ಭೀಮಾ ಸಿನಿಮಾದ ಖಡಕ್ ಪೊಲೀಸ್ ಆಫೀಸರ್ ಗಿರಿಜಾ ಹಿನ್ನೆಲೆ ಏನು ಗೊತ್ತಾ? ಇಲ್ಲಿದೆ ಮಾಹಿತಿ.

ಭೀಮಾ ಸಿನಿಮಾದಲ್ಲಿ ಖಡಕ್ ಪೊಲೀಸ್ ಅಧಿಕಾರಿಯಾಗಿ ಮಿಂಚಿರುವ ನಟಿಯ ಹೆಸರು ಪ್ರಿಯಾ ಶಠಮರ್ಷಣ. ಇವರು ಮೂಲತಃ ಸಾಂಸ್ಕೃತಿಕ ನಗರಿ ಮೈಸೂರಿನವರು. ಸಂಪ್ರದಾಯಸ್ತ ಕುಟುಂಬದಲ್ಲಿ ಹುಟ್ಟಿ ಬೆಳೆದ ಈ ನಟಿಗೆ ಚಿಕ್ಕಂದಿನಿಂದಲೂ ನಟನೆಯಲ್ಲಿ ಅಪಾರ ಆಸಕ್ತಿ. ಅದರಂತೆ ಬಣ್ಣದ ಲೋಕಕ್ಕೆ ಎಂಟ್ರಿಕೊಟ್ಟರು. 

ಪ್ರಿಯಾ ಶಠಮರ್ಷಣ ಅವರು ಕಳೆದ 16 ವರ್ಷಗಳಿಂದ ರಂಗಭೂಮಿಯಲ್ಲಿ ತೊಡಗಿಸಿಕೊಂಡಿದ್ದಾರೆ. ರಂಗಭೂಮಿಯನ್ನೇ ನನ್ನ ತವರು ಎನ್ನುವ ಇವರು, ಮಂಡ್ಯ ರಮೇಶ್ ಅವರ 'ನಟನಾ' ತಂಡದ ಹಲವು ನಾಟಕಗಳಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಪೈಕಿ ಚಾಮ ಚೆಲುವೆ ಹಲವು ಪ್ರದರ್ಶನ ಕಂಡಿದೆ. ನಿನ್ನೆಯ ನಾಳೆ ಎಂಬ ಏಕವ್ಯಕ್ತಿ ನಾಟಕವನ್ನು ಪ್ರಿಯಾ ಪ್ರದರ್ಶಿಸಿದ್ದಾರೆ. 

ಪ್ರಿಯಾ ಅವರು ಈ ಹಿಂದೆ ರಾಮಾ ರಾಮಾ ರೇ, ಚೇಸ್, ಮಂಸೂರೆ,  19-20-202, 1ಸೈಡ್ ವಿಂಗ್, ಜೀನಿಯಸ್ ಮುತ್ತ ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ. ಜೊತೆಗೆ ರಾಷ್ಟ್ರ ಪ್ರಶಸ್ತಿ ವಿಜೇತ 'ಒಂದಲ್ಲಾ ಎರಡಲ್ಲಾ' ಸಿನಿಮಾಗೆ ಕಾಸ್ಟ್ಯೂಮ್ ಡಿಸೈನರ್ ಆಗಿ ಕೆಲಸ ಮಾಡಿದ್ದಾರೆ. 

ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಈ ಹಿಂದೆ ಪ್ರಸಾರವಾಗಿದ್ದ 'ಲಕ್ಷಣ' ಧಾರಾವಾಹಿ ವಿಲನ್ ಡೆವಿಲ್ ಅಲಿಯಾಸ್ ಭಾರ್ಗವಿ ಪಾತ್ರಕ್ಕೆ ಪ್ರಿಯಾ ಬಣ್ಣಹಚ್ಚಿದ್ದರು. ಈ ಪಾತ್ರಕ್ಕೆ ಸಹ ಸಿಕ್ಕಾಪಟ್ಟೆ ಮೆಚ್ಚುಗೆ ವ್ಯಕ್ತವಾಗಿತ್ತು. ಇವರ ಪತಿ ಅವಿನಾಶ್ ಕೂಡ ನಟ ಹಾಗೂ ರಂಗಭೂಮಿ ಕಲಾವಿದರಾಗಿದ್ದಾರೆ. 

ಚಿಕ್ಕವಯಸ್ಸಿನಲ್ಲಿ ಐಪಿಎಸ್ ಮಾಡಬೇಕೆಂಬ ಆಸೆಯೂ ಪ್ರಿಯಾ ಅವರಿಗಿತ್ತು. ಆದರೆ, ಅದು ಸಾಧ್ಯವಾಗಿರಲಿಲ್ಲ. ಭೀಮಾ ಮೂಲಕ ಅವರ ಕನಸು ಈಡೇರಿದೆ. ಸೋಶಿಯಲ್ ಮೀಡಿಯಾದಲ್ಲಿ ಭೀಮಾ ಸಿನಿಮಾದ ಗಿರಿಜಾ ಪಾತ್ರ ಸಖತ್ ಟ್ರೆಂಡಿಂಗ್‌ನಲ್ಲಿದೆ. ಗಿರಿಜಾರಂತಹ ಖಡಕ್ ಪೊಲೀಸ್ ಆಫೀಸರ್ ಇದ್ದರೆ ಸೊಸೈಟಿ ಕ್ಲೀನ್ ಆಗುತ್ತದೆ ಅಂತ ಜನರು ಕಾಮೆಂಟ್ ಮಾಡ್ತಿದ್ದಾರೆ. ಸಿನಿಮಾ ನೋಡಿದವರೆಲ್ಲಾ ಪ್ರಿಯಾ ಪಾತ್ರಕ್ಕೆ ಬಹುಪರಾಕ್ ಹೇಳುತ್ತಿದ್ದಾರೆ.