ನಿರ್ದೇಶನದಿಂದ ನಟನೆ: 'ಸಪ್ತ ಸಾಗರದಾಚೆ ಎಲ್ಲೋ' ವಿಲನ್ ರಮೇಶ್ ಇಂದಿರಾ ಕುರಿತ ಇಂಟರೆಸ್ಟಿಂಗ್ ವಿಷಯಗಳು ಇಲ್ಲಿವೆ.

ರಮೇಶ್ ಇಂದಿರಾ ಕನ್ನಡ ಕಿರುತೆರೆಯ ಜನಪ್ರಿಯ ನಿರ್ದೇಶಕ. ಇವರು ಕೇವಲ ನಿರ್ದೇಶಕರು ಮಾತ್ರವಲ್ಲದೇ, ನಟನಾಗಿ ಹಾಗೂ ಲೇಖಕರಾಗಿಯೂ ಸಾಕಷ್ಟು ಪ್ರಸಿದ್ಧಿಯನ್ನು ಪಡೆದಿದ್ದಾರೆ. ಇವರು ಮಹಾದೇವಿ, ದೇವಿ, ಅಮ್ನೋರು, ನಮ್ಮಮ್ಮ ಶಾರದೆ, ಯಾರೇ ನೀ ಮೋಹಿನಿ ಹಾಗೂ ಸದ್ಯ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಒಲವಿನ ನಿಲ್ದಾಣ ಧಾರಾವಾಹಿಗಳನ್ನು ನಿರ್ದೇಶನ ಮಾಡಿದ್ದಾರೆ. 

ಇವರು ಪ್ರೀಮಿಯರ್ ಪದ್ಮಿನಿ ಸಿನಿಮಾವನ್ನು ನಿರ್ದೇಶನ ಮಾಡುವ ಮೂಲಕ ಸ್ಯಾಂಡಲ್‌ವುಡ್‌ಗೆ ಎಂಟ್ರಿಕೊಟ್ಟರು. ಈ ಚಿತ್ರದಲ್ಲಿ ನವರಸ ನಾಯಕ ಜಗ್ಗೇಶ್, ಮಧೂ, ಸುಧಾರಾಣಿ,ಪ್ರಮೋದ್ ಮಂಜು ಮುಖ್ಯಪಾತ್ರದಲ್ಲಿ ಅಭಿನಯಿಸಿದ್ದರು. ದಾಂಪತ್ಯ ಸಂಬಂಧದ ಕುರಿತಾಗಿದ್ದ ಈ ಸಿನಿಮಾದಲ್ಲಿ ಹಳೆ ಕಾಲದ ಸಂಪ್ರದಾಯ ಆಚಾರ-ಸಂಪ್ರದಾಯಗಳಿಗೆ ಕಟ್ಟು-ಬೀಳುವ ಗಂಡ ಮತ್ತು ಆಧುನಿಕ ಜೀವನದ ರೀತಿ ಇರಬೇಕನ್ನುವ ಹೆಂಡತಿಯ ಭಾವನೆಗಳನ್ನು ಹೆಣೆಯಲಾಗಿತ್ತು. 

ರಮೇಶ್ ಇಂದಿರಾ ಅವರು ಕೆಜಿಎಫ್ ಚಾಪ್ಟರ್ 1 ಸಿನಿಮಾದಲ್ಲಿ ಸೂರ್ಯನಾರಾಯಣ ಎಂಬ ಪಾತ್ರದ ಮೂಲಕ ಗಮನ ಸೆಳೆದಿದ್ದರು. ಸಿನಿಮಾದಲ್ಲಿ ಮಲಗಿಕೊಂಡೇ ಭಯ ಹುಟ್ಟಿಸಿದ್ದ ಇವರು ಗರುಡ ಹಾಗೂ ವಿರಾಟ್ ತಂದೆಯಾಗಿ ಕಾಣಿಸಕೊಂಡಿದ್ದರು. 

ರಕ್ಷಿತ್ ಶೆಟ್ಟಿ ಅಭಿನಯದ ಸಪ್ತ ಸಾಗರದಾಚೆ ಎಲ್ಲೋ ಸಿನಿಮಾದಲ್ಲೂ ರಮೇಶ್ ಇಂದಿರಾ ವಿಲನ್ ಪಾತ್ರದಲ್ಲಿ ಗಮನ ಸೆಳೆದಿದ್ದಾರೆ. ಚಿತ್ರದಲ್ಲಿ ಅವರು ಸೋಮ ಎಂಬ ಪಾತ್ರವನ್ನು ನಿರ್ವಹಿಸಿದ್ದಾರೆ. ಚಿತ್ರದಲ್ಲಿ ಸೋಮ ಹೇಳುವ ಡೈಲಾಗ್ ಕೂಡ ಸಖತ್ ಹಿಟ್ ಆಗ್ತಿದೆ. ಈ ಸಿನಿಮಾದಲ್ಲಿ ಆರಂಭದಲ್ಲಿ ಮನು ಬಳಿ (ರಕ್ಷಿತ್ ಶೆಟ್ಟಿ) ಒಳ್ಳೆಯನಾಗಿ ಕಾಣಿಸಿಕೊಳ್ಳುವ ಅವರು, ನಂತರದಲ್ಲಿ ತಮ್ಮ ಅಸಲಿ ಮುಖ ತೋರಿಸುತ್ತಾರೆ. ಸಪ್ತ ಸಾಗರದಾಚೆ ಎಲ್ಲೋ ಎರಡನೇ ಭಾಗದಲ್ಲೂ ಇವರ ಪಾತ್ರದಕ್ಕೆ ಹೆಚ್ಚಿನ ಆದ್ಯತೆ ನೀಡಿರುವ ನಿರೀಕ್ಷೆಯಿದೆ.  

ಶೃತಿ ನಾಯ್ಡು ಚಿತ್ರ' ಪ್ರೊಡಕ್ಷನ್ ಚಿತ್ರದ ಕ್ರಿಯೇಟಿವ್ ಹೆಡ್ ಆಗಿರುವ ರಮೇಶ್ ಇಂದಿರಾ, ತಮ್ಮ ನಿರ್ದೇಶನದ 'ಮಹಾದೇವಿ' ಮುಂತಾದ ಸೀರಿಯಲ್‌ಗಳನ್ನು ನಿರ್ಮಿಸಿದ್ದಾರೆ. ಇಷ್ಟುದಿನ ನಿರ್ದೇಶಕರಾಗಿ ಹೆಚ್ಚು ಜನಪ್ರಿಯತೆ ಗಳಿಸಿದ್ದ ಇವರು, ಸಪ್ತ ಸಾಗರದಾಚೆ ಎಲ್ಲೋ ಸಿನಿಮಾದಲ್ಲಿ ತಮ್ಮ ಅದ್ಭುತ ನಟನೆ ಮೂಲಕ ಸಿನಿರಸಿಕರ ಮನಗೆದ್ದಿದ್ದಾರೆ.