ಸ್ಯಾಂಡಲ್‌ವುಡ್ ಸ್ಟಾರ್ ಹೀರೋಗಳನ್ನು Ultimate ಆಗಿ ತೋರಿಸಿದ ನಿರ್ದೇಶಕರಿವರು!

ಕರ್ನಾಟಕಕ್ಕೆ ಮಾತ್ರ ಸೀಮಿತವಾಗಿದ್ದ ಕಿಚ್ಚ ಸುದೀಪ್ ಅವರ ಟ್ಯಾಲೆಂಟ್ ಅನ್ನು ಹೊರಗಡೆ ಪರಿಚಯಿಸಿದ್ದು ಬಾಲಿವುಡ್‌ನ ಆರ್‌ಜಿವಿ. 2010ರಲ್ಲಿ ತೆರೆಕಂಡ ಆರ್‌ಜಿವಿ ನಿರ್ದೇಶನದ 'ರಣ್' ಚಿತ್ರದಲ್ಲಿ ಸುದೀಪ್ ಅವರು ಅಮಿತಾಭ್ ಬಚ್ಚನ್ ಮಗನಾಗಿ ಕಾಣಿಸಿಕೊಂಡಿದ್ದರು. ಈ ಸಿನಿಮಾದಲ್ಲಿನ ಕಿಚ್ಚನ ಆಕ್ಟಿಂಗ್ ನೋಡಿದ ರಾಜಮೌಳಿ ಅವರು 'ಈಗ' ಸಿನಿಮಾಗೆ ಆಯ್ಕೆ ಮಾಡಿದ್ರು. 'ಈಗ'ದಲ್ಲಿ ಇಲ್ಲದಿರುವ ನೊಣವನ್ನ ಇದೆ ಅಂತ ಇಮ್ಯಾಜಿನ್ ಮಾಡಿಕೊಂಡು ನಟಸಿದ ಕಿಚ್ಚ ನಟನೆ ನೋಡಿ ಎಲ್ಲ ಭಾಷೆಯ ಸಿನಿರಸಿಕರು ಫಿದಾ ಆಗಿದ್ದರು. ಈ ಸಿನಿಮಾ ನಮ್ಮ ದೇಶ ಮಾತ್ರವಲ್ಲದೇ, ಹೊರದೇಶದಲ್ಲೂ ಸದ್ದು ಮಾಡಿತ್ತು. ಇದಾದ ಬಳಿಕ ಚಿರಂಜೀವಿ, ಸಲ್ಮಾನ್ ಖಾನ್ , ದಳಪತಿ ವಿಜಯ್ ಸೇರಿದಂತೆ ಹಲವು ಪರಭಾಷಾ ನಟನರ ಸಿನಿಮಾಗಳಲ್ಲಿ ಸುದೀಪ್ ಮಿಂಚಿದ್ರು.

ರೋರಿಂಗ್ ಸ್ಟಾರ್ ಶ್ರೀಮುರಳಿ ಅಭಿನಯದ ಚೊಚ್ಚಲ ಚಿತ್ರ ಚಂದ್ರಚಕೋರಿ. ಎಸ್ ನಾರಾಯಣ್ ನಿರ್ದೇಶನದ ಈ ಸಿನಿಮಾ ಸೂಪರ್ ಹಿಟ್ ಆಗುವುದರ ಜೊತೆಗೆ ಗಲ್ಲಾಪೆಟ್ಟಿಗೆಯಲ್ಲಿ ಒಳ್ಳೆ ಗಳಿಕೆ ಕಂಡಿತ್ತು. ಸತತ ಎರಡು ವರ್ಷಗಳ ಕಾಲ ಪ್ರದರ್ಶನ ಕಂಡ  ಈ ಚಿತ್ರವನ್ನು 2013ರಲ್ಲಿ ಒಡಿಯಾ ಭಾಷೆಯಲ್ಲಿ ರಿಮೇಕ್ ಮಾಡಲಾಯಿತು. ಇದಾದ ಬಳಿಕ ಬಂದ ಯಾವ ಸಿನಿಮಾಗಳು ಶ್ರೀಮುರಳಿಯವರ ಕೈಹಿಡಿಯಲಿಲ್ಲ. ಸತತ ಸೋಲುಗಳಿಂದ ಕಂಗೆಟ್ಟಿದ್ದ ಶ್ರೀಮುರಳಿಗೆ ಮರುಜೀವ ಕೊಟ್ಟಿದ್ದು ಪ್ರಶಾಂತ್ ನೀಲ್ ನಿರ್ದೇಶನದ ಉಗ್ರಂ. ನೀಲ್ ಈ ಸಿನಿಮಾದಲ್ಲಿ ಶ್ರೀಮುರಳಿ ಅವರನ್ನು ಮಾಸ್ ಹೀರೋ ಅಲ್ಟಿಮೇಟ್ ಆಗಿ ತೋರಿಸಿದ್ದರು. ಇದು ಅವರ ಸಿನಿಕರಿಯರ್‌ಗೆ ಬಿಗ್‌ ಬೂಸ್ಟ್ ನೀಡಿತು. ರೋರಿಂಗ್ ಸ್ಟಾರ್ ಮುಂದಿನ ಸಿನಿಮಾ 'ಬಘೀರ'ಗೂ ಪ್ರಶಾಂತ್ ನೀಲ್ ಅವರೇ ಕಥೆ ಬರೆದಿದ್ದು, ಈ ಚಿತ್ರದ ಮೇಲೂ ಸಾಕಷ್ಟು ನಿರೀಕ್ಷೆಗಳಿವೆ.

ರಾಕಿಂಗ್ ಸ್ಟಾರ್ ಯಶ್ ಇಂದು ಪ್ರಪಂಚದಾದ್ಯಂತ ರಾಕಿಭಾಯ್ ಅಂತಲೇ ಜನಪ್ರಿಯತೆ ಪಡೆದಿದ್ದಾರೆ.  ಯಶ್ ಅವರನ್ನು ಮಾಸ್ ಹೀರೋ ಆಗಿ ಮಾಡಿ, ದೊಡ್ಡ ಸಕ್ಸಸ್ ತಂದುಕೊಟ್ಟ ಸಿನಿಮಾ ರಾಜಾಹುಲಿ. ಆನಂತರ ಯಶ್ ಅವರ ಎಲ್ಲಾ ಸಾಮರ್ಥ್ಯಗಳನ್ನು ಬಳಸಿಕೊಂಡು ಬ್ಲ್ಯಾಕ್ ಬಸ್ಟರ್ ಸಿನಿಮಾ ಕೊಟ್ಟಿದ್ದು ಸಂತೋಷ್ ಆನಂತ್ ರಾಮ್. ರಾಮಾಚಾರಿ ಸಿನಿಮಾ ಮೂಲಕ ಯಶ್ ಆಕ್ಷನ್, ಲವ್, ಸೆಂಟಿಮೆಂಟ್ ಎಲ್ಲದರಲ್ಲೂ ತಮ್ಮ ಛಾಪು ಮೂಡಿಸಿದ್ದರು. ಇದಾದ ಬಳಿಕ ಯಶ್ ಅವರ ಟ್ಯಾಲೆಂಟ್ ಬಳಸಿಕೊಂಡು ಭಾರತ ಮಾತ್ರವಲ್ಲ, ವಿದೇಶಿಗರು ನಿಬ್ಬೆರಗಾಗುವಂತೆ ಸಿನಿಮಾ ಮಾಡಿದವರು ಪ್ರಶಾಂತ್ ನೀಲ್. ಇಡೀ ದೇಶವೇ ಕನ್ನಡ ಚಿತ್ರರಂಗದತ್ತ ತಿರುಗಿ ನೋಡುವಂತೆ ಮಾಡಿದ್ದ ಸಿನಿಮಾ ಕೆಜಿಎಫ್. ಕೆಜಿಎಫ್ ಸಿನಿಮಾ ಬರುವ ಮುನ್ನ ಕನ್ನಡಕ್ಕೆ ಮಾತ್ರ ಸ್ಟಾರ್ ಆಗಿದ್ದ ಯಶ್, ಈ ಸಿನಿಮಾ ಬಳಿಕ ಪ್ಯಾನ್ ಇಂಡಿಯಾ ಸ್ಟಾರ್ ಆದರು. ಸದ್ಯ ಅವರ ಮುಂದಿನ ಸಿನಿಮಾ ಟಾಕ್ಸಿಕ್‌ಗಾಗಿ ಪ್ರೇಕ್ಷಕರು ಕಾತರದಿಂದ ಕಾಯುತ್ತಿದ್ದಾರೆ.

