ಹಿಟ್ ಮೇಲೆ ಹಿಟ್ ಸಿನಿಮಾಗಳನ್ನು ನೀಡಿದ ಸ್ಯಾಂಡಲ್‌ವುಡ್‌ನ ತಾರಾ ಜೋಡಿಗಳಿವರು: ನಿಮ್ಮಿಷ್ಟದ ಜೋಡಿ ಯಾವುದು?

ಕನ್ನಡ ಚಿತ್ರರಂಗ ಕಂಡ ಅಪರೂಪದ ಜೋಡಿ ಡಾ.ರಾಜ್‌ಕುಮಾರ್ ಮತ್ತು ಲೀಲಾವತಿ. ಅಣ್ಣಾವ್ರ ಜೊತೆ ಲೀಲಾವತಿ ಅವರು ನಾಯಕಿಯಾಗಿ ಮಾತ್ರವಲ್ಲದೇ, ಮಗಳಾಗಿ, ಸಹೋದರಿಯಾಗಿ, ನಾದಿನಿಯಾಗಿ, ಸೊಸೆಯಾಗಿ, ಅತ್ತಿಗೆಯಾಗಿ, ಅತ್ತೆಯಾಗಿ ಸಾಕಷ್ಟು ಭಿನ್ನ ಪಾತ್ರಗಳಲ್ಲಿ ನಟಿಸಿದ್ದರು. ಕಪ್ಪು-ಬಿಳುಪಿನ ಕಾಲದಲ್ಲೇ ಸೂಪರ್ ಹಿಟ್ ಆಗಿದ್ದ ಈ ಜೋಡಿ, ಬರೋಬ್ಬರಿ 46 ಸಿನಿಮಾಗಲ್ಲಿ ಒಟ್ಟಿಗೆ ನಟಿಸಿದ್ದರು. ಕಣ್ತೆರೆದು ನೋಡು, ಗಾಳಿ ಗೋಪುರ, ಕರುಣೆಯೇ ಕುಟುಂಬದ ಕಣ್ಣು, ನಾಗಪೂಜೆ, ಕುಲವಧು, ಸಿಪಾಯಿ ರಾಮು, ಭಕ್ತರ ಕುಂಬಾರ ಸೇರಿದಂತೆ ಸಾಕಷ್ಟು ಹಿಟ್ ಚಿತ್ರಗಳನ್ನು  ಜೋಡಿ ನೀಡಿದೆ.

1984ರಲ್ಲಿ ತೆರೆಕಂಡ ಡಾ.ರಾಜೇಂದ್ರ ಸಿಂಗ್ ಬಾಬು ನಿರ್ದೇಶನದ 'ಬಂಧನ' ಸಿನಿಮಾ ಮೂಲಕ ಒಂದಾದ ಡಾ.ವಿಷ್ಣುವರ್ಧನ್ ಮತ್ತು ಸುಹಾಸಿನಿ ಜೋಡಿ, ಮೊದಲ ಸಿನಿಮಾದಲ್ಲೇ ಸೂಪರ್ ಹಿಟ್ ಜೋಡಿ ಎನಿಸಿಕೊಂಡಿತು. ಆನಂತರ ಈ ಜೋಡಿ ನಂತರ ಸುಪ್ರಭಾತ, ಮುತ್ತಿನ ಹಾರ, ಹಿಮಪಾತ, ಹೆಂಡ್ತಿಗೆ ಹೇಳ್ತೀನಿ, ಮಾತಾಡ್ ಮಾತಾಡು ಮಲ್ಲಿಗೆ, ಸ್ಕೂಲ್ ಮಾಸ್ಟರ್ ಚಿತ್ರಗಳಲ್ಲಿ ಒಟ್ಟಿಗೆ ನಟಿಸಿ ಸಿನಿರಸಿಕರ ಮನಗೆದ್ದರು.

ಅನಂತ್ ನಾಗ್ ಮತ್ತು ಲಕ್ಷ್ಮೀ ಜೋಡಿ ಚೆಂದನವನದ ಚೆಂದದ ಜೋಡಿಗಳಲ್ಲೊಂದು. ಮಧ್ಯಮ ವರ್ಗದ ಹಾಗೂ ಜನಸಾಮಾನ್ಯರ ಜೀವನಕ್ಕೆ ಹತ್ತಿರವಾದ ಪಾತ್ರಗಳು ಮತ್ತು ಕಾದಂಬರಿ ಆಧಾರಿತ ಚಿತ್ರಗಳ ಮೂಲಕ ಈ ಜೋಡಿ ಪ್ರೇಕ್ಷಕರಿಗೆ ಮೋಡಿ ಮಾಡಿತು. ಇವರಿಬ್ಬರು ಚಂದನದ ಗೊಂಬೆ, ಮುದುಡಿದ ತಾವರೆ ಅರಳಿತು, ಬೆಂಕಿಯ ಬಲೆ, ಇಬ್ಬನಿ ಕರಗಿತು ಮುಂತಾದ ಹಿಟ್ ಸಿನಿಮಾಗಳಲ್ಲಿ ಒಟ್ಟಿಗೆ ನಟಿಸಿದ್ದಾರೆ.

ಅವಳ ನೆರಳು ಚಿತ್ರದ ಮೂಲಕ ಒಂದಾದ ಅಂಬಿ-ಅಂಬಿಕಾ ಜೋಡಿ, ನಂತರ ಚಕ್ರವ್ಯೂಹ, ಹಸಿದ ಹೆಬ್ಬುಲಿ, ಚದುರಂಗ, ಅವಳಿ ನೆರಳು, ಸತ್ಕಾರ, ಮೂರು ಜನ್ಮ ಸೇರಿದಂತೆ ಹಲವು ಸಿನಿಮಾಗಳಲ್ಲಿ ಒಟ್ಟಿಗೆ ನಟಿದಿದ್ದರು. ಕನ್ನಡದಲ್ಲಿ ಅಂಬಿಕಾ ಮುಖ್ಯ ನಾಯಕಿಯಾಗಿ ನಟಿಸಿದ `ಹಾಂಗ ಕಾಂಗ್ ನಲ್ಲಿ ಏಜೆಂಟ್ ಅಮರ್' ಚಿತ್ರದಲ್ಲೂ ಕೂಡ ಅಂಬಿ ನಾಯಕರಾಗಿದ್ದರು. ಹಾಗೇ ಈ ಜೋಡಿಯ `ಚಳಿ ಚಳಿ' ಹಾಡು ಇಂದಿಗೂ ಕನ್ನಡದ ಅದ್ಭುತ ರೋಮ್ಯಾಂಟಿಕ್ ಗೀತೆಗಳಲ್ಲೊಂದಾಗಿದೆ.

ಕರಾಟೆ ಕಿಂಗ್ ಶಂಕರನಾಗ್ ಮತ್ತು ಭವ್ಯ 1983ರಲ್ಲಿ ತೆರೆಕಂಡ ಪ್ರಾಣ ಸ್ನೇಹಿತ ಚಿತ್ರದ ಮೂಲಕ ಮೊದಲ ಬಾರಿಗೆ ತೆರೆಹಂಚಿಕೊಂಡರು. ಆನಂತರ ಅಗ್ನಿ ಪರೀಕ್ಷೆ, ಹುಲಿ ಹೆಬ್ಬುಲಿ, ತಾಯಿ, ಜಯ ಭೇರಿ, ಆವೇಶ ಮುಂತಾದ ಚಿತ್ರಗಳಲ್ಲಿ ನಟಿಸಿದರು. ಆದರೆ, ಸಾಂಗ್ಲಿಯಾನ ಮತ್ತು ಸಾಂಗ್ಲಿಯಾನ 2 ಚಿತ್ರಗಳಲ್ಲಿನ ಈ ಜೋಡಿ ನಟನೆ ತುಂಬಾ ಪ್ರಸಿದ್ಧಿ ಪಡೆಯಿತು.

1986ರಲ್ಲಿ ತೆರೆಕಂಡ ಆನಂದ್ ಚಿತ್ರದ ಮೂಲಕ ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಮತ್ತು ಸುಧಾರಾಣಿ ಒಟ್ಟಿಗೆ ಚಂದನವನ ಪ್ರವೇಶಿಸಿದರು. ಸುಮಾರು 38 ವಾರಗಳವರೆಗೆ ಪ್ರದರ್ಶನ ಕಂಡ ಈ ಸಿನಿಮಾ ಸೂಪರ್ ಹಿಟ್ ಆಯಿತು. ಆನಂತರ  ನಂತರ ಮನಮೆಚ್ಚಿದ ಹುಡುಗಿ, ರಣರಂಗ, ಆಸೆಗೊಬ್ಬ ಮೀಸೆಗೊಬ್ಬ, ಮಿಡಿದ ಶೃತಿ ಸೇರಿದಂತೆ ಹಲವು ಚಿತ್ರಗಳಲ್ಲಿ ಈ ಜೋಡಿ ಒಟ್ಟಿಗೆ ನಟಿಸಿತು. ಇವರಿಬ್ಬರು ಅಂದಿನ ಕಾಲದಲ್ಲಿ ಟ್ರೆಡಿಂಗ್ ಅನ್‌ಸ್ಕ್ರೀನ್ ಜೋಡಿಯಾಗಿ ಮಿಂಚಿದ್ದರು.

90ರ ದಶಕದಲ್ಲಿ ಚಾಕಲೇಟ್ ಹೀರೋ ಎಂದೇ ಪ್ರಸಿದ್ಧಿ ಪಡೆದಿದ್ದ ಸುನೀಲ್ ಮತ್ತು ಮಾಲಾಶ್ರೀ ಜೋಡಿ ತುಂಬಾ ಜನಪ್ರಿಯತೆ ಗಳಿಸಿತ್ತು. ಈ ಜೋಡಿ ಮಾಲಾಶ್ರೀ ಮಾಮಾಶ್ರೀ, ಬೆಳ್ಳಿ ಕಾಲುಂಗುರ, ನಗರದಲ್ಲಿ ನಾಯಕರು, ಬೆಳ್ಳಿ ಕಾಲುಂಗುರ, ಸಿಂಧೂರ ತಿಲಕ, ಮರಣ ಮೃದಂಗ ಮುಂತಾದ ಚಿತ್ರಗಳಲ್ಲಿ ನಟಿಸಿ ಹೆಸರುವಾಸಿಯಾಗಿತ್ತು. ಸದ್ಯ ಸುನೀಲ್ ನಮ್ಮೊಂದಿಗಿಲ್ಲ.

2005ರಲ್ಲಿ ತೆರೆಕಂಡ ಕಲಾಸಿಪಾಳ್ಯ ಚಿತ್ರದಿಂದ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಮತ್ತು ಕ್ರೇಜಿ ಕ್ವೀನ್ ರಕ್ಷಿತಾ ಜೋಡಿ ಮೊದಲ ಬಾರಿ ತೆರೆ ಹಂಚಿಕೊಂಡರು. ಮುಂದೆ ಈ ಜೋಡಿ ಅಯ್ಯ, ಸುಂಟರಗಾಳಿ, ಮಂಡ್ಯ ಚಿತ್ರದಲ್ಲಿ ಕಾಣಿಸಿಕೊಂಡಿತು. ಇವರಿಬ್ಬರು ನಟಿಸಿದ ಎಲ್ಲಾ ಚಿತ್ರಗಳು ಬಾಕ್ಸಾಪೀಸ್‌ನಲ್ಲಿ ಯಶಸ್ವಿಯಾದವು ಮತ್ತು ದರ್ಶನ್-ರಕ್ಷಿತಾ ಕೆಮಿಸ್ಟ್ರಿ ಮನೆಮಾತಾಗಿತ್ತು.

ನಾಯಕ-ನಾಯಕಿಯಾಗಿ ನಟಿಸಿದ ಮೊದಲ ಚಿತ್ರ ಮೊಗ್ಗಿನ ಮನಸ್ಸುದಿಂದ ಒಂದಾದ ಯಶ್-ರಾಧಿಕಾ ಜೋಡಿ ಮುಂದೆ ಡ್ರಾಮಾ, ಮಿಸ್ಟರ್ ಆ್ಯಂಡ್ ಮಿಸಸ್ ರಾಮಾಚಾರಿ ಮತ್ತು ಸಂತು ಸ್ಟ್ರೇಟ್ ಫಾರ್ವರ್ಡ್ ಚಿತ್ರಗಳಲ್ಲಿ ನಟಿಸಿತು. ಒಂದರ ನಂತರ ಒಂದು ಯಶಸ್ವಿ ಚಿತ್ರಗಳನ್ನು ನೀಡಿದ ಈ ಜೋಡಿ ಮುಂದೆ ನಿಜಜೀವನದಲ್ಲಿ ಕೂಡ ಒಂದಾದರು.