ಸ್ಯಾಂಡಲ್‌ವುಡ್ ಸ್ಟಾರ್ ನಟರ ಕಮ್‌ಬ್ಯಾಕ್ ಸಿನಿಮಾಗಳ ಪಟ್ಟಿ ಇಲ್ಲಿದೆ.

ಹ್ಯಾಟ್ರಿಕ್ ಹಿರೋ ಶಿವರಾಜ್‌ಕುಮಾರ್ ಈವರೆಗೆ 125ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಹಲವು ಹಿಟ್ ಸಿನಿಮಾಗಳನ್ನು ಕೂಡ ನೀಡಿದ್ದಾರೆ. ಆರಂಭದಲ್ಲಿ ಅನೇಕ ಹಿಟ್ ಸಿನಿಮಾಗಳನ್ನು ನೀಡಿದ್ದ ಕರುನಾಡ ಚಕ್ರವರ್ತಿ, ತದನಂತರದಲ್ಲಿ ಸಾಲು-ಸಾಲು ಸಿನಿಮಾಗಳಲ್ಲಿ ಯಶಸ್ಸು ಗಳಿಸುವಲ್ಲಿ ವಿಫಲರಾದರು. ನಂತರ 2005ರಲ್ಲಿ ಪ್ರೇಮ್ ನಿರ್ದೇಶನದಲ್ಲಿ ಮೂಡಿಬಂದ ಜೋಗಿ ಚಿತ್ರದ ಮೂಲಕ ಶಿವಣ್ಣ ಕಮ್‌ಬ್ಯಾಕ್ ಮಾಡಿದರು. 

ನಟ ಉಪೇಂದ್ರಗೆ ರಿಯಲ್ ಸ್ಟಾರ್ ಎಂಬ ಬಿರುದು ಬಂದಿದ್ದೆ ಅವರ ರಿಯಾಲಿಸ್ಟಿಕ್ ಸಿನಿಮಾಗಳಿಂದ. ಕನ್ನಡ ಚಿತ್ರರಂಗದಲ್ಲಿ ಟ್ರೆಂಡ್ ಸೆಟ್ಟರ್ ಡೈರೆಕ್ಟರ್ ಆಗಿರುವ ರಿಯಲ್ ಸ್ಟಾರ್ ಉಪೇಂದ್ರ, ವಿಭಿನ್ನತೆ ಅಂದರೆ ಏನು ಅಂತ ಕನ್ನಡ ಚಿತ್ರರಂಗಕ್ಕೆ ತೋರಿಸಿಕೊಟ್ಟವರು. ವಿಭಿನ್ನ ಕತೆ, ವಿಶಿಷ್ಟ ಸಂಭಾಷಣೆ, ವಿಶೇಷ ಹಾಡುಗಳಿಂದ ಪ್ರೇಕ್ಷಕರನ್ನು ರಂಜಿಸುವ ಉಪೇಂದ್ರ ಅವರ ಕಮ್‌ಬ್ಯಾಕ್ ಸಿನಿಮಾ ಬುದ್ಧಿವಂತ. 2005ರಲ್ಲಿ ತೆರೆಕಂಡ ಆಟೋ ಶಂಕರ್ ಬಳಿಕ ಉಪೇಂದ್ರ ಅವರ ಯಾವ ಸಿನಿಮಾಗಳು ಅಷ್ಟು ಯಶಸ್ಸು ಗಳಿಸಿರಲಿಲ್ಲ. ಆನಂತರ 2008ರಲ್ಲಿ ತೆರೆಕಂಡ ಬುದ್ಧಿವಂತ ಚಿತ್ರ ಯಶಸ್ವಿ ಪ್ರದರ್ಶನ ಕಂಡಿತು. ಹಾಗೇ ಉಪ್ಪಿ 2 ಚಿತ್ರದ ಮೂಲಕ ನಿರ್ದೇಶಕರಾಗಿ ಕಮ್ಬ್ಯಾಕ್ ಮಾಡಿದರು. 

ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಆರಂಭದಿಂದ ಕೇವಲ ಒಂದೇ ಮಾದರಿಯ ಪಾತ್ರಗಳಿಗೆ ಗಂಟು ಬಿದ್ದವರಲ್ಲ. ಆ ರೀತಿಯ ಪಾತ್ರಗಳನ್ನು ಅವರೇ ಅರಸಿ ಹೋದವರೂ ಅಲ್ಲ. ಬದಲಿಗೆ ಮಾಸ್ ಇಮೇಜಿನ ಪಾತ್ರಗಳ ನಡುವೆ ಒಳ್ಳೆಯ ಪಾತ್ರಗಳನ್ನು ಅರಸಿದ್ದಿದೆ, ಹಠಕ್ಕೆ ಬಿದ್ದು ನಟಿಸಿದ್ದಿದೆ. ಕಿಚ್ಚ ಸುದೀಪ್ ವೃತ್ತಿ ಜೀವನದ ಆರಂಭದಲ್ಲಿಯೇ 'ಮಾಸ್ ಹೀರೋ' ಇಮೇಜಿಗೆ ವಿರುದ್ಧವಾದ ಸಿನಿಮಾಗಳಲ್ಲಿ ನಟಿಸಿದವರು. ಆರಂಭದಲ್ಲಿ ಭಾರೀ ಯಶಸ್ಸು ಗಳಿಸಿದ್ದ ಸುದೀಪ್ ಅವರಿಗೆ ವೀರ ಮದಕರಿ ನಂತರ ತೆರೆಕಂಡ ಜಸ್ಟ್ ಮಾತ್ ಮಾತಲ್ಲಿ, ಮೀ ತೀರ್ಥ, ಕಿಚ್ಚ ಹುಚ್ಚ, ವೀರ ಪರಂಪರೆ ಮುಂತಾದ ಚಿತ್ರಗಳು ಯಶಸ್ಸಯ ನೀಡಲಿಲ್ಲ. ಮತ್ತೆ ವೀರ ಮದಕರಿಯಂತೆ ನಿರ್ದೇಶನಕ್ಕಿಳಿದು ನಿರ್ದೇಶಿಸಿದ 'ಕೆಂಪೇಗೌಡ' ಚಿತ್ರ ಅದ್ಭುತ ಯಶಸ್ಸು ಪಡೆಯಿತು. 

ಜಾಕಿ ಮತ್ತು ಹುಡುಗರು ಸಿನಿಮಾಗಳ ನಂತರ ತೆರೆಕಂಡ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಚಿತ್ರಗಳು ನಿರೀಕ್ಷೆಯಷ್ಟು ಯಶಸ್ಸು ಗಳಿಸಲಿಲ್ಲ.  ನಂತರ 2011ರಲ್ಲಿ ತೆರೆಕಂಡ 'ಪವರ್' ಚಿತ್ರ ಬಾಕ್ಸಾಫೀಸಿನಲ್ಲಿ ಒಳ್ಳೆ ಯಶಸ್ಸು ಪಡೆಯಿತು. ಇದು ಪುನೀತ್ ಅವರ ಕಮ್‌ಬ್ಯಾಕ್ ಸಿನಿಮಾ. 

ಮಜೆಸ್ಟಿಕ್, ಕರಿಯ, ದಾಸ ಮುಂತಾದ ಹಿಟ್ ಚಿತ್ರಗಳ ಮೂಲಕ ಭರವಸೆ ಮೂಡಿಸಿದ್ದ ದರ್ಶನ್ ಕರಿಯರ್‌ಗೆ ಬಿಗ್ ಬೂಸ್ಟ್ ನೀಡಿದ್ದ ಚಿತ್ರ ಕಲಾಸಿಪಾಳ್ಯ. 2008ರ ಗಜ ಸಿನಿಮಾದ ನಂತರ ತೆರೆಕಂಡ ದರ್ಶನ್ ಮುಂದಿನ ಚಿತ್ರಗಳು ಅಷ್ಟು ಯಶಸ್ಸು ಗಳಿಸಿರಲಿಲ್ಲ. ನಂತರ 2011ರಲ್ಲಿ ತೆರೆಕಂಡ ಸಾರಥಿ ಚಿತ್ರ ಭರ್ಜರಿ ಪ್ರದರ್ಶನ ಕಂಡು ದರ್ಶನ್ ಅವರನ್ನು ಬಾಕ್ಸಾಫೀಸ್ ಸುಲ್ತಾನ ಪಟ್ಟಕ್ಕೆ ಭದ್ರ ಬುನಾದಿ ನೀಡಿತು.

ಮಳೆಯಲ ಜೊತೆಯಲ್ಲಿ ಚಿತ್ರದ ನಂತರ ತೆರೆಕಂಡ ಗೋಲ್ಡನ್ ಸ್ಟಾರ್ ಗಣೇಶ್ ಅವರ ಚಿತ್ರಗಳು ನಿರೀಕ್ಷೆಯಷ್ಟು ಯಶಸ್ಸು ಗಳಿಸಲಿಲ್ಲ. ಆದರೆ, 2013ರಲ್ಲಿ ತೆರೆಕಂಡ ಶ್ರಾವಣಿ ಸುಬ್ರಮಣ್ಯ ಚಿತ್ರದ ಮೂಲಕ ಗಣೇಶ್ - ಅಮೂಲ್ಯ ಜೋಡಿ ಕಮ್ ಬ್ಯಾಕ್ ಮಾಡಿತು. 

ಚಂದ್ರ ಚಕೋರಿ ಚಿತ್ರದಿಂದ ಭರ್ಜರಿ ಇನ್ನಿಂಗ್ಸ್ ಆರಂಭಿಸಿ ಕಂಠೀ ಮುಂತಾದ ಹಿಟ್ ಚಿತ್ರಗಳನ್ನು ನೀಡಿದ್ದ ಶ್ರೀಮುರಳಿ ನಂತರ ಸುಮಾರು ವರ್ಷಗಳ ಕಾಲ ನಟಿಸಿದ ಯಾವುದೇ ಚಿತ್ರಗಳು ಯಶಸ್ಸು ಗಳಿಸಲಿಲ್ಲ. ನಂತರ ಪ್ರಶಾಂತ್ ನೀಲ್ ನಿರ್ದೇಶಿಸಿದ ಉಗ್ರಂ ಚಿತ್ರದ ಮೂಲಕ ಕಮ್ ಬ್ಯಾಕ್ ಮಾಡಿದರು. 

ನಿರ್ದೇಶಕನಾಗಿ, ನಟನಾಗಿ, ನಿರ್ಮಾಪಕನಾಗಿ ಕನ್ನಡ ಚಿತ್ರರಂಗದಲ್ಲಿ ವಿಶಿಷ್ಟ ಛಾಪನ್ನು ಮೂಡಿಸಿರುವ ಕ್ರೇಜಿ ಸ್ಟಾರ್ ರವಿಚಂದ್ರನ್ ದೃಶ್ಯ ಚಿತ್ರದ ಮೂಲಕ ಸಾಂಪ್ರದಾಯಿಕ ನಾಯಕನ ಪಾತ್ರದಿಂದ ವಯೋಸಹಜ ಪ್ರಬುದ್ಧ ಪಾತ್ರಗಳಲ್ಲಿ ನಟಿಸಲು ತೊಡಗಿದರು. ಈ ಚಿತ್ರ ರವಿಚಂದ್ರನ್ ಅವರಿಗೆ ಒಂದು ತರಹದ ಕಮ್‌ಬ್ಯಾಕ್ ಇದ್ದ ಹಾಗೆ.