100 ಕೋಟಿ ಕ್ಲಬ್ ಸೇರಿದ ಕನ್ನಡದ 'ಕಾಟೇರ': ಏಳನೇ ದಿನ ಗಳಿಸಿದ್ದೆಷ್ಟು ಗೊತ್ತಾ?

ಕಾಟೇರ ಸಿನಿಮಾ ಬಿಡುಗಡಯಾದ ದಿನದಿಂದಲೂ ಭರ್ಜರಿ ಸದ್ದು ಮಾಡುತ್ತಿದೆ. ಇವತ್ತಿನ ಕಾಲದಲ್ಲಿ ದರ್ಶನ್ ಅಂತಹ ಸ್ಟಾರ್ ನಟರೊಬ್ಬರು ಇಂತಹ ಸೂಕ್ಷ್ಮ ವಿಚಾರದ ಕಥೆಯನ್ನು ಆಯ್ಕೆ ಮಾಡಿಕೊಂಡಿದ್ದಕ್ಕೆ ಹಾಗೂ ಅದ್ಭುತವಾಗಿ ನಟಿಸಿದ್ದಕ್ಕೆ ಸಿನಿರಸಿಕರು ಮೆಚ್ಚಿ ಕೊಂಡಾಡುತ್ತಿದ್ದಾರೆ. ಕಾಟೇರ ಚಿತ್ರಕ್ಕೆ ದಿನದಿಂದ ದಿನಕ್ಕೆ ಅದ್ಭುತ ರೆಸ್ಪಾನ್ಸ  ಸಿಗುತ್ತಿದ್ದು, 7ನೇ ದಿನ (ಗುರುವಾರ) 9.52 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ.

2023ರ ಕೊನೆಯಲ್ಲಿ ರಿಲೀಸ್ ಆದ 'ಕಾಟೇರ' ಚಿತ್ರ ಒಂದೇ ವಾರದಲ್ಲಿ ಗಲ್ಲಾಪೆಟ್ಟಿಗೆಯಲ್ಲಿ 104.58 ಕೋಟಿ ರೂಪಾಯಿಗೂ ಅಧಿಕ ಕಲೆಕ್ಷನ್ ಮಾಡಿದೆ. ಈ ಮೂಲಕ ಕನ್ನಡದ ಸಿನಿಮಾ ಗೆದ್ದು ಬೀಗಿದೆ. ಕೇವಲ ಕನ್ನಡದಲ್ಲಿ ಬಿಡುಗಡೆಯಾಗಿ 'ಕಾಟೇರ' ಚಿತ್ರ ದೊಡ್ಡಮಟ್ಟದಲ್ಲಿ ಸದ್ದು ಮಾಡುತ್ತಿರುವುದು ಅಭಿಮಾನಿಗಳಿಗೆ ಖುಷಿ ತಂದಿದೆ. ಟಾಲಿವುಡ್‌ ಹಾಗೂ ಕಾಲಿವುಡ್ ಚಿತ್ರರಂಗದಲ್ಲೂ ಕಾಟೇರ ಚಿತ್ರದ ಬಗ್ಗೆ ಚರ್ಚೆ ನಡೆಯುತ್ತಿದ್ದು, ಡಬ್ ಮಾಡಿಕೊಡುವಂತೆ ಬೇಡಿಕೆ ಇದೆ. 

ಕಾಟೇರ ಸಿನಿಮಾದ ಏಳು ದಿನಗಳ ಗಳಿಕೆಯ ಸಂಪೂರ್ಣ ವಿವರವನ್ನು ಕೆಳಗೆ ನೀಡಲಾಗಿದೆ.

• ಮೊದಲ ದಿನ 19.79 ಕೋಟಿ ರೂಪಾಯಿ
• ಎರಡನೇ ದಿನ 17.35 ಕೋಟಿ ರೂಪಾಯಿ
• ಮೂರನೇ ದಿನ 20.94 ಕೋಟಿ ರೂಪಾಯಿ
• ನಾಲ್ಕನೇ ದಿನ 18.29 ಕೋಟಿ ರೂಪಾಯಿ
• ಐದನೇ ದಿನ 9.24 ಕೋಟಿ ರೂಪಾಯಿ
• ಆರನೇ ದಿನ 9.75 ಕೋಟಿ ರೂಪಾಯಿ
• ಏಳನೇ ದಿನ 9.52 ಕೋಟಿ ರೂಪಾಯಿ

'ಕಾಟೇರ' ಸಿನಿಮಾ ನೋಡಿ ದರ್ಶನ್ ಅಭಿಮಾನಿಗಳು ಮಾತ್ರವಲ್ಲ, ಸಾಮಾನ್ಯ ಪ್ರೇಕ್ಷಕರು ಕೂಡ ಬಹುಪರಾಕ್ ಎನ್ನುತ್ತಿದ್ದಾರೆ. ಮೂಲಗಳ ಪ್ರಕಾರ, ಕೇವಲ ಒಂದು ವಾರದಲ್ಲಿ 52 ಲಕ್ಷಕ್ಕೂ ಅಧಿಕ ಟಿಕೆಟ್ ಮಾರಾಟವಾಗಿವೆ. ಈ ಮೂಲಕ 'ಕಾಟೇರ' ಸಿನಿಮಾ ಕನ್ನಡ ಚಿತ್ರರಂಗದಲ್ಲಿ ಹೊಸ ದಾಖಲೆ ನಿರ್ಮಿಸಿದ್ದು, ಜನವರಿ ೮ರಂದು ಯುಎಸ್‌ಎನಲ್ಲೂ ಸಿನಿಮಾ ಬಿಡುಗಡೆಯಾಗುತ್ತಿದೆ.  ಜೊತೆಗೆ ಶೀಘ್ರದಲ್ಲೇ ತೆಲುಗು, ತಮಿಳಿನಲ್ಲೂ 'ಕಾಟೇರ' ಆರ್ಭಟ ಶುರುವಾಗಲಿದೆ.

1989ರ ಸಮಯದಲ್ಲಿ ಭೀಮನಹಳ್ಳಿ ಹಾಗೂ ಮಲ್ಲನಹಳ್ಳಿ ಜನರು ಊರ ಜಾತ್ರೆಗೆ ಸಿದ್ಧತೆ ನಡೆಸಿರುತ್ತಾರೆ. ಜೊತೆಗೆ ತಮ್ಮ ಊರಿಗಾಗಿ ಹೋರಾಡಿ ಜೈಲು ಸೇರಿದ 'ಕಾಟೇರ'ನಿಗೆ ಇಡೀ ಊರು ಕಾಯುತ್ತಿರುತ್ತದೆ. 10 ದಿನಗಳ ಕಾಲ ಪೆರೋಲ್ ಮೇಲೆ ಹೊರಬರುವ ಕಾಟೇರ, ಊರಿನ ಹಾದಿ ಹಿಡಿಯುತ್ತಾನೆ. ಮತ್ತೊಂದೆಡೆ, ನಾಲೆ ಅಗೆಯುವ ವೇಳೆ ಒಂದೇ ಜಾಗದಲ್ಲಿ 107ರ ಜನರ ಅಸ್ಥಿಪಂಜರ ಸಿಕ್ಕಿರುತ್ತದೆ. ಅದು ಯಾರ ಅಸ್ಥಿಪಂಜರ? ಒಮ್ಮೆಲೆ ಅಷ್ಟು ಜನರು ಸತ್ತು ಮಣ್ಣಾಗಿದ್ದೇಗೆ? ಅವರಿಗೂ ಕಾಟೇರನಿಗೂ ಏನು ಸಂಬಂಧ? 70ರ ದಶಕದಲ್ಲಿ ಆ ಎರಡೂ ಊರುಗಳಲ್ಲಿ ನಡೆದ ಘಟನೆಗಳೇನು? 'ಕಾಟೇರ' ಜೈಲು ಸೇರಿದ್ಯಾಕೆ? ಎಂಬುದೇ ಸಿನಿಮಾದ ಒನ್‌ಲೈನ್ ಕಥೆ.