ಹ್ಯಾಪಿ ಬರ್ತಡೇ: ಹಿರಿಯ ನಟ ದತ್ತಣ್ಣ ನಟನೆಯ ಈ ಸಿನಿಮಾಗಳನ್ನು ನೀವು ನೋಡಲೇಬೇಕು!

ನಟ ದತ್ತಣ್ಣ ಅವರ ಮೊದಲ ಸಿನಿಮಾ ಆಸ್ಪೋಟ. ಲೇಖಕ ಮನು ಅವರ ಅಯನಾ ಕಾದಂಬರಿ ಆಧರಿತ ಈ ಸಿನಿಮಾದಲ್ಲಿ ಶ್ರೀಧರ್ ಮತ್ತು ಎಚ್.ಜಿ.ದತ್ತಾತ್ರೇಯ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಇದು ದತ್ತಣ್ಣ ಅವರ ಮೊದಲ ಸಿನಿಮಾವಾಗಿದ್ದರೂ ಕೂಡ ಪ್ರೇಕ್ಷಕರಿಂದ ಸಾಕಷ್ಟು ಮೆಚ್ಚುಗೆ ವ್ಯಕ್ತವಾಗಿತ್ತು. ಜೊತೆಗೆ ಈ ಸಿನಿಮಾ ರಾಷ್ಟ್ರಪ್ರಶಸ್ತಿಯನ್ನು ಪಡೆದಿತ್ತು.

ಪಿ ಶೇಷಾದ್ರಿ ನಿರ್ದೇಶನದ ಅತಿಥಿ ಸಿನಿಮಾದಲ್ಲಿ ದತ್ತಣ್ಣ 'ಡಾಕ್ಟರ್' ಪಾತ್ರವನ್ನು ನಿರ್ವಹಿಸಿದ್ದರು. ಪ್ರಕಾಶ್ ರಾಜ್ ಪ್ರಮುಖ ಪತ್ರದಲ್ಲಿ ನಟಿಸಿದ್ದ ಈ ಸಿನಿಮಾ ಭಯೋತ್ಪಾದನೆ ಮತ್ತು ಭಯೋತ್ಪಾದಕನ ಮನೋವಿಜ್ಞಾನ ಒಳಗೊಂಡಿತ್ತು. ಈ ಸಿನಿಮಾದಲ್ಲಿ ದತ್ತಣ್ಣ ವೈದ್ಯನ ಪಾತ್ರದಲ್ಲಿ ಬಹಳ ಅದ್ಭುತವಾಗಿ ನಟಿಸಿದ್ದರು. ಅತಿಥಿ ಸಿನಿಮಾಗೆ ರಾಷ್ಟ್ರಪ್ರಶಸ್ತಿ ಲಭಿಸಿತ್ತು. ಜೊತೆಗೆ ಅಪಾರ ಮೆಚ್ಚುಗೆ ಮತ್ತು ಪ್ರಶಂಸೆ ಹಲವಾರು ಪ್ರಶಸ್ತಿಗಳು ಲಬಿಸಿದ್ದವು. ಈ ಸಿನಿಮಾವನ್ನು ೨೦೦೩ರ ಕೈರೋ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಪ್ರದರ್ಶಿಸಲಾಯಿತು. 

ಬಿ.ಎಸ್.ಲಿಂಗದೇವರು ನಿರ್ದೇಶನದ ಮೌನಿ ಸಿನಿಮಾದಲ್ಲಿ ಅನಂತ್ ನಾಗ್ ಮತ್ತು ದತ್ತಣ್ಣ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಈ ಸಿನಿಮಾದಲ್ಲಿ ದತ್ತಣ್ಣ ಕುಪ್ಪಣ್ಣ ಭಟ್ಟ ಎಂಬ ಪಾತ್ರ ನಿರ್ವಹಿಸಿದ್ದು, ವಿಶೇಷವಾಗಿ ಹಿಂದೂ ಮಠದ ಪಾಲಕನ ಪಾತ್ರದಲ್ಲಿ ಗಮನ ಸೆಳೆದಿದ್ದರು. ಈ ಸಿನಿಮಾಗೆ ರಾಷ್ಟ್ರಪ್ರಶಸ್ತಿ ಲಭಿಸಿದ್ದು, ದತ್ತಣ್ಣ ಪಾತ್ರಕ್ಕೆ ಮೆಚ್ಚುಗೆ ವ್ಯಕ್ತವಾಗಿತ್ತು, 

ನಿರ್ದೇಶಕ ಪಿ.ಶೇಷಾದ್ರಿ ಅವರ ಬೆಟ್ಟದ ಜೀವ ಸಿನಿಮಾದಲ್ಲಿ ದತ್ತಣ್ಣ ಗೋಪಾಲಯ್ಯ ಎಂಬ ಪಾತ್ರವನ್ನು ನಿರ್ವಹಿಸಿದ್ದರು. ಕೆ.ಶಿವರಾಮ ಕಾರಂತರ ಕೃತಿಯಾಧಾರಿತವಾದ ಈ ಸಿನಿಮಾ ರಾಷ್ಟ್ರಪ್ರಶಸ್ತಿ ಗೆದ್ದಿತ್ತು. ಚಿತ್ರದಲ್ಲಿ ನಿಸರ್ಗ ಮತ್ತು ಕೃಷಿಯೊಂದಿಗಿನ ಪ್ರಯತ್ನದ ತಿರುಳನ್ನು ತೋರಿಸಲಾಗಿತ್ತು. ಈ ಸಿನಿಮಾದಲ್ಲಿ ಗೋಪಾಲಯ್ಯನ ಪಾತ್ರದಲ್ಲಿ ದತ್ತಣ್ಣ ಪ್ರೇಕ್ಷಕರ ಮನಗೆದ್ದಿದ್ದರು.  

ಭರತ್ ಸ್ಟೋರ್ಸ್ ಸಿನಿಮಾವನ್ನು ಪಿ.ಶೇಷಾದ್ರಿ ನಿರ್ದೇಶನ ಮಾಡಿದ್ದರು. ಈ ಚಿತ್ರದಲ್ಲಿ ಗೋವಿಂದ ಶೆಟ್ಟಿ ಎಂಬ ಪಾತ್ರವನ್ನು ದತ್ತಣ್ಣ ನಿರ್ವಹಿಸಿದ್ದರು. ದತ್ತಣ್ಣ, ಸುಧಾರಾಣಿ, ವೆಂಕಟರಾವ್, ಪದ್ಮಕಲಾ ಮುಂತಾದವರಿದ್ದ ಈ ಸಿನಿಮಾದಲ್ಲಿ ಮಾಲ್‌ಗಳು, ಮೆಗಾಮಾರ್ಟ್, ಮೆಗಾ ಸ್ಟೋರ್‌ಗಳ ದಾಳಿಯಿಂದ ಸಣ್ಣ-ಪುಟ್ಟ ವ್ಯಾಪಾರಿಗಳು ಹೇಗೆ ನಾಶವಾಗುತ್ತಾರೆ ಎಂಬುದನ್ನು ಮಾರ್ಮಿಕವಾಗಿ ಚಿತ್ರಿಸಲಾಗಿತ್ತು. ಈ ಚಿತ್ರ ೬೦ನೇ ರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಕನ್ನಡದ ಅತ್ಯುತ್ತಮ ಚಲನಚಿತ್ರ ಪ್ರಶಸ್ತಿ ಗೆದ್ದುಕೊಂಡಿತ್ತು.