ಅಪ್ಪು ಸಿನಿಮಾಗೆ ಪುನೀತ್ ರಾಜ್‌ಕುಮಾರ್ ಪಡೆದ ಸಂಭಾವನೆ ಎಷ್ಟು ಗೊತ್ತಾ?

ಪುನೀತ್ ಹೀರೋ ಆಗಿ ಅಭಿನಯಿಸಿದ ಮೊದಲ ಸಿನಿಮಾ ಅಪ್ಪು. 2000ರಲ್ಲಿ ಕನ್ನಡದಲ್ಲಿ ತೆರೆಕಂಡ ಈ ಸಿನಿಮಾ ನಾಲ್ಕೇ ತಿಂಗಳಿಗೆ ತೆಲುಗಿಗೆ ರಿಮೇಕ್ ಆಗಿ, ಅಲ್ಲಿಯೂ ತೆರೆಕಂಡಿತ್ತು. ತೆಲುಗು ವರ್ಷನ್‌ಗೆ ಈಡಿಯೆಟ್ ಅಂತ ಟೈಟಲ್ ಇಡಲಾಗಿತ್ತು. ಅಪ್ಪು ಚಿತ್ರಕ್ಕೆ ನಿರ್ದೇಶನ ಮಾಡಿದ್ದ ಪುರಿ ಜಗನ್ನಾಥ್ ತೆಲುಗು ವರ್ಷನ್‌ಗೂ ಆಕ್ಷನ್ ಕಟ್ ಹೇಳಿದ್ದರು. ಇದರಲ್ಲಿ ಹೀರೋ ಆಗಿ ನಟಿಸಿದ್ದ ರವಿ ತೇಜ ಸಿನಿಕರಿಯರ್‌ಗೆ 'ಈಡಿಯೆಟ್' ದೊಡ್ಡ ಬ್ರೇಕ್ ನೀಡಿತ್ತು. ನಂತರ ತಮಿಳಿನಲ್ಲಿ 'ಧಮ್‌' ಶೀರ್ಷಿಕೆಯಲ್ಲಿ ರಿಮೇಕ್ ಮಾಡಲಾಗಿತ್ತು. ತಮಿಳು ವರ್ಷನ್‌ಗೆ ಕನ್ನಡ ನಿರ್ಮಾಪಕ ರಾಕ್‌ಲೈನ್‌ ವೆಂಕಟೇಶ್ ಹಂ ಹಾಕಿದ್ದು, ಸಿಂಬು ನಾಯಕನಾಗಿ ಕಾಣಿಸಿಕೊಂಡಿದ್ದರು. ಬಳಿಕ ಅಪ್ಪು ಸಿನಿಮಾ ಬೆಂಗಾಲಿ ಭಾಷೆಗೆ 'ಹೀರೋ' ಆಗಿ, ಬಾಂಗ್ಲಾ ಭಾಷೆಗೆ 'ಪ್ರಿಯ ಅಮರ್ ಪ್ರಿಯ' ಆಗಿ ರಿಮೇಕ್ ಆಯಿತು. ಅನುರಾಗ ಅರಳಿತು ನಂತರ ವಿದೇಶಿ ಭಾಷೆಗೆ ರಿಮೇಕ್ ಆದ ಎರಡನೇ ಸಿನಿಮಾ ಅಪ್ಪು.

ಅಪ್ಪು ಸಿನಿಮಾ ರಕ್ಷಿತಾಗೆ ನಾಯಕಿಯಾಗಿ ದೊಡ್ಡ ಬ್ರೇಕ್ ನೀಡಿತ್ತು. ಅಪ್ಪು ನಂತರ ತೆಲುಗು ಹಾಗೂ ತಮಿಳು ಭಾಷೆಯ ರಿಮೇಕ್‌ಗಳಲ್ಲೂ ರಕ್ಷಿತಾ ಅವರೇ ನಾಯಕಿಯಾಗಿ ಕಾಣಿಸಿಕೊಂಡಿದ್ದರು, ಸುಚಿತ್ರಾ ಎಂಬ ಒಂದೇ ಪಾತ್ರವನ್ನು ಮೂರು ಸಿನಿಮಾಗಳಲ್ಲಿ ಕ್ರೇಜಿ ಕ್ವೀನ್ ನಿಭಾಯಿಸಿದ್ದರು.

ಅಪ್ಪು ಸಿನಿಮಾದಲ್ಲಿ ಪುನೀತ್ ಅವರ ಆಕ್ಷನ್, ಡ್ಯಾನ್ಸ್ ನೋಡಿ ಅಭಿಮಾನಿಗಳು ಕುಣಿದು ಕುಪ್ಪಳಿಸಿದ್ದರು. ಲವ್‌ಸ್ಟೋರಿ, ಆಕ್ಷನ್, ಕಾಮಿಡಿ ಎಲ್ಲಾ ಎಲಿಮೆಂಟ್ಸ್‌ ಹೊಂದಿದ್ದ ಈ  ಸಿನಿಮಾ ಥಿಯೇಟರ್‌ಗಳಲ್ಲಿ 100 ದಿನ ಅಲ್ಲ, 200 ದಿನ ಓಡಿತ್ತು. ಮೊದಲ ಸಿನಿಮಾದಲ್ಲೇ ಭರ್ಜರಿ ಯಶಸ್ಸು ಗಳಿಸಿದ ಪುನೀತ್ ಕನ್ನಡ ಸಿನಿಮಾರಂಗದಲ್ಲಿ 'ಪವರ್ ಸ್ಟಾರ್' ಅಂತ ಕರೆಸಿಕೊಂಡರು. ಅಪ್ಪು ಸಿನಿಮಾದ 100ನೇ ದಿನದ ಕಾರ್ಯಕ್ರಮಕ್ಕೆ ಸೂಪರ್ ಸ್ಟಾರ್ ರಜನಿಕಾಂತ್ ಆಗಮಿಸಿದ್ದು ವಿಶೇಷ.

ಪವರ್‌ಸ್ಟಾರ್ ಪುನೀತ್ ರಾಜ್‌ಕುಮಾರ್ ನಾಯಕನಾಗಿ ಎಂಟ್ರಿಕೊಟ್ಟ ಮೊದಲ ಸಿನಿಮಾವನ್ನು ಪಾರ್ವತಮ್ಮ ರಾಜ್‌ಕುಮಾರ್ ಅವರೇ ನಿರ್ಮಾಣ ಮಾಡಿದ್ದರು. ಈ ಚಿತ್ರ ನಿರೀಕ್ಷೆಗೂ ಮೀರಿ ಯಶಸ್ಸು ಗಳಿಸಿದ್ದರಿಂದ ಪಾರ್ವತಮ್ಮ 50,000 ನೀಡಲು ಹೋದಾಗ, ನನ್ನ ಮೊದಲ ಸಂಭಾವನೆ ನನ್ನ ಮಾತೃ ದೇವತೆಗೆ ಸಮರ್ಪಣೆ ಅಂತ ಪುನೀತ್ ಅವರಿಗೆ ಮರುನೀಡಿದ್ದರಂತೆ.