ಶಶಿಕುಮಾರ್ ಟು ಪುನೀತ್ ರಾಜ್‌ಕುಮಾರ್: ಇವರೇ ನೋಡಿ ಸ್ಯಾಂಡಲ್‌ವುಡ್‌ನ ಬೆಸ್ಟ್ ಡ್ಯಾನ್ಸರ್ಸ್!

ಕನ್ನಡ ಚಿತ್ರರಂಗದ ಎನರ್ಜಿಟಿಕ್ ಡ್ಯಾನ್ಸರ್ ಅಂದ್ರೆ ಅದು ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್. ಅವರ ಪ್ರತಿ ಸಿನಿಮಾದ ಹಾಡುಗಳ ನೃತ್ಯದಲ್ಲಿ ಹೊಸತನ ಇರುತ್ತಿತ್ತು. ಹೊಸ ರೀತಿಯ ಸ್ಟೆಪ್‌ಗಳಿಗೆ ಅವರು ಜೀವ ತುಂಬುತ್ತಿದ್ದರು. ಅಪ್ಪು ಕೊರೊಯೋಗ್ರಾಫರ್ ಕಂಫೋಸ್ ಮಾಡುವ ಸ್ಟೆಪ್‌ಗಳನ್ನು ಕಲಿತೇ ಸೆಟ್‌ಗೆ ತೆರಳುತ್ತಿದ್ದರು. ಹೀಗಾಗಿ, ಅವರ ಸಿನಿಮಾದಲ್ಲಿ ನೃತ್ಯಕ್ಕೆ ಕೊರತೆ ಇರಲಿಲ್ಲ. ಪುನೀತ್ ಅಂದ್ರೆ ಡ್ಯಾನ್ಸ್, ಡ್ಯಾನ್ಸ್ ಅನ್ನೋದು ಜಗಜ್ಜಾಗೀರಾಗಿತ್ತು. ಪರಭಾಷಾ ನಟ-ನಟಿಯರು ಕೂಡ ಪುನೀತ್ ಅವರ ಡ್ಯಾನ್ಸ್ ಅಂದ್ರೆ ಇಷ್ಟ ಪಡ್ತಾರೆ.  ಅವರು ಅದ್ಭುತ ನೃತ್ಯದ ಮೂಲಕವೂ ಕನ್ನಡಿಗರ ಮನಗೆದ್ದಿದ್ದರು.

ಕನ್ನಡ ಚಿತ್ರರಂಗದ ಹಿರಿಯ ನಟಿ ಲೀಲಾವತಿ ಅವರ ಪುತ್ರ ವಿನೋದ್ ರಾಜ್, ತಮ್ಮ  ಡ್ಯಾನ್ಸಿಂಗ್ ಸ್ಟೈಲ್‌ನಿಂದಲೇ ಸ್ಟಾರ್ ಪಟ್ಟಕ್ಕೇರಿದರು. ಇವರ ಮೊದಲ ಸಿನಿಮಾ ಡ್ಯಾನ್ಸ್ ರಾಜ ಡ್ಯಾನ್ಸ್. ವಿನೋದ್ ರಾಜ್‌ ಅದ್ಭುತವಾಗಿ ಡ್ಯಾನ್ಸ್ ಮಾಡುತ್ತಾರೆ.  ಕೃಷ್ಣ ನೀ ಕುಣಿದಾಗ, ನಂಜುಂಡ, ಸ್ನೇಹಲೋಕ, ಮಹಾಭಾರತ ಹೀಗೆ ಹಲವು ಸಿನಿಮಾಗಳಲ್ಲಿ ಅಭಿನಯಿಸಿದರು. ಈ ಸಿನಿಮಾಗಳು ನಿರೀಕ್ಷಿಸಿದಷ್ಟು ಸಕ್ಸಸ್ ಕಾಣಲಿಲ್ಲ. 2009ರಲ್ಲಿ ತೆರೆಕಂಡ ಯಾರದು ಚಿತ್ರದ ಬಳಿಕ ಅವರು ನಟನೆಗೆ ವಿದಾಯ ಹೇಳಿದ್ದಾರೆ.   

90ರ ದಶಕದ ಸ್ಟಾರ್ ಹೀರೋ ಆಗಿದ್ದ ಶಶಿಕುಮಾರ್, ಡ್ಯಾನ್ಸ್‌ನಲ್ಲೂ ಸಖತ್ ಫೇಮಸ್ ಆಗಿದ್ದರು. ಅಂದಿನ ಕಾಲದಲ್ಲಿ ಅವರ ನೃತ್ಯದ ಸ್ಟೈಲ್ ಸಿನಿರಸಿಕರ ಮೆಚ್ಚುಗೆಗೆ ಕಾರಣವಾಗಿತ್ತು. ತಮ್ಮದೇ ಡ್ಯಾನ್ಸ್ ಸ್ಟೈಲಿನಿಂದ ಗಮನ ಸೆಳೆದಿದ್ದ ಶಶಿಕುಮಾರ್, ಡ್ಯಾನ್ಸಿಂಗ್ ಚಾಂಪಿಯನ್ ಎಂಬ ರಿಯಾಲಿಟಿ ಶೋನ ತೀರ್ಪುಗಾರರು ಕೂಡ ಆಗಿದ್ದರು. 

