'ಸಂಬಂಜ ಅನ್ನೋದು ದೊಡ್ದು ಕನಾ': ಟಗರು ಪಲ್ಯ ಸಿನಿಮಾದ ಕಥೆ, ಕಲಾವಿದರ ಅಭಿನಯ, ರೇಟಿಂಗ್ಸ್ ಸೇರಿದಂತೆ ಇತರ ಮಾಹಿತಿ ಇಲ್ಲಿದೆ.

ಟಗರುಪಲ್ಯ ಒಂದು ಹರಕೆಯ ಕಥೆ. ಈ ಚಿತ್ರದ ಕಥೆ ಆರಂಭವಾಗುವುದು ಸೂರ್ಯ ಹುಟ್ಟೋಕು ಮುಂಚೆ ಹಾಗೂ ಮುಗಿಯುವುದು ಸಂಜೆ ಮಳೆ ಜೋರಾಗಿ ಹೊಯ್ಯುವ ಹೊತ್ತಿಗ. ಕುಟುಂಬವೊಂದು ಊರ ದೇವರಿಗೆ ಹರಕೆ ತೀರಿಸಲು ಹೋದಾಗ ಏನೆಲ್ಲಾ ನಡೆಯುತ್ತೆ ಅನ್ನೋದೆ ಸಿನಿಮಾ ಜೀವಾಳ. ಇದರಲ್ಲಿ ಹೊಟ್ಟೆ ಹುಣ್ಣಾಗಿಸುವಷ್ಟು ನಗು, ಪ್ರೇಮಿಗಳ ವೇದನೆ, ತಂದೆಯ ಚಿಂತನೆ, ತಲೆ ಒದರದ ಟಗರಿನ ರೋಧನೆ ಎಲ್ಲವೂ ಇದೆ. 

'ಟಗರು ಪಲ್ಯ' ಪಕ್ಕಾ ಫ್ಯಾಮಿಲಿ ಎಂಟರ್‌ಟೈನರ್. ಪಕ್ಕಾ ಗ್ರಾಮೀಣ ಕಥೆ, ಹಳ್ಳಿ ಭಾಷೆ, ಹಳ್ಳಿ ಸೊಗಡನ್ನು ಈ ಸಿನಿಮಾದಲ್ಲಿ ತಂದಿದ್ದಾರೆ. ಹೀಗಾಗಿ, ಒಂದೊಳ್ಳೆ ಗ್ರಾಮೀಣ ಸಿನಿಮಾ ನೋಡಬೇಕು ಎಂಬ ತುಡಿತವಿರುವ ಸಿನಿಪ್ರಿಯರಿಗೆ 'ಟಗರು ಪಲ್ಯ' ಭರಪೂರ ಮನರಂಜನೆ ನೀಡಲಿದೆ. ಕೆಲ ಹಳ್ಳಿಗರಿಗೆ ಸಿಟಿ ಬದುಕಿನ ಬಗ್ಗೆ ಇರುವ ಮೋಹ, ಪ್ರತಿಷ್ಠೆಗಾಗಿ ಮದುವೆಯನ್ನು ಅದ್ಧೂರಿಯಾಗಿ ಮಾಡುವ ಪರಿಪಾಠದ ಬಗ್ಗೆ ತಿಳಿವಳಿಕೆಯನ್ನು ಚಿತ್ರದಲ್ಲಿ ಮೂಡಿಸಲಾಗಿದೆ. ಜೊತೆಗೆ ಗ್ರಾಮೀಣ ಜನರ ಧಾರ್ಮಿಕ ನಂಬಿಕೆಗಳು ಎಷ್ಟೊಂದು ಮುಗ್ಧತೆಯಿಂದ ಕೂಡಿರುತ್ತವೆ ಎಂಬುದನ್ನು 'ಟಗರುಪಲ್ಯ'ದಲ್ಲಿ ಬಹಳ ಸೊಗಸಾಗಿ ತೋರಿಸಲಾಗಿದೆ. ಸಂಬಂಜ ಅನ್ನೋದು ದೊಡ್ದು ಕನಾ ಎಂಬ ಸುಂದರ ಸಂದೇಶ ಚಿತ್ರದ ಜೀವಾಳ. 

ಈ ಸಿನಿಮಾದ ಅಸಲಿ ಹೀರೋ ಅಂದರೆ ರಂಗಾಯಣ ರಘು. ಅವರೊಬ್ಬ ದೇಸಿ ಕಲಾವಿದ ಎಂಬುದನ್ನು ಚಿತ್ರದಲ್ಲಿ ಮತ್ತೊಮ್ಮೆ ಸಾಭೀತು ಮಾಡಿದ್ದಾರೆ. ಪಾಂಡು ಪಾತ್ರದ ಮೂಲಕ ಇಡೀ ಸಿನಿಮಾವನ್ನು ಒಬ್ಬರೇ ಕ್ಯಾರಿ ಮಾಡಿದ್ದಾರೆ. ಅದರಲ್ಲೂ ಮಂಡ್ಯ ಶೈಲಿಯ ಅವರ ಡೈಲಾಗ್ ಡಿಲೇವರಿ, ಅಭಿನಯ ನೋಡುಗರಿಗೆ ಕಿಕ್ ಕೊಡುತ್ತೆ. ನಟಿ ತಾರಾ 'ಶಾಂತಿ' ಎಂಬ ಪಾತ್ರದಲ್ಲಿ ಗ್ರಾಮೀಣ ಭಾಗದ ಮಹಿಳೆಯರ ಪ್ರತಿನಿಧಿಯಂತೆ ಕಾಣಿಸಿಕೊಂಡಿದ್ದಾರೆ. ಇನ್ನು ಮೊದಲ ಬಾರಿಗೆ ನಾಯಕನಾಗಿ ನಟಿಸಿರುವ ನಾಗಭೂಷಣ್ ಚಿತ್ರದಲ್ಲಿ ನಗಿಸುತ್ತಲೇ ಅಳಿಸುತ್ತಾರೆ. ಅವರ ಕಾಮಿಡಿ ಟೈಮಿಂಗ್ ಹಾಗೂ ಡೈಲಾಗ್ ಡಿಲಿವರಿ ತುಂಬಾನೇ ಇಷ್ಟ ಆಗುತ್ತೆ. ಅಮೃತಾ ಪ್ರೇಮ್‌ಗೆ ಇದು ಮೊದಲ ಸಿನಿಮಾ ಅಂತ ಅನಿಸೋದಿಲ್ಲ. ಸಿಕ್ಕ ಅವಕಾಶವನ್ನು ತುಂಬಾನೇ ನೀಟ್ ಆಗಿ ಬಳಸಿಕೊಂಡಿದ್ದಾರೆ. ಉಳಿದಂತೆ ಊರ ಹಿರಿಯನಾಗಿ ಬಿರಾದರ್ ನಟಿಸಿದ್ದಾರೆ. ಕುಡುಕನಾಗಿ ಕಾರ್ತಿಕ್, ಮದುವೆ ಗಂಡಿನ ಪಾತ್ರದಲ್ಲಿ ವಾಸುಕಿ ವೈಭವ್ ಕಾಮಿಡಿ ಕೂಡ ನೋಡುಗರಿಗೆ ಇಷ್ಟ ಆಗುತ್ತೆ. 

ಟಗರು ಪಲ್ಯ ಸಿನಿಮಾ ಪ್ಲಸ್ ಪಾಯಿಂಟ್ ಪಾತ್ರವರ್ಗ. ನಾಗಭೂಷಣ, ಅಮೃತಾ ಪ್ರೇಮ್, ರಂಗಾಯಣ ರಘು, ತಾರಾ, ಬಿರಾದರ್ ಸೇರಿದಂತೆ ಎಲ್ಲರೂ ಅಭಿನಯ ಅದ್ಭುತವಾಗಿದೆ. ಹಾಗೇ ಕಾಮಿಡಿ ಸೀನ್‌ಗಳು ಸಖತ್ ಮನರಂಜನೆ ನೀಡುತ್ತವೆ. ಉಮೇಶ್ ಕೆ ಕೃಪಾ ಗ್ರಾಮೀಣ ಬದುಕನ್ನು ಬಹಳ ಹತ್ತಿರದಿಂದ ನೋಡಿದ್ದರಿಂದ ಅವರ ನಿರ್ದೇಶನ ಕೂಡ ಸಖತ್ ನೀಟ್ ಆಗಿದೆ. ಇನ್ನು ಸಿನಿಮಾದ ಕೊನೆಯಲ್ಲಿ ಕೊಡುವ ಕ್ರೆಡಿಟ್ಸ್ ವೇಳೆ ಎಲ್ಲಾ ನಟರ ಫ್ಯಾಮಿಲಿ ಫೋಟೊಗಳನ್ನು ಹಾಕುತ್ತಾರೆ. ಅದು ಪಕ್ಕಾ ನಮ್ಮ ಕುಟುಂಬದ ನೆನಪಾಗುತ್ತೆ. ಬೇಡದೇ ಇರೋ ಕಮರ್ಷಿಯಲ್ ಎಲಿಮೆಂಟ್ಸ್ ಇಲ್ಲ. ಸ್ಲೋ ಮೋಷನ್ ಶಾಟ್ಸ್ ಇಲ್ಲ.

'ಟಗರು ಪಲ್ಯ' ಸಿನಿಮಾದ ಹಾಡುಗಳು ಆವರೇಜ್. ಒಮ್ಮೊಮ್ಮೆ ಈ ಹಾಡುಗಳನ್ನು ಇಲ್ಲಿ ಬೇಕಿತ್ತಾ ಅಂತ ಅನಿಸುತ್ತೆ. ಹಳ್ಳಿ ಶೈಲಿ ಬೈಗುಳಗಳು, ಪೋಲಿ ಗಾದೆಗಳು ಕೆಲವರಿಗೆ ಇರಿಸು-ಮುರಿಸು ಅನಿಸಬಹುದು. ಇಲ್ಲವೇ ಅರ್ಧ ಆಗದೇ ಇರಲೂಬಹುದು.