್ಲಿ ಲಾಯರ್ ಜಗದೀಶ್ ಸೃಷ್ಟಿಸಿದ ಹೈಡ್ರಾಮಾಕ್ಕೆ ಮನೆಮಂದಿ ಸುಸ್ತಾಗಿದ್ದರು. ಜೊತೆಗೆ ನಾನು ಬಿಗ್‌ಬಾಸ್‌ನ ಎಕ್ಸ್‌ಪೋಸ್ ಮಾಡ್ತೀನಿ, ಡೆಸ್ಟ್ರಾಯ್ ಮಾಡ್ತೀನಿ. ಪ್ರೋಗ್ರಾಂ ಹಾಳು ಮಾಡಲಿಲ್ಲ ಅಂದ್ರೆ ನನ್ನ ಹೆಸರು ಬೇರೆ ಇಡು.  ನಮ್ಮನ್ನು ಎದುರು ಹಾಕಿಕೊಂಡು ಕರ್ನಾಟದಲ್ಲಿ ಬಿಗ್‌ಬಾಸ್ ಓಡುಸ್ತೀರಾ ಎಂದು ಸವಾಲು ಹಾಕಿದ್ದರು. 'ವಾರದ ಕಥೆ ಕಿಚ್ಚನ ಜೊತೆ' ಸಂಚಿಕೆಯಲ್ಲಿ ಸುದೀಪ್ ಈ ಟಾಪಿಕ್ ತೆಗೆದರು. ಬಿಗ್‌ಬಾಸ್‌ ನನಗೆ ಬೇಕು ಅಂತ ತಾವು ತಾನೇ ಒಳಗೆ ಬಂದಿದ್ದು, ಬಿಗ್‌ಬಾಸ್‌ಗೆ ಚಾಲೆಂಜ್ ಮಾಡಿಬಿಟ್ರಲ್ಲಾ? ಅಂತ ಪ್ರಶ್ನಿಸಿದರು. ಅದಕ್ಕೆ ಉತ್ತರಿಸಲಾಗದೇ ಪೇಚಿಗೆ ಸಿಲುಕಿದ ಜಗದೀಶ್, ಬಾಯಲ್ಲಿ ಬಂತು ಸರ್..ಏನು ಮಾಡೋದು? ಎಂದಷ್ಟೇ ಉತ್ತರಿಸಿದರು.

ಕ್ಯಾಮರಾ ಮುಂದೆ ನೀವು 'ಬಿಗ್‌ಬಾಸ್‌ಗೆ' ಚಾಲೆಂಜ್ ಮಾಡಿದ್ರಲ್ಲ. ಅದು ತಪ್ಪೇ ಅಲ್ಲ, ದಟ್ ವಾಸ್ ಎ ಜೋಕ್ ಅಂತ ಟಾಂಗ್ ನೀಡಿದರು. ಆಗ ಅಲ್ಲಿದ್ದ ಸ್ಪರ್ಧಿಗಳು ಸೇರಿದಂತೆ ಲೈವ್ ಆಡಿಯೆನ್ಸ್ ಜೋರಾಗಿ ನಗುತ್ತಾ ಶಿಳ್ಳೆ, ಚಪ್ಪಾಳೆ ಹೊಡೆದರು. ಬಿಗ್‌ಬಾಸ್ ಅನ್ನೋದು ಒಂದು ಅದ್ಭುತ ಶೋ. ತುಂಬಾ ಜನ ಇದರಿಂದ ಲೈಫ್‌ನಲ್ಲಿ ಏನೇನೋ ಆಗಿದ್ದಾರೆ. ಇದನ್ನ ಇಂಪ್ರೂವ್ ಮಾಡುವ ಸಾಧ್ಯತೆ ಈಗಿರುವ ನಿಮ್ಮ ಕೈಯಲ್ಲಿದೆ. ಇದನ್ನು ಇನ್ನಷ್ಟು ಬೆಳೆಸಬಹುದು. ಹಾಳು ಮಾಡೋಕೆ ನಿಮ್ಮಪ್ಪರಾಣೆ ಸಾಧ್ಯವಿಲ್ಲ ಅಂತ ಹೇಳಿದರು. ಆ ಮೂಲಕ ಲಾಯರ್ ಜಗದೀಶ್‌ಗೆ ತಮ್ಮದೇ ಶೈಲಿಯಲ್ಲಿ ಬೆಂಡೆತ್ತಿದರು.