ಮಾದರಿ ಹೀರೋ ಮಾತ್ರವಲ್ಲ, ಡಾ.ರಾಜ್‌ಕುಮಾರ್ ವಿಲನ್ ಆಗಿಯೂ ನಟಿಸಿದ್ದ ಟಾಪ್ ಸಿನಿಮಾಗಳಿವು!

1983ರಲ್ಲಿ ತೆರೆಕಂಡ 'ಭಕ್ತ ಪ್ರಹ್ಲಾದ' ಸಿನಿಮಾದಲ್ಲಿ ಹಿರಣ್ಯಕಶಿಪುನ ಅಟ್ಟಹಾಸ ಎಲ್ಲರಿಗೂ ನೆನಪಿರುತ್ತದೆ.  ಈ ಚಿತ್ರದಲ್ಲಿ ಡಾ.ರಾಜ್‌ಕುಮಾರ್ ಹಿರಣ್ಯಕಶಿಪುನ ನಟನೆ, ಡೈಲಾಗ್‌ಗಳು ಸದಾ ನೆನಪಿನಲ್ಲಿರುವಂತಹದ್ದು. ಈ ಸಿನಿಮಾದಲ್ಲಿ ಪವರ್ ಸ್ಟಾರ್  ಪುನೀತ್ ರಾಜ್‌ಕುಮಾರ್ ಭಕ್ತ ಪ್ರಹ್ಲಾದನ ಪಾತ್ರದಲ್ಲಿ ನಟಿಸಿದ್ದರು. ತನ್ನ ತಂದೆಯ ವಿರೋಧದ ನಡುವೆಯೇ ಶ್ರೀಹರಿಯನ್ನು ಅನಂತವಾಗಿ ಭಜಿಸುವ ಪ್ರಹ್ಲಾದನ ಪಾತ್ರದಲ್ಲಿ ಅಪ್ಪು ಅದ್ಭುತ ಅಭಿನಯ ನೀಡಿದ್ದರು.

ಅಣ್ಣಾವ್ರ ಸಿನಿಮಾಗಳು ಮನೋರಂಜನೆ ಜೊತೆಗೆ ಪ್ರೇಕ್ಷಕರಿಗೆ ಅದ್ಭುತ ಸಂದೇಶ ನೀಡುವಂತಹವಾಗಿದ್ದವು. ಈ ಪೈಕಿ ಅವರು ದ್ವಿಪಾತ್ರದಲ್ಲಿ ಅಭಿನಯಿಸಿದ್ದ 'ದಾರಿ ತಪ್ಪಿದ ಮಗ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಕಲ್ಪನಾ, ಆರತಿ, ಮಂಜುಳಾ ನಾಯಕಿಯರಾಗಿದ್ದರು. ಪೇಕೇಟಿ ಶಿವಾರಂ ಈ ಸಿನಿಮಾ ನಿರ್ದೇಶಿಸಿ, ನಿರ್ಮಿಸಿದ್ದರು. ಡಾ.ರಾಜ್ ಈ ಸಿನಿಮಾದಲ್ಲಿ ಪ್ರಕಾಶ್ ಎಂಬ ಕಳ್ಳ, ಡಕಾಯಿತನಾಗಿ ನಟಿಸಿದ್ದರು. ಜೊತೆಗೆ ಪ್ರಸಾದ್ ಎಂಬ ಪ್ರೊಫೆಸರ್ ಆಗಿಯೂ ಬಣ್ಣಹಚ್ಚಿದ್ದರು. 

1966ರಲ್ಲಿ ಬಿಡುಗಡೆಯಾದ 'ಮೋಹಿನಿ ಭಸ್ಮಾಸುರ' ಸಿನಿಮಾದಲ್ಲಿ ಕೂಡ ಡಾ.ರಾಜ್‌ಕುಮಾರ್ ನೆಗೆಟಿವ್ ರೋಲ್‌ನಲ್ಲಿ ಕಾಣಿಸಿಕೊಂಡಿದ್ದರು. ಎಸ್‌.ಎಸ್‌ ವರ್ಮಾ ನಿರ್ದೇಶನ ಮಾಡಿದ್ದ ಈ ಚಿತ್ರದಲ್ಲಿ ರಾಜ್‌ಕುಮಾರ್, ಲೀಲಾವತಿ, ಉದಯ್ ಕುಮಾರ್ ಮತ್ತು ಟಿ.ಎನ್ ಬಾಲಕೃಷ್ಣ ಪ್ರಮುಖ ಪಾತ್ರ ನಿರ್ವಹಿಸಿದ್ದರು. ಅಣ್ಣಾವ್ರ ಈ ಚಿತ್ರದಲ್ಲಿ 'ಭಸ್ಮಾಸುರ'ನಾಗಿ ಕಾಣಿಸಿಕೊಂಢಿದ್ದರು. 

ಕೆ.ಶಂಕರ್ ನಿರ್ದೇಶನದ 'ಭೂಕೈಲಾಸ' ಸಿನಿಮಾದಲ್ಲಿ ಅಣ್ಣಾವ್ರ ರಾವಣನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಇಂದ್ರನ ಲೋಕವನ್ನು ಗೆಲ್ಲಲು ಹೋರಾಡುವ ರಾವಣನಾಗಿ ಡಾ.ರಾಜ್‌ ಪಾತ್ರಕ್ಕೆ ಸಿಕ್ಕಾಪಟ್ಟೆ ಮೆಚ್ಚುಗೆ ವ್ಯಕ್ತವಾಗಿತ್ತು. ಸಿನಿಮಾ ನೋಡಿದ ಅಭಿಮಾನಿಗಳು ಅಣ್ಣಾವ್ರ ಅಭಿನಯ ಕಂಡು ಬೆಚ್ಚಿಬಿದ್ದಿದ್ದರು. 1958ರಲ್ಲಿ ತೆರೆಕಂಡ ಈ ಚಿತ್ರದಲ್ಲಿ ಕಲ್ಯಾಣ್ ಕುಮಾರ್ ಹಾಗೂ ಕೆ ಅಶ್ವತ್ಥ್ ಕೂಡ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದರು.

1963ರಲ್ಲಿ ಬಿಡುಗಡೆಯಾದ ಸತಿ ಶಕ್ತಿ ಸಿನಿಮಾದಲ್ಲಿ ಡಾ.ರಾಜ್‌ಕುಮಾರ್ ಮಂತ್ರವಾದಿಯಾಗಿ ತಮ್ಮ ಕಲಾ ನೈಪುಣ್ಯ ಪ್ರದರ್ಶಿಸಿದ್ದರು. ಈ ಸಿನಿಮಾದಲ್ಲೂ ಅಣ್ಣಾವ್ರ ದ್ವಿಪಾತ್ರ ಮಾಡಿದ್ದರು. ರಕ್ತಾಕ್ಷ ಹಾಗೂ ವಿರೂಪಾಕ್ಷನಾಗಿ ತಮ್ಮ ವಿಶ್ವರೂಪ ಪ್ರದರ್ಶಿಸಿದ್ದರು. ಅಂದ್ಹಾಗೆ ಈ ಸಿನಿಮಾವನ್ನು ಕಣಕಲ್ ಪ್ರಭಾಕರ್ ಶಾಸ್ತ್ರೀ ನಿರ್ದೇಶನ ಮಾಡಿದ್ದರು.

1960 ತೆರೆಗೆ ಬಂದ ದಶಾವತಾರ ಸಿನಿಮಾದಲ್ಲೂ ಅಣ್ಣಾವ್ರ ಜಯ, ಹಿರಣ್ಯ ಕಶಿಪು, ರಾವಣ, ಶಿಶುಪಾಲನಾಗಿ ಕಶಣಿಸಿಕೊಂಡಿದ್ದರು. ಈ ಎಲ್ಲಾ ಪಾತ್ರಗಳು ನೆಗೆಟಿವ್ ಶೇಡ್‌ನಲ್ಲಿದ್ದವು. ಇದೊಂದು ಪೌರಾಣಿಕ ಸಿನಿಮಾವಾಗಿದ್ದು, ಡಾ.ರಾಜ್‌ ಕಣ್ಣಲ್ಲೇ ತಮ್ಮ ಉಗ್ರ ರೂಪವನ್ಜು ತೋರಿಸಿ, ಎಂಥ ಪಾತ್ರಗಳನ್ನೂ ನಿರರ್ಗಗಳವಾಗಿ ನಟಿಸಬಹುದು ಅಂತ ಫ್ರೂವ್ ಮಾಡಿದ್ದರು. 

1959ರಲ್ಲಿ ಬಿಡುಗಡೆಯಾದ ಮಹಿಷಾಸುರ ಮರ್ದಿನಿ ಸಿನಿಮಾದಲ್ಲಿ ಅಣ್ಣಾವ್ರ 'ಮಹಿಷಾಸುರ'ನ ಪಾತ್ರಕ್ಕೆ ಬಣ್ಣ ಹಚ್ಚಿದ್ದರು. ಈ ಸಿನಿಮಾದಲ್ಲಿ ಸಾಹುಕಾರ್ ಜಾನಕಿ, ಉದಯ್ ಕುಮಾರ್ ಮೊದಲಾದವರು ನಟಿಸಿದ್ದರು. ಅಲ್ಲದೇ , ಈ ಸಿನಿಮಾದಲ್ಲಿ ಮೊದಲ ಬಾರಿಗೆ ಡಾ.ರಾಜ್‌ಕುಮಾರ್ ಹಾಡಿ, ಹಿನ್ನೆಲೆ ಗಾಯನದಲ್ಲೂ ಸೈ ಎನಿಸಿಕೊಂಡಿದ್ದರು.

1952ರಲ್ಲಿ ಬಿಡುಗಡೆಯಾದ 'ಹೃದಯ ಸಂಗಮ' ಸಿನಿಮಾದಲ್ಲಿ ಸಹ ಡಾ.ರಾಜ್‌ಕುಮಾರ್ ಡಬಲ್ ಆಕ್ಟಿಂಗ್ ಮಾಡಿದ್ದರು.  ಕ್ಲೈಮ್ಯಾಕ್ಸ್‌ನಲ್ಲಿ ಕೇವಲ ಮೂರು ನಿಮಿಷಗಳ ಕಾಲ ನೆಗೆಟಿವ್ ಪಾತ್ರದಲ್ಲಿ ನಟಿಸಿದ್ದರು. 

1979ಲ್ಲಿ ಬಿಡುಗಡೆಯಾದ 'ನಾನೊಬ್ಬ ಕಳ್ಳ' ಸಿನಿಮಾದಲ್ಲಿ ಹೆಸರೇ ಹೇಳುವಂತೆ ಡಾ.ರಾಜ್‌ಕುಮಾರ್ ಅವರು ನೆಗೆಟಿವ್ ಪಾತ್ರ ಅಂದರೆ ಕಳ್ಳನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ದೊರೈ ಭಗವಾನ್ ನಿರ್ದೇಶನದ ಈ ಚಿತ್ರದಲ್ಲೂ ಅಣ್ಣಾವ್ರ ದ್ವಿಪಾತ್ರ ಮಾಡಿದ್ದರು.