Father's day 2024: ಅಪ್ಪನ ಮಹತ್ವ ಸಾರುವ ಈ ಕನ್ನಡ ಸಿನಿಮಾಗಳನ್ನು ನೀವು ನೋಡಲೇಬೇಕು!

ವರನಟ ಡಾ.ರಾಜ್‌ಕುಮಾರ್ ಅಭಿನಯದ 'ದೇವತಾ ಮನುಷ್ಯ' ಸಿನಿಮಾ 1988ರಲ್ಲಿ ತೆರೆಗೆ ಬಂದಿತ್ತು. ಈ ಸಿನಿಮಾದಲ್ಲಿ ನಟಿ ಸುಧಾರಾಣಿ ಅಣ್ಣಾವ್ರ ಮಗಳಾಗಿ ನಟಿಸಿದ್ದು, ನಿನ್ನಂತಹ ಅಪ್ಪ ಇಲ್ಲ ಎಂದು ಕುಣಿದು ಕುಪ್ಪಳಿಸಿದ್ದರು. ಅಪ್ಪ-ಮಗಳ ಬಾಂಧವ್ಯ ಸಾರುವ ಈ ಸಿನಿಮಾದ ಹಾಡು ಇಂದಿಗೂ ಸಖತ್ ಫೇಮಸ್. 

ಡಾ.ವಿಷ್ಣುವರ್ಧನ್ ಹಾಗೂ ಭವ್ಯಾ ಅಭಿನಯದ 'ನೀ ಬರೆದ ಕಾದಂಬರಿ' ಕನ್ನಡದ ಜನಪ್ರಿಯ ಸಿನಿಮಾಗಳಲ್ಲೊಂದು. ತಂದೆಯ ವಿರುದ್ಧವಾಗಿ ಛಾಯಾಗ್ರಾಹಕನನ್ನು ಮದುವೆಯಾಗುವ ಶ್ರೀಮಂತನ ಮಗಳು ನಂತರ ಭಿನ್ನಾಭಿಪ್ರಾಯಗಳಿಂದ ಪತಿಯಿಂದ ದೂರವಾಗುತ್ತಾಳೆ. ನಂತರ ಅವರ ದಾಂಪತ್ಯ ಮತ್ತೆ ಹೇಗೆ ದಾರಿಗೆ ಬರುತ್ತದೆ ಎನ್ನುವುದು ಚಿತ್ರದ ಮುಂದಿನ ಕಥೆ. ಇದೊಂದು ಪ್ರೀತಿ ಕುರಿತ ಸಿನಿಮಾವಾಗಿದ್ದರೂ ಅಪ್ಪ-ಮಗನ ಬಾಂಧ್ಯವೂ ಚಿತ್ರದಲ್ಲಿತ್ತು. 

1997ರಲ್ಲಿ ತೆರೆಕಂಡ 'ಲಾಲಿ' ಸಿನಿಮಾವನ್ನು ದಿನೇಶ್ ಬಾಬು ನಿರ್ದೇಶನ ಮಾಡಿದ್ದರು. ಈ ಚಿತ್ರದಲ್ಲಿ ತಂದೆಯ ಪಾತ್ರದಲ್ಲಿ ವಿಷ್ಣುವರ್ಧನ್ ಹಾಗೂ ಮಗಳ ಪಾತ್ರದಲ್ಲಿ ನಟಿ ಮೋಹಿನಿ ಅಭಿನಯ ಇಂದಿಗೂ ಮರೆಯಲು ಸಾದ್ಯವಿಲ್ಲ. ತನ್ನ ಮಗಳಿಗಾಗಿಯೇ ಬದುಕಿದ್ದ ತಂದೆ, ಕೊನೆಗೆ ಆಕೆ ತನ್ನನ್ನು ನಿರ್ಲಕ್ಷಿಸುತ್ತಿದ್ದಾಳೆ ಎಂದು ತಿಳಿದು ಒದ್ದಾಡುವ ದೃಶ್ಯ ಕಣ್ಣಲ್ಲಿ ನೀರು ತರಿಸುತ್ತದೆ. 

2006ರಲ್ಲಿ ತೆರೆಕಂಡ ರೆಬಲ್ ಸ್ಟಾರ್ ಅಂಬರೀಶ್ ಹಾಗೂ ರಿಯಲ್ ಸ್ಟಾರ್ ಉಪೇಂದ್ರ ಅವರ ಕಾಂಬಿನೇಷನ್‌ನ ಸಿನಿಮಾ ತಂದೆಗೆ ತಕ್ಕ ಮಗ. ಈ ಚಿತ್ರದಲ್ಲಿ ತನ್ನ ತಂದೆಯ ಹಠಾತ್ ಮರಣದಿಂದ ಸತ್ಯ (ಉಪೇಂದ್ರ) ತನ್ನ ಪ್ರೀತಿಸಿದ ಹುಡುಗಿಯನ್ನು ಬಿಟ್ಟು ತಂದೆಯನ್ನು ಘನತೆಯನ್ನು ಕಾಪಾಡಲು ಬೇರೆ ಯುವತಿಯನ್ನು ಮದುವೆಯಾಗುತ್ತಾನೆ. ಬಳಿಕ ಅವರಿಬ್ಬರು ಸಂತೋಷದ ವೈವಾಹಿಕ ಜೀವನ ನಡೆಸಲು ಹೇಗೆ ಹೆಣಗಾಡುತ್ತಾರೆ ಎಂಬುದು ಚಿತ್ರದ ಕಥೆ. ಈ ಸಿನಿಮಾದಲ್ಲಿ ತಂದೆ-ಮಗನ ಒಂದು ಸುಂದರ ಬಾಂಧವ್ಯ ನೋಡಬಹುದು.  

ಹೇಮಂತ್ ರಾವ್ ನಿರ್ದೇಶನದಲ್ಲಿ ಮೂಡಿಬಂದಿದ್ದ ' ಗೋಧಿ ಬಣ್ಣ ಸಾಧಾರಣ ಮೈಕಟ್ಟು' ಚಿತ್ರದಲ್ಲಿ ರಕ್ಷಿತ್, ಅನಂತನಾಗ್ ಪುತ್ರನ ಪಾತ್ರದಲ್ಲಿ ನಟಿಸಿದ್ದರು. ಇದೊಂದು ತಂದೆ ಮತ್ತು ಮಗನ ಕಥೆ  ಹೇಳುವ ಸಿನಿಮಾ.  ವಯಸ್ಸಾದ ತಂದೆ-ತಾಯಿಯರನ್ನ ವೃದ್ಧಾಶ್ರಮಕ್ಕೆ ದೂಡುವ ಇಂದಿನ ಯುವ ಪೀಳಿಗೆ ಕಟ್ಟುನಿಟ್ಟಾಗಿ ನೋಡಲೇಬೇಕಾದ ಸಿನಿಮಾ ಗೋಧಿ ಬಣ್ಣ ಸಾಧಾರಣ ಮೈಕಟ್ಟು. ತಂದೆ-ತಾಯಿಯ ಮೇಲೆ ಪ್ರೀತಿ ಇರುವ ಅಥವಾ ಕೋಪ ಇರುವ ಎಲ್ಲಾ ಮಕ್ಕಳೂ ಈ ಚಿತ್ರವನ್ನ ನೋಡಬೇಕು. 

ನಾನು ನನ್ನ ಕನಸು ಸಿನಿಮಾದಲ್ಲಿ ಪ್ರಕಾಶ್ ರಾಜ್ ಅಪ್ಪನಾಗಿ ಮತ್ತು ನಟಿ ಅಮೂಲ್ಯ ಮಗಳ ಪಾತ್ರದಲ್ಲಿ ನಟಿಸಿದ್ದರು.  ಪ್ರಕಾಶ್ ರಾಜ್‌ ಅವರೇ ನಿರ್ದೇಶಿಸಿದ್ದ ಈ ಚಿತ್ರದಲ್ಲಿ ರಮೇಶ್ ಅರವಿಂದ್, ಸಿತಾರಾ, ಸಿಹಿ ಕಹಿ ಚಂದ್ರು, ಅಚ್ಯುತ್ ಕುಮಾರ್ ಮೊದಲಾದವರ ತಾರ ಬಳಗವೇ ಇತ್ತು. ಈ ಸಿನಿಮಾವು ಅಪ್ಪ-ಮಗಳ ಬಾಂಧವ್ಯವನ್ನು ಸಾರಿತ್ತು. ತನ್ನ ಮಗಳು ಹುಟ್ಟಿದಾಗಿನಿಂದ ಅವಳ ಬಗ್ಗೆ ಅತಿಹೆಚ್ಚು ಕಾಳಜಿ ವಹಿಸುವ ತಂದೆ, ಆಕೆಯನ್ನು ಬೇರೆಯವರಿಗೆ ಮದುವೆ ಮಾಡಿಕೊಡಬೇಕಾದ ಸಂದರ್ಭದಲ್ಲಿ ಅನುಭವಿಸುವ ದುಃಖ, ಆತನ ಬದಲಾವಣೆಯನ್ನು ಈ ಚಿತ್ರ ಹೊಂದಿತ್ತು. 

ಚೌಕ ಸಿನಿಮಾದ ಕಥೆ ಬೇರೆಯದ್ದೇ ಆಗಿದ್ದರೂ ಕೂಡ ಇದರಲ್ಲಿ ತಂದೆ-ಮಗಳ ಬಾಂಧವ್ಯ ಹೈಲೈಟ್ ಆಗಿತ್ತು. ಚಿತ್ರದಲ್ಲಿ ಕಾಶಿನಾಥ್ ಅಪ್ಪನಾಗಿ ಮತ್ತು ಮಾನ್ವಿತಾ ಕಾಮತ್ ಮಗಳ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಈ ಸಿನಿಮಾದ 'ಅಪ್ಪಾ...ಐ ಲವ್ ಯ ಪಾ' ಹಾಡಂತೂ ಸಿಕ್ಕಾಪಟ್ಟೆ ಹಿಟ್ ಆಗಿತ್ತು.

ಪುಷ್ಪಕ ವಿಮಾನ ಸಿನಿಮಾದಲ್ಲಿ ರಮೇಶ್ ಅರವಿಂದ್ ಹಾಗೂ ಬಾಲನಟಿ ಯುವಿನಾ ಮುಖ್ಯಪಾತ್ರದಲ್ಲಿ ನಟಿಸಿದ್ದರು. ಇದೊಂದು ಅಪ್ಪಟ ತಂದೆ-ಮಗಳ ಬಾಂಧವ್ಯದ ಕಥೆ. ರಮೇಶ್ ಅರವಿಂದ್ ಈ ಚಿತ್ರದಲ್ಲಿ ಬುದ್ಧಿಮಾಂಧ್ಯ ಅಪ್ಪನ ಪಾತ್ರದಲ್ಲಿ ಬಹಳ ಅದ್ಭುತವಾಗಿ ನಟಿಸುವ ಮೂಲಕ ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರರಾಗಿದ್ದರು. ಈ ಸಿನಿಮಾದ ಭಾವನಾತ್ಮಕ ದೃಶ್ಯಗಳು ಕಣ್ಣಲ್ಲಿ ನೀರು ತರಿಸುವಂತಿದ್ದವು.