Lucky Baskhar OTT Release: ಕನ್ನಡದಲ್ಲೇ ನೋಡಿ ದುಲ್ಕರ್ ನಟನೆಯ ತೆಲುಗಿನ ಹಿಟ್ ಸಿನಿಮಾ 'ಲಕ್ಕಿ ಭಾಸ್ಕರ್'

1980ರ ದಶಕದ ಕಾಲಘಟ್ಟದಲ್ಲಿ ಮುಂಬೈನಲ್ಲಿ ನಡೆಯುವಂತಹ ಕಥೆ ಲಕ್ಕಿ ಭಾಸ್ಕರ್. ಚಿತ್ರದಲ್ಲಿ ಭಾಸ್ಕರ್ (ದುಲ್ಕರ್ ಸಲ್ಮಾನ್) ಮಗಧಾ ಎಂಬ ಬ್ಯಾಂಕ್‌ನಲ್ಲಿ ಕ್ಯಾಶಿಯರ್ ಆಗಿ ಕಾರ್ಯನಿರ್ವಹಿಸುತ್ತಿರುತ್ತಾನೆ. ಮಧ್ಯಮ ವರ್ಗದ ಸರಳ ಜೀವನವನ್ನು ನಡೆಸುತ್ತಿರುವ ಭಾಸ್ಕರ್, ತನಗೆ ಬರುವ ಕಡಿಮೆ ಸಂಬಳದಲ್ಲಿ ಜೀವನ ಸಾಗಿಸಲು ಸಾಕಷ್ಟು ಕಷ್ಟಪಡುತ್ತಿರುತ್ತಾನೆ. ಮೂರು ವರ್ಷ ಒಳ್ಳೆಯ ಉದ್ಯೋಗಿಯಾಗಿ ಕೆಲಸ ಮಾಡಿದರೂ ಬಡ್ತಿ ದೊರಕದ ಭಾಸ್ಕರ್, ಕುಟುಂಬಸ್ಥರಿಂದಲೂ ಅವಮಾನ ಅನುಭವಿಸುತ್ತಿರುತ್ತಾನೆ.

ಹೀಗಿರುವಾಗ ಅವನಿಗೆ ಅಸಿಸ್ಟಂಟ್ ಜನರಲ್ ಮ್ಯಾನೇಜರ್ ಆಗಿ ಬಡ್ತಿ ಸಿಗುತ್ತದೆ. ಇದೇ ಸಮಯದಲ್ಲಿ ಕಳ್ಳ ಸಾಗಾಣಿಕೆ ವ್ಯವಹಾರಕ್ಕಾಗಿ ರಾಮ್ಕಿ ಎಂಬ ವ್ಯಕ್ತಿ ಭಾಸ್ಕರ್‌ನನ್ನು ಸಂಪರ್ಕಿಸುತ್ತಾನೆ. ಈಗಾಗಲೇ ಬ್ಯಾಂಕ್‌ನ ವ್ಯವಸ್ಥೆಯಿಂದ ಬೇಸತ್ತಿದ್ದ ಭಾಸ್ಕರ್ ರಾಮ್ಕಿ ಮಾತನ್ನು ಒಪ್ಪುತ್ತಾನೆ. ಬ್ಯಾಂಕ್‌ನಿಂದ ಹಣ ಕದ್ದು ದೊಡ್ಡಮಟ್ಟದಲ್ಲಿ ಲಾಭ ಗಳಿಸುತ್ತಾನೆ. ಮುಂದೆ ಹಣದ ಮೇಲಿನ ಭಾಸ್ಕರ್ ಆಸೆಯೂ ಆತನನ್ನು ತೀವ್ರ ತೊಂದರೆ ಸಿಕ್ಕಿಸುತ್ತದೆ. ಸಿಬಿಐ ಭಾಸ್ಕರ್‌ ತನಿಖೆಗೆ ಮುಂದಾಗುತ್ತದೆ. ಈ ಸವಾಲುಗಳನ್ನು ಆತ ಹೇಗೆ ಬಗೆಹರಿಸುತ್ತಾನೆ ಎನ್ನುವುದೇ 'ಲಕ್ಕಿ ಭಾಸ್ಕರ್' ಕಥೆಯ ಮೂಲವಾಗಿದೆ.

ಲಕ್ಕಿ ಭಾಸ್ಕರ್ ಸಿನಿಮಾವನ್ನು ವೆಂಕಿ ಅಟ್ಲೂರಿ ನಿರ್ದೇಶನ ಮಾಡಿದ್ದಾರೆ. ಚಿತ್ರದಲ್ಲಿ ದುಲ್ಕರ್ ಸಲ್ಮಾನ್ ಜೊತೆಗೆ ಮೀನಾಕ್ಷಿ ಚೌಧರಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಜೊತೆಗೆ ಸಾಯಿಕುಮಾರ್, ಮಾನಸಾ ಚೌಧರಿ, ರಾಮ್ಕಿ, ಹೈಪರ್ ಆದಿ, ಸೂರ್ಯ ಶ್ರೀನಿವಾಸ್ ಮುಂತಾದವರು ಚಿತ್ರದ ತಾರಾಗಣದಲ್ಲಿದ್ದಾರೆ. ನಾಗ ವಂಶಿ ಮತ್ತು ಸಾಯಿ ಸೌಜನ್ಯ ನಿರ್ಮಿಸಿರುವ ಈ ಸಿನಿಮಾಗೆ ಜಿವಿ ಪ್ರಕಾಶ್ ಸಂಗೀತ ಸಂಯೋಜನೆ ಮಾಡಿದ್ದಾರೆ.

ಲಕ್ಕಿ ಭಾಸ್ಕರ್ ಸಿನಿಮಾದ ಡಿಜಿಟಲ್ ಸ್ಟ್ರೀಮಿಂಗ್ ಹಕ್ಕುಗಳನ್ನು ನೆಟ್‌ಫ್ಲಿಕ್ಸ್ ಸಂಸ್ಥೆ ಪಡೆದುಕೊಂಡಿದೆ. ಜೊತೆಗೆ ಚಿತ್ರದ ಸ್ಟ್ರೀಮಿಂಗ್ ಯಾವಾಗಿನಿಂದ ಎಂಬ ವಿಚಾರವನ್ನು ಸೋಶಿಯಲ್ ಮೀಡಿಯಾದಲ್ಲಿ ಅಧಿಕೃತವಾಗಿ ಘೋಷಿಸಿದೆ. ಅದೃಷ್ಟ ಎಂಬುದು ಕೈ ಹಿಡಿದ್ರೆ, ಒಬ್ಬ ಮನುಷ್ಯ ಎಲ್ಲಿಯವರೆಗೂ ಹೋಗಬಹುದು? ಎಂಬ ಕ್ಯಾಪ್ಷನ್ ನೀಡಿ, ಲಕ್ಕಿ ಭಾಸ್ಕರ್ ಸಿನಿಮಾವನ್ನು ಇದೇ ನವೆಂಬರ್ 28ರಿಂದ ತೆಲುಗು, ಕನ್ನಡ, ತಮಿಳು, ಮಲಯಾಳಂ ಹಾಗೂ ಹಿಂದಿಯಲ್ಲಿ ವೀಕ್ಷಿಸಬಹುದು ಎಂದು ತಿಳಿಸಿದೆ. 

ಸಿನಿಮಾದಲ್ಲಿ ದುಲ್ಕರ್ ಸಲ್ಮಾನ್ ಉದ್ಯೋಗಿಯಾಗಿ ಅದ್ಭುತವಾಗಿ ನಟಿಸಿದ್ದಾರೆ. ಚಿತ್ರದುದ್ದಕ್ಕೂ ಪ್ರೇಕ್ಷಕರನ್ನು ಹಿಡಿದಿಟ್ಟುಕೊಳ್ಳುವಂತೆ ನಟಿಸಿದ್ದಾರೆ. ಚಿತ್ರದಲ್ಲಿ ಕಾಮಿಡಿ ಹಾಗೂ ಭಾವನೆಗಳ ಸಮನಾದ ಮಿಶ್ರಣ ಕಥೆಗೆ ಜೀವ ತುಂಬುತ್ತದೆ. ನಿರ್ದೇಶಕ ವೆಂಕಿ ಅಟ್ಲೂರಿ ಚಿತ್ರದ ಸಂಭಾಷಣೆಗಳನ್ನು ಅತ್ಯುತ್ತಮವಾಗಿ ಬರೆದಿದ್ದಾರೆ. ಬ್ಯಾಂಕ್ ಸೆಟ್‌ ಮತ್ತು 80 ದಶಕದ ವಾತಾವರಣವನ್ನು ಸುಂದರವಾಗಿ ತೋರಿಸಲಾಗಿದೆ. ಜಿವಿ ಪ್ರಕಾಶ್ ವಾರ ಸಂಗೀತ ಅತ್ಯುತ್ತಮವಾಗಿದ್ದು, ಎಲ್ಲಾ ಹಾಡುಗಳು ಹೃದಯ ತಟ್ಟುತ್ತವೆ.  ಸಿನಿಮಾದಲ್ಲಿ ಬರುವ ವಿರೋಚಿತ ಘಟನೆಗಳು ಮಾಸ್ ಪ್ರೇಕ್ಷಕರಿಂದ ಶಿಳ್ಳೆ ಗಿಟ್ಟಿಸಿಕೊಳ್ಳುವಲ್ಲಿ ಯಶಸ್ವಿಯಾಗುತ್ತವೆ. ನೀವು ಥಿಯೇಟರ್‌ನಲ್ಲಿ 'ಲಕ್ಕಿ ಭಾಸ್ಕರ್' ಮಿಸ್ ಮಾಡಿಕೊಂಡಿದ್ದರೆ, ನವೆಂಬರ್ 28ರಿಂದ ಒಟಿಟಿಯಲ್ಲಿ ಕನ್ನಡದಲ್ಲೇ ಸಿನಿಮಾ ವೀಕ್ಷಿಸಬಹುದು.