ಕನ್ನಡ ಧಾರಾವಾಹಿ ಪ್ರಿಯರಿಗೆ ಕ್ರೇಜ್ ಹುಟ್ಟಿಸಿರುವ ಜಯಂತ್ & ಕೀರ್ತಿ ಕ್ಯಾರೆಕ್ಟರ್: ಮುಂದಿದೆ ಬಿಗ್ ಟ್ವಿಸ್ಟ್!

ನಟ ದೀಪಕ್ ಸುಬ್ರಮಣ್ಯ 'ಲಕ್ಷ್ಮೀ ನಿವಾಸ' ಧಾರಾವಾಹಿಯಲ್ಲಿ ಜಯಂತ್ ಪಾತ್ರದ ಮೂಲಕ ