ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿರುವ 11 ಸಿನಿಮಾಗಳಿವು!

2002ರಲ್ಲಿ ಬಿಡುಗಡೆಯಾದ ವಿನೋದ್ ಪ್ರಭಾಕರ್ ಅವರು ಮೊದಲ ಬಾರಿಗೆ ನಾಯಕನಾಗಿ ನಟಿಸಿದ 'ದಿಲ್' ಸಿನಿಮಾದಲ್ಲಿ ದರ್ಶನ್ ಅತಿಥಿ ಪಾತ್ರದಲ್ಲಿ ಅಭಿನಯಿಸಿದ್ದಾರೆ. ಈ ಸಿನಿಮಾದ ಮಾತು ಸವಿಮಾತು ಹಾಡಿನಲ್ಲಿ ಚಾಲೆಂಜಿಂಗ್ ಸ್ಟಾರ್ ಕಾಣಿಸಿಕೊಂಡಿದ್ದಾರೆ.  

2003ರಲ್ಲಿ ಬಿಡುಗಡೆಯಾದ ರಮೇಶ್ ಅರವಿಂದ ಹಾಗೂ ಶ್ರೀಲಕ್ಷ್ಮೀ ಅಭಿನಯದ 'ಕುಶಲವೇ ಕ್ಷೇಮವೇ' ಸಿನಿಮಾದಲ್ಲಿ ದರ್ಶನ್ ಅವರು ನಾಯಕಿಯನ್ನು ಮದುವೆಯಾಗುವ ಹುಡುಗನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಜೊತೆಗೆ 2004ರಲ್ಲಿ ರಿಲೀಸ್ ಆದ ಧ್ಯಾನ್ ಹಾಗೂ ಸದಾ ಅಭಿನಯದ 'ಮೊನಾಲಿಸಾ' ಚಿತ್ರದ 'ಚೋರಿ ಚೋರಿ' ಎಂಬ ಸಾಂಗ್‌ನಲ್ಲಿ ದರ್ಶನ್ ಕಾಣಿಸಿಕೊಂಡಿದ್ದಾರೆ.  

2006ರಲ್ಲಿ ಬಿಡುಗಡೆಯಾದ ದರ್ಶನ್ ಸಹೋದರ ದಿನಕರ್ ತೂಗುದೀಪ್ ಮೊದಲ ಬಾರಿಗೆ ಆಕ್ಷನ್ ಕಟ್ ಹೇಳಿದ್ದ 'ಜೊತೆ ಜೊತೆಯಲಿ' ಸಿನಿಮಾದಲ್ಲಿ ಅತಿಥಿಯಾಗಿ ಕಾಣಿಸಿಕೊಂಡಿದ್ದರು. ಈ ಚಿತ್ರದಲ್ಲಿ ನೆನಪಿರಲಿ ಪ್ರೇಮ್ ಹಾಗೂ ಮೋಹಕತಾರೆ ರಮ್ಯಾ ಲೀಡ್‌ ರೋಲ್‌ನಲ್ಲಿ ಕಾಣಿಸಿಕೊಂಡಿದ್ದರು. 

2007ರಲ್ಲಿ ರಿಲೀಸ್ ಆದ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್, ಮೋಹಕತಾರೆ ರಮ್ಯಾ ಹಾಗೂ ಮೀರಾ ಜಾಸ್ಮಿನ್ ನಟನೆಯ ಟ್ರಾಯಾಂಗಲ್ ಲವ್ ಸ್ಟೋರಿ ಹೊಂದಿದ್ದ 'ಅರಸು' ಸಿನಿಮಾದಲ್ಲಿ ಕೂಡ ದರ್ಶನ್ ಅತಿಥಿಯಾಗಿ ನಟಿಸಿದ್ದರು. ಚಿತ್ರದ ಕೊನೆಯಲ್ಲಿ ಪುನೀತ್ ಗೆಳೆಯನಾಗಿ ಹಾಗೂ ರಮ್ಯಾ ಅವರನ್ನು ಮದುವೆಯಾಗುವ ಹುಡುಗನಾಗಿ ಕಾಣಿಸಿಕೊಂಡಿದ್ದರು. 

2015ರಲ್ಲಿ ಬಿಡುಗಡೆಯಾದ ಧರ್ಮ ಕೀರ್ತಿರಾಜ್ ಹಾಗೂ ಶರ್ಮಿಳಾ ಮಾಂಡ್ರೆ ನಟನೆಯ 'ಮುಮ್ತಾಜ್' ಸಿನಿಮಾದ ಒಂದು ಫೈಟ್ ಸೀನ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. 2016ರಲ್ಲಿ ಬಿಡುಗಡೆಯಾದ ಡಾ.ವಿಷ್ಣುವರ್ಧನ್ ಸಿಜಿಐ ಎಫೆಕ್ಟ್‌ನಿಂದ ತೋರಿಸಿದ್ದ 'ನಾಗರಹಾವು' ಸಿನಿಮಾದ ಹಾಡೊಂದರಲ್ಲಿ ಚಾಲೆಂಜಿಂಗ್ ಸ್ಟಾರ್ ಕಾಣಿಸಿಕೊಂಡಿದ್ದರು. 

2017ರಲ್ಲಿ ಬಿಡುಗಡೆಯಾದ ನೆನಪಿರಲಿ ಪ್ರೇಮ್, ಪ್ರಜ್ವಲ್, ದಿಗಂತ್, ವಿಜಯ್ ರಾಘವೇಂದ್ರ ನಟನೆಯ 'ಚೌಕ' ಚಿತ್ರದಲ್ಲಿ ಚಾಲೆಂಜಿಂಗ್ ಸ್ಟಾರ್ ದರ್ಶನ್ 'ರಾಬರ್ಟ್' ಎನ್ನುವ ಖೈದಿ ಪಾತ್ರದಲ್ಲಿ ಬಹಳ ರಗಡ್ ಆಗಿ ಕಾಣಿಸಿಕೊಂಡಿದ್ದರು. 2018ರಲ್ಲಿ ರಿಲೀಸ್ ಆದ ಚಂದನ್ ಕುಮಾರ್ ಹಾಗೂ ಐಶ್ವರ್ಯ ಅರ್ಜುನ್ ನಟನೆಯ 'ಪ್ರೇಮ ಬರಹ' ಸಿನಿಮಾದಲ್ಲಿ ದರ್ಶನ್ 'ಜೈ ಹನುಮಂತ' ಎಂಬ ಹಾಡಿನಲ್ಲಿ ಕಾಣಿಸಿಕೊಂಡಿದ್ದಾರೆ. 

2019ರಲ್ಲಿ ಬಿಡುಗೆಯಾದ ಅಭಿಷೇಕ್ ಅಂಬರೀಶ್ ಮೊದಲ ಬಾರಿಗೆ ಬಣ್ಣಹಚ್ಚಿದ್ದ 'ಅಮರ್' ಸಿನಿಮಾದಲ್ಲಿ ನಾಯಕಿಯನ್ನು ಮದುವೆಯಾಗಲು ಬರುವ ಹುಡುಗನ ಅಣ್ಣನ ಪಾತ್ರದಲ್ಲಿ ದರ್ಶನ್ ಕಾಣಿಸಿಕೊಂಡಿದ್ದರು. 2021ರಲ್ಲಿ ಡೈನಾಮಿಕ್ ಪ್ರಿನ್ಸ್ ಪ್ರಜ್ವಲ್ ದೇವರಾಜ್ ಹಾಗೂ ಭಾವನಾ ನಟನೆಯ 'ಇನ್ಸ್‌ಪೆಕ್ಟರ್ ವಿಕ್ರಂ' ಸಿನಿಮಾದಲ್ಲೂ ಒಂದು ಫೈಟ್ ಸೀನ್‌ನಲ್ಲಿ ಕಾಣಿಸಿಕೊಂಡಿದ್ದರು.