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರನ್ನು ಇಡೀ ಕರ್ನಾಟಕವೇ ಮೆಚ್ಚುವಂತಹ ಮಾಸ್ ಹೀರೋವನ್ನಾಗಿ ಮಾಡಿದ್ದು ಓಂ ಪ್ರಕಾಶ್ ರಾವ್ ನಿರ್ದೇಶನದ ಕಲಾಸಿಪಾಳ್ಯ ಸಿನಿಮಾ. 2004ರಲ್ಲಿ ಬಂದ 'ಕಲಾಸಿಪಾಳ್ಯ' ಸಿನಿಮಾ ಚಾಲೆಂಜಿಂಗ್ ಹೀರೋಗೆ ಇನ್ನೂ ದೊಡ್ಡ ಇಮೇಜ್ ತಂದುಕೊಡ್ತು. ಈ ಸಿನಿಮಾ ಬಳಿಕ ಚಾಲೆಂಜಿಂಗ್ ಹೀರೋ ಆಗಿದ್ದ ದರ್ಶನ್ ಚಾಲೆಂಜಿಂಗ್ ಸ್ಟಾರ್ ಆದರು. ಇನ್ನು ದರ್ಶನ್ ಅವರನ್ನು ಸಮರ್ಥಕವಾಗಿ ಬಳಸಿಕೊಂಡು ಮತ್ತೋರ್ವ ನಿರ್ದೇಶಕ ಜೋಗಿ ಪ್ರೇಮ್. ತಮ್ಮ ಮೊದಲ ಸಿನಿಮಾ 'ಕರಿಯಾ'ದಲ್ಲಿ ದರ್ಶನ್ ಅವರನ್ನು ಖಡಕ್ ಆಗಿ ತೋರಿಸಿದ್ದರು. ರಿಯಲ್ ರೌಡಿಗಳನ್ನು ಬಳಸಿಕೊಂಡು ನಿರ್ದೇಶಕ ಪ್ರೇಮ್ ಈ ಸಿನಿಮಾಗೆ ಆ್ಯಕ್ಷನ್ ಕಟ್ ಹೇಳಿದ್ದರು. ರೌಡಿಸಂ ಕಥೆ ಆಧರಿಸಿದ್ದ ಕರಿಯ ಚಿತ್ರ 8 ಕೋಟಿ ಕಲೆಕ್ಷನ್ ಮಾಡುವ ಮೂಲಕ ದರ್ಶನ್​​​​​​​​​​ಗೆ ಸ್ಟಾರ್ ವ್ಯಾಲ್ಯೂ ತಂದು ಕೊಟ್ಟಿತ್ತು.

ಪವರ್‌ಸ್ಟಾರ್ ಪುನೀತ್ ರಾಜ್‌ಕುಮಾರ್ ನಾಯಕನಾಗಿ ಎಂಟ್ರಿ ಕೊಟ್ಟ ಮೊದಲ ಸಿನಿಮಾ 'ಅಪ್ಪು'. ಈ ಸಿನಿಮಾಕ್ಕೆ ಪುರಿ ಜಗನ್ನಾಥ್ ಆಕ್ಷನ್ ಕಟ್ ಹೇಳಿದ್ದರು. ಲವ್‌ಸ್ಟೋರಿ, ಆಕ್ಷನ್, ಕಾಮಿಡಿ ಎಲ್ಲಾ ಎಲಿಮೆಂಟ್ಸ್‌ ಹೊಂದಿದ್ದ ಈ ಸಿನಿಮಾದಲ್ಲಿ ಪುನೀತ್ ಅವರ ಬಾಡಿ ಲಾಂಗ್ವೇಜ್, ಡೈಲಾಗ್ ಡೆಲವರಿ, ಡ್ಯಾನ್ಸ್ ಎಲ್ಲವೂ ಯುವಕರಿಗೆ ಸಖತ್ ಇಷ್ಟವಾಗಿತ್ತು. ಅಪ್ಪು ಅವರ ನಟನಾ ಸಾಮರ್ಥ್ಯವನ್ನು ಅದ್ಭುತವಾಗಿ ಬಳಿಸಿಕೊಂಡ ಮತ್ತೊಬ್ಬ ನಿರ್ದೇಶಕ ಪ್ರೇಮ್. ರಾಜ್ ಸಿನಿಮಾದ ಪುನೀತ್ ಅವರ ನಟನೆಗೆ ಭೇಷ್ ಎನ್ನಲೇಬೇಕು.

ಸ್ಯಾಂಡಲ್‌ವುಡ್‌ನಲ್ಲಿ ವಿಕಟಕವಿ ಅಂತಲೇ ಖ್ಯಾತಿ ಪಡೆದಿರುವ ಯೋಗರಾಜ್‌ ಭಟ್ ಅವರ ಲವಲವಿಕೆಯ ಬರವಣಿಗೆಗೆ ನ್ಯಾಯ ಸಲ್ಲಿಸುವ ಅಪರೂಪದ ನಟ ಗೋಲ್ಡನ್ ಸ್ಟಾರ್ ಗಣೇಶ್. ಇವರ ಎಮೋಷನಲ್ ಫರ್ಫಾಮೆನ್ಸ್, ಡೈಲಾಗ್ ಡೆಲವರಿ, ಕಾಮಿಡಿ ಟೈಮಿಂಗ್ ಎಲ್ಲವನ್ನು ಅತ್ಯುತ್ತಮವಾಗಿ ಬಳಿಸಿಕೊಳ್ಳುವ ನಿರ್ದೇಶಕ ಯೋಗರಾಜ್‌ ಭಟ್. ಇವರಿಬ್ಬರ ಕಾಂಬಿನೇಷನ್‌ನಲ್ಲಿ ಬಂದಂತಹ ಮುಂಗಾರುಮಳೆ, ಗಾಳಿಪಟ, ಗಾಳಿಪಟ ೨, ಮುಗುಳುನಗೆ ಸಿನಿಮಾಗಳು ಪ್ರೇಕ್ಷಕರ ಮನಗೆದ್ದಿವೆ.

ರಿಯಲ್ ಸ್ಟಾರ್ ಉಪೇಂದ್ರ ಅವರನ್ನು ನಟನಾಗಿ ಸಮರ್ಥವಾಗಿ ಬಳಸಿಕೊಂಡಿರುವುದು ಉಪ್ಪಿಯವರೇ. ಅವರು ನಿರ್ದೇಶಿಸಿ, ನಟಿಸಿರುವ ಉಪೇಂದ್ರ, ಎ, ಸೂಪರ್ ಸಿನಿಮಾಗಳೇ ಇದಕ್ಕೆ ಸಾಕ್ಷಿ. ಆ ಪಾತ್ರಗಳಲ್ಲಿ ಉಪ್ಪಿಯವರನ್ನು ಬಿಟ್ಟು ಬೇರೆ ಯಾರನ್ನು ಇಮ್ಯಾಜಿನ್ ಮಾಡಿಕೊಳ್ಳಲು ಸಾಧ್ಯವಿಲ್ಲ. ಅಷ್ಟರಮಟ್ಟಿಗೆ ಅವರ ಪಾತ್ರಗಳ ಮೂಲಕ ಜಾದು ಮಾಡಿದ್ದಾರೆ ಉಪ್ಪಿಯವರು.

2005ರಲ್ಲಿ ತೆರೆಕಂಡ ಪ್ರೇಮ್ ಹಾಗೂ ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಕಾಂಬಿನೇಷನ್‌ನ 'ಜೋಗಿ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಚಿತ್ರದಲ್ಲಿ ಭೂಗತ ಲೋಕದ ಛಾಯೆಯೊಂದಿಗೆ ಮಾತೃವಾತ್ಸಲ್ಯವನ್ನು ನಿರ್ದೇಶಕ ಪ್ರೇಮ್ ಅದ್ಭುತವಾಗಿ ಕಟ್ಟಿಕೊಟ್ಟಿದ್ದರು. ಶಿವಣ್ಣ ಈ ಚಿತ್ರದಲ್ಲಿ ಅದ್ಭುತವಾಗಿ ನಟಿಸಿದ್ದು, ರಾಜ್ಯ ಪ್ರಶಸ್ತಿ ಪಡೆದಿದ್ದರು.  ಈ ಸಿನಿಮಾ ಕರ್ನಾಟಕದ 60ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ 100ಕ್ಕೂ ಹೆಚ್ಚು ದಿನ ಪ್ರದರ್ಶನ ಕಾಣುವ ಮೂಲಕ ಸ್ಯಾಂಡಲ್‌ವುಡ್‌ನಲ್ಲಿ ದಾಖಲೆ ನಿರ್ಮಿಸಿದೆ. ಈ ಸಿನಿಮಾದ ಬಳಿಕ ಪ್ರೇಮ್ ಜೋಗಿ ಪ್ರೇಮ್ ಎಂದೇ ಖ್ಯಾತಿ ಗಳಿಸಿದರು.  ಇನ್ನು ಈ ಸಿನಿಮಾದ ಎಲ್ಲಾ ಹಾಡುಗಳು ಸೂಪರ್ ಹಿಟ್ ಆಗಿದ್ದವು.