ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ ಸಿನಿಮಾದ ಕಥೆ, ಅಭಿನಯ ಇನ್ನಿತರ ಮಾಹಿತಿ ಇಲ್ಲಿದೆ.

ಅದು ನೂರಾರು ವಿದ್ಯಾರ್ಥಿಗಳಿರುವ ತುಂಗಾ ಹಾಸ್ಟೆಲ್. ಈ ಹಾಸ್ಟೆಲ್‌ನಲ್ಲಿ ಯುವಕರ ಆಟ, ತುಂಟಾಟ, ತರಲೆ, ತಮಾಷೆ ಕೊಂಚ ಜಾಸ್ತಿನೇ ಇರುತ್ತೆ. ಭಾರೀ ಹಾವಳಿ ಕೊಡುವ ಹಾಸ್ಟೆಲ್‌ ಹುಡುಗರನ್ನು ಒಬ್ಬ ಸ್ಟ್ರಿಕ್ಟ್ ವಾರ್ಡನ್ ಕಾಡುತ್ತಿರುತ್ತಾನೆ. ಈ ನಡುವೆ ಸಿನಿಮಾ ನಿರ್ದೇಶಕನಾಗುವ ಕನಸು ಕಂಡ ಹಾಸ್ಟೆಲ್‌ನ ಅಜಿತ್ ಎಂಬ ವಿದ್ಯಾರ್ಥಿ, ಒಂದು ಶಾರ್ಟ್ ಫಿಲ್ಮ್ ಪ್ಲ್ಯಾನ್ ಮಾಡ್ತಾನೆ. ಇದ್ದಕ್ಕಿದಂತೆ ಆ ವಾರ್ಡನ್ ಒಂದಷ್ಡು ಹುಡುಗರ ಹೆಸರನ್ನು ಸುಸೈಡ್ ನೋಟ್‌ನಲ್ಲಿ ಬರೆದಿಟ್ಟು ಸುಸೈಡ್ ಮಾಡಿಕೊಂಡರೆ ಮುಂದೆ ಏನೆಲ್ಲಾ ಏನಾಗುತ್ತದೆ? ಅನ್ನೋದನ್ನು ಲೈವ್‌ನಲ್ಲಿ ಶೂಟ್ ಮಾಡೋದು ಅವನ ಐಡಿಯಾ. ಆದರೆ, ಈ ಹಾದಿಯಲ್ಲಿ ಏನೆಲ್ಲಾ ಆಗುತ್ತದೆ ಅನ್ನೋದು ಸಿನಿಮಾ ಒನ್‌ಲೈನ್ ಸ್ಟೋರಿ. 

ಹಾಸ್ಟೆಲ್‌ ಹುಡುಗರು ಮತ್ತು ವಾರ್ಡನ್ ನಡುವಿನ ತಿಕ್ಕಾಟ. ಹುಡುಗರು ಏನೋ ಮಾಡಲು ಹೋಗಿ ಮತ್ತೇನೋ ಎಡವಟ್ಟಾಗಿ ಕೊನೆಗೆ ಎಲ್ಲವೂ ಸುಖಾಂತ್ಯ ಕಾಣುತ್ತದೆ. ಒಂದು ರಾತ್ರಿಯಲ್ಲಿ ನಡೆಯುವ ಕಥೆಯನ್ನು ನಿರ್ದೇಶಕರು ಬಹಳ ಸೊಗಸಾಗಿ ಹೇಳುವ ಪ್ರಯತ್ನ ಮಾಡಿದ್ದಾರೆ. ಹಾಸ್ಯಕ್ಕೆ ಪ್ರಾಮುಖ್ಯತೆ ಕೊಟ್ಟು ಸಿನಿಮಾ ಮಾಡಿದ್ದಾರೆ. ಸ್ಕ್ರೀನ್‌ಪ್ಲೇ, ನಿರೂಪಣೆ ಚೆನ್ನಾಗಿದೆ. ಹಾಸ್ಟೆಲ್ ಹುಡುಗರ ಹಾಡು, ಪಾಡು, ಸೀನಿಯರ್‌ಗಳ ಹಾವಳಿ, ಜ್ಯೂನಿಯರ್‌ಗಳ ಜಟಾಪಟಿ ಎಲ್ಲವನ್ನು ಸೊಗಸಾಗಿ ಕಟ್ಟಿಕೊಟ್ಟಿದ್ದಾರೆ. ಹಾಸ್ಟೆಲ್‌ನಲ್ಲಿ ಇರುವವರಿಗೆ ಹಾಗೂ ಒಂದು ಕಾಲದಲ್ಲಿ ಇದ್ದವರಿಗೆ ಈ ಸಿನಿಮಾ ಹತ್ತಿರವಾಗಲಿದೆ. 

ಕೊನೆ ಕ್ಷಣದಲ್ಲಿ ಚಿತ್ರತಂಡಕ್ಕೆ ಶಾಕ್ ಕೊಟ್ಟಿದ್ದ ನಟಿ ರಮ್ಯಾ ಈ ಸಿನಿಮಾದಲ್ಲಿ ಮ್ಯಾಥ್ಸ್ ಲೆಕ್ಚರರ್ ದಿವ್ಯಾ ಸ್ಪಂದನಾ ಆಗಿ ಮೊದಲ ದೃಶ್ಯದಲ್ಲಿ ಕಾಣಿಸಿಕೊಂಡಿದ್ದಾರೆ. ನಂತರ ಕಥೆ ಹಾಸ್ಟೆಲ್ ಒಳಕ್ಕೆ ಕರೆದುಕೊಂಡು ಹೋಗುತ್ತದೆ. ಅಲ್ಲಿಂದ ಮುಂದೆ ಸಿನಿಮಾ ನಾನ್‌ಸ್ಟಾಪ್ ಟ್ರೈನ್‌ ತರ ಓಡುತ್ತಲೇ ಇರುತ್ತದೆ. ಪದೇ ಪದೇ ಒಂದಷ್ಟು ಕನ್‌ಫ್ಯೂಷನ್ ಕ್ರಿಯೇಟ್ ಮಾಡಿ, ನಂತರ ಅದನ್ನೆಲ್ಲಾ ಬಗೆಹರಿಸುತ್ತಾ ಸ್ಕ್ರೀನ್‌ಪ್ಲೇ ಪ್ರೇಕ್ಷಕರನ್ನು ಎಂಗೇಜಿಂಗ್ ಆಗಿ ಇಟ್ಟುಕೊಳ್ಳುತ್ತದೆ. 

ಈ ಚಿತ್ರದಲ್ಲಿ ನಟಿಸಿರುವವರೆಲ್ಲಾ ಬಹುತೇಕ ಹೊಸಬರೇ ಆಗಿದ್ದಾರೆ. ಸಾಕಷ್ಟು ರಿಹರ್ಸಲ್ ಮಾಡಿ ಸನ್ನಿವೇಶಗಳನ್ನು ಕಟ್ಟಿಕೊಟ್ಟಿರುವುದು ಸಿನಿಮಾದಲ್ಲಿ ಗೊತ್ತಾಗುತ್ತದೆ. ಸಾಧ್ಯವಾದಷ್ಟು ನೈಜವಾಗಿ ಸನ್ನಿವೇಶಗಳನ್ನು ಕಟ್ಟಿಕೊಡುವ ಪ್ರಯತ್ನ ಮಾಡಲಾಗಿದ್ದು, ಇದು ಬರೀ ಹಾಸ್ಟೆಲ್ ಹುಡುಗರ ಕಥೆ. ಹಾಗಾಗಿ ಇಲ್ಲಿ ನಾಯಕ ಹಾಗೂ ನಾಯಕಿ ಅನ್ನೋ ಕಾನ್ಸೆಪ್ಟ್ ಇಲ್ಲ. ಇದ್ದಿದ್ದರಲ್ಲಿ ಅಜಿತ್ ಪಾತ್ರಧಾರಿ ಪ್ರಜ್ವಲ್ ಒಂದರ್ಥದಲ್ಲಿ ನಾಯಕ ಎನಿಸಿಕೊಳ್ಳುತ್ತಾರೆ. ಇನ್ನು ಹಾಸ್ಟೆಲ್ ವಾರ್ಡನ್ ಆಗಿ ಮಂಜುನಾಥ್ ನಾಯಕ್, ಹಾಸ್ಯ ನಟ ಚೇತನ್ ದುರ್ಗ ನೆನಪಿನಲ್ಲಿ ಉಳಿಯುತ್ತಾರೆ. ನಟಿ ರಮ್ಯಾ ಆಗಾಗ್ಗೆ ಒಂದೊಂದು ಫ್ರೇಮ್‌ನಲ್ಲಿ ಬಂದು ಬಂದು ಹೋಗುತ್ತಿರುತ್ತಾರೆ.  

ನೂರಾರು ಹುಡುಗರನ್ನು ಒಂದೆಡೆ ಸೇರಿಸಿ ಶೂಟಿಂಗ್ ಮಾಡುವುದು ಅಷ್ಟು ಸುಲಭವ ವಿಚಾರ ಅಲ್ಲ. ಆ ಪ್ರಯತ್ನದಲ್ಲಿ ನಿತಿನ್ ಕೃಷ್ಣಮೂರ್ತಿ ಹಾಗೂ ಟೀಂ ಗೆದ್ದಿದೆ. ಜಿನ್ನಿ ಎನ್ನುವ ಹಾಸ್ಟೆಲ್ ಸೀನಿಯರ್ ಪಾತ್ರದಲ್ಲಿ ನಿರ್ದೇಶಕ ನಿತಿನ್ ಕೂಡ ಗಮನ ಸೆಳೆಯುತ್ತಾರೆ. ಇನ್ನು ಅಜಿತ್ ಮಾಡುವ ಮಾಡುವ ಶಾರ್ಟ್‌ ಫಿಲ್ಮ್ ಎಡಿಟ್ ಮಾಡುವ ಫೋಟೊ ಸ್ಟುಡಿಯೋ ಎಡಿಟರ್ ಪಾತ್ರದಲ್ಲಿ ದಿಗಂತ್ ಮಸ್ತ್ ಮಜಾ ಕೊಡ್ತಾರೆ. ಇಡೀ ಚಿತ್ರದ ಹೈಲೆಟ್ ಅರವಿಂದ್ ಕಶ್ಯಪ್ ಛಾಯಾಗ್ರಹಣ. ಅಜಿತ್ ಮಾಡುವ ಶಾರ್ಟ್‌ ಫಿಲ್ಮ್‌ನ ಹ್ಯಾಂಡ್‌ಕ್ಯಾಮ್‌ನಲ್ಲಿ ಶೂಟ್‌ ಮಾಡುವಂತೆ ತೋರಿಸಲಾಗಿದೆ. ಅದನ್ನು ಬಹಳ ಸೊಗಸಾಗಿ ಅರವಿಂದ್ ನಿಭಾಯಿಸಿದ್ದಾರೆ.