ಒಬ್ಬರು ಡ್ಯಾನ್ಸ್ ಲೋಕದ ಚಿನ್ನ, ಇನ್ನೊಬ್ಬರ ಕನ್ನಡ ಕೇಳೋದೆ ಚೆನ್ನ: ಈ ವಾರ ವೀಕೆಂಡ್ ವಿತ್ ರಮೇಶ್‌ ಅತಿಥಿಗಳು ಇವರೇ!

ನೃತ್ಯ ನಿರ್ದೇಶಕ, ಕಲಾ ನಿರ್ದೇಶಕ, ನಟ, ನಿರ್ದೇಶಕ ಮತ್ತು ಚಿತ್ರಕಥೆ ಬರಹಗಾರ ಚಿನ್ನಿ ಪ್ರಕಾಶ್ ಅವರು ಈ ವಾರ ವೀಕೆಂಡ್ ವಿತ್ ರಮೇಶ್‌ನ ಮೊದಲ ಅತಿಥಿಯಾಗಿ ಆಗಮಿಸುತ್ತಿದ್ದಾರೆ.  ಇವರು ಹಲವರು ಬಾಲಿವುಡ್ ಸೇರಿದಂತೆ ಕನ್ನಡ, ತೆಲುಗು ಚಿತ್ರಗಳಿಗೆ ನೃತ್ಯ ಸಂಯೋಜನೆ ಮಾಡಿದ್ದಾರೆ. ಚಿಕ್ಕಂದಿನಿಂದಲೂ ಹಿಂದಿ ಸಿನಿಮಾಗಳಲ್ಲಿ ನಟಿಸಬೇಕೆಂಬ ಆಸೆ ಹೊಂದಿದ್ದ ಇವರು, ಓದು ಮುಗಿಸಿ ಬಾಂಬೆಗೆ ತೆರಳಿದರು. ಕಾಲಕ್ರಮೇಣ ಹಲವು ನೃತ್ಯ ನಿರ್ದೇಶಕರ ಬಳಿ ಸಹಾಯಕರಾಗಿ ಕೆಲಸ ಮಾಡಿದ ಇವರು ಇಂದು ಭಾರತದ ಜನಪ್ರಿಯ ನೃತ್ಯ ನಿರ್ದೇಶಕರಾಗಿ ಗುರುತಿಸಿಕೊಂಡಿದ್ದಾರೆ. ಚಿನ್ನಿ ಮಾಸ್ಟರ್ ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ ಡ್ಯಾನ್ಸ್ ಕರ್ನಾಟಕ ಡ್ಯಾನ್ಸ್‌ ಶೋನ ಜಡ್ಜ್‌ ಆಗಿದ್ದರು.  ಚಿನ್ನಿ ಮಾಸ್ಟರ್ ಭಾರತದ ಫೇಮಸ್ ನೃತ್ಯ ನಿರ್ದೇಶಕರಾಗುವುದಕ್ಕೂ ಮುನ್ನ ಸಾಕಷ್ಟು ಕಷ್ಟದ ಹಾದಿಯನ್ನೇ ಸವೆಸಿದ್ದಾರೆ. ಯಶಸ್ಸು ಗಳಿಸುವ ಮುನ್ನ ಸೋಲು-ಗೆಲುವು ಎಂಬುದು ಎಲ್ಲರ ಜೀವನದಲ್ಲೂ ಇದ್ದಿದ್ದೆ. ಕಷ್ಟವೇ ಪಡದೆ, ಅವಮಾನವನ್ನೇ ಎದುರಿಸದೆ ಗೆದ್ದವರು ಯಾರು ಇಲ್ಲ. ಚಿನ್ನಿ ಮಾಸ್ಟರ್ ಕೂಡ ಅಂತಹ ಕಷ್ಟಗಳನ್ನು ಎದುರಿಸಿ, ಇಂದು ಇಷ್ಟು ಹೆಸರು ಗಳಿಸಿದ್ದಾರೆ. 

ಈ ವಾರ ವೀಕೆಂಡ್ ವಿತ್ ರಮೇಶ್‌ ಕಾರ್ಯಕ್ರಮದ ಎರಡನೇ ಅತಿಥಿಯಾಗಿ ಡಾ. ನಾ ಸೋಮೇಶ್ವರ್ ಆಗಮಿಸಲಿದ್ದಾರೆ. ಇವರು ಚಂದನ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ 'ಥಟ್ ಅಂತ ಹೇಳಿ' ಕಾರ್ಯಕ್ರಮದ ಮೂಲಕ ಪ್ರಸಿದ್ಧರಾಗಿದ್ದಾರೆ. ಬೆಂಗಳೂರಿನ ಮಲ್ಲೇಶ್ವರದಲ್ಲಿ ಜನಿಸಿದ ಇವರು, ವಿದ್ಯಾರ್ಥಿಯಾಗಿದ್ದಾಗಲೇ 'ಜೀವನಂದಿ' ಎಂಬ ಮಾಸ ಪತ್ರಿಕೆಯನ್ನು ಪ್ರಕಟಿಸಿದ್ದರು. ವೃತ್ತಿಯಲ್ಲಿ ವೈದ್ಯರಾದ ಇವರು, ಇಂದು ಫಾರ್ಮಸ್ಯೂಟಿಕಲ್ ಕಂಪನಿಗೆ ಸಲಹೆಗಾರರಾಗಿದ್ದಾರೆ. ಇವರ ಸಾರಥ್ಯದ 'ಥಟ್ ಅಂತ ಹೇಳಿ' ಕಾರ್ಯಕ್ರಮ 400ಕ್ಕೂ ಹೆಚ್ಚು ಸಂಚಿಕೆಗಳನ್ನು ಪೂರೈಸುವ ಮೂಲಕ ಭಾರತದ ಟೆಲಿವಿಷನ್ ಇತಿಹಾಸದಲ್ಲೇ ದಾಖಲೆ ಸೃಷ್ಟಿಸಿದೆ.  

ನೃತ್ಯ ನಿರ್ದೇಶಕ ಚಿನ್ನಿ ಪ್ರಕಾಶ್ ಮತ್ತು ಡಾ. ನಾ ಸೋಮೇಶ್ವರ್ ಸಾಧಕರ ಕುರ್ಚಿಯಲ್ಲಿ ಕುಳಿತಿರುವ ಬ್ಲರ್ ಫೋಟೋ ಹಂಚಿಕೊಂಡಿರುವ ಜೀ ಕನ್ನಡ ವಾಹಿನಿ,ಈ  ವೀಕೆಂಡ್ ಕುರ್ಚಿಯಲ್ಲಿ ಕುಳಿತಿರುವ ಅತಿಥಿ ಯಾರು? ಗೆಸ್ ಮಾಡಿ ಎಂದು ಹೇಳಿದೆ. 

ಹಿಂದಿನ ವಾರ  ವೀಕೆಂಡ್ ವಿತ್ ರಮೇಶ್‌ ಕಾರ್ಯಕ್ರಮದ ಅತಿಥಿಯಾಗಿ ನಟ ಲವ್ಲಿ ಸ್ಟಾರ್ ಪ್ರೇಮ್ ಆಗಮಿಸಿದ್ದರು. ನಟ ಪ್ರೇಮ್ ಈ ಕಾರ್ಯಕ್ರಮದಲ್ಲಿ ತಮ್ಮ ಕಷ್ಟದ ದಿನಗಳು ಮತ್ತು ಪತ್ನಿಯ ತ್ಯಾಗ ಸೇರಿದಂತೆ ತಮ್ಮ ಜೀವನದ ಅನೇಕ ವಿಚಾರಗಳನ್ನು ಪ್ರೇಕ್ಷಕರ ಮುಂದೆ ತೆರೆದಿಟ್ಟಿದ್ದರು. 

ವೀಕೆಂಡ್ ವಿತ್ ರಮೇಶ್ ಕಾರ್ಯಕ್ರಮಕ್ಕೆ ಹೆಚ್ಚಾಗಿ ಚಿತ್ರರಂಗದವರೇ ಆಗಮಿಸುತ್ತಾರೆ. ಹೀಗಾಗಿ ಪ್ರೇಕ್ಷಕರು ಪ್ರತಿಬಾರಿಯೂ ಸಿನಿರಂಗದರನ್ನೇ ಕರೆಸುವ  ಬದಲು ರೈತರು, ಸೈನಿಕರು ಹಾಗೂ ಇತರ ಸಾಧಕರನ್ನು ಕರೆಸಬೇಕು ಎಂದು ಅಭಿಪ್ರಾಯಪಡುತ್ತಿದ್ದಾರೆ.