ಕರುನಾಡ ಚಕ್ರವರ್ತಿಯ ಡ್ಯಾನ್ಸ್ ಬಗ್ಗೆ ಎಲ್ಲರಿಗೂ ಗೊತ್ತೇ ಇದೆ. ಶಿವರಾಜ್‌ಕುಮಾರ್ ತಮ್ಮ ಕೆರಿಯರ್ ಆರಂಭದಿಂದಲೂ ಅದ್ಭುತವಾಗಿ ನೃತ್ಯ ಮಾಡ್ತಿದ್ದು, ಅವ್ರ ಡ್ಯಾನ್ಸ್‌ಗೆ ಫಿದಾ ಆಗಿರೋ ಅಭಿಮಾನಿಗಳ ಬಳಗ ದೊಡ್ಡದೇ ಇದೆ. ವಯಸ್ಸು 60 ದಾಟಿದ್ರೂ ಶಿವಣ್ಣನ ಉತ್ಸಾಹ, ಎನರ್ಜಿ ಮುಂದೆ ಹದಿಹರೆಯದವ್ರೂ ಸಪ್ಪೆ ಅಂತಲೇ ಅನಿಸಿಬಿಡುತ್ತೆ. ಇತ್ತೀಚೆಗೆ ತೆರೆಕಂಡ ಕರಟಕ ದಮನಕ ಸಿನಿಮಾದಲ್ಲೂ ಶಿವಣ್ಣ, ಪ್ರಭುದೇವ ಜೊತೆ ಸಖತ್ ಸ್ಟೆಪ್ಸ್ ಹಾಕಿದ್ದರು. 

ಆಕ್ಷನ್ ಫ್ರಿನ್ಸ್ ಧ್ರುವಾ ಸರ್ಜಾ ಕೂಡ ಕನ್ನಡ ಚಿತ್ರರಂಗದ ಉತ್ತಮ ಡ್ಯಾನ್ಸರ್. ಇವರ ಸಹೋದರ ಚಿರಂಜೀವಿ ಸರ್ಜಾ ಕೂಡ ಅದ್ಭುತವಾಗಿ ನೃತ್ಯ ಮಾಡುತ್ತಿದ್ದರು. ಧ್ರುವ ಸರ್ಜಾ ಕೂಡ ತಮ್ಮ ಸಿನಿಮಾಗಳಲ್ಲಿ ವಿಭಿನ್ನ ಸ್ಟೆಪ್ ಹಾಕುವ ಮೂಲಕ ಅಭಿಮಾನಿಗಳ ಗಮನ ಸೆಳೆಯುತ್ತಾರೆ.

ರಾಕಿಂಗ್ ಸ್ಟಾರ್ ಯಶ್  ಪ್ರೊಫೆಶನಲ್ ಡ್ಯಾನ್ಸರ್ ಅಂತೂ ಖಂಡಿತ ಅಲ್ಲ. ಆದರೂ ಲೀಲಾಜಾಲವಾಗಿ ಮಾಡುವ ತಮ್ಮ ಸ್ಟೈಲಿಷ್ ಸ್ಟೆಪ್‌ಗಳಿಂದ ಪ್ರೇಕ್ಷಕರನ್ನು ಸೆಳೆಯುತ್ತಾರೆ. ಅವರ ನಟನೆಯ ಮಾಸ್ಟರ್ ಪೀಸ್, ಗೂಗ್ಲಿ, ಗಜಕೇಸರಿ, ಲಕ್ಕಿ, ಕಿರಾತಕ ಸಿನಿಮಾಗಳಲ್ಲೂ ತಮ್ಮ ಡ್ಯಾನ್ಸ್ ಸ್ಕಿಲ್ ಮೂಲಕ ಅಭಿಮಾನಿಗಳಿಗೆ ಮೋಡಿ ಮಾಡಿದ್ದರು. 

ಕನ್ನಡ ಚಿತ್ರರಂಗದ ಚಿನ್ನಾರಿ ಮುತ್ತ ವಿಜಯ್ ರಾಘವೇಂದ್ರ ಕೂಡ ಅದ್ಭುತ ಡ್ಯಾನ್ಸರ್. ಸಿನಿಮಾಗಳಲ್ಲಿ ನಟನೆ ಜೊತೆಗೆ ಡ್ಯಾನ್ಸ್ ಸ್ಟೆಪ್‌ಗಳ ಮುಖಾಂತರ ಗಮನ ಸೆಳೆದಿರುವ ಅವರು, ಡ್ಯಾನ್ಸಿಂಗ್ ಚಾಂಪಿಯನ್, ಡ್ಯಾನ್ಸ್ ಕರ್ನಾಟಕ ಡ್ಯಾನ್ಸ್ ಸೇರಿದಂತೆ ಹಲವು ನೃತ್ಯ ಕಾರ್ಯಕ್ರಮಗಳ ತೀರ್ಪುಗಾರಾಗಿಯೂ ಕಾಣಿಸಿಕೊಂಡಿದ್ದಾರೆ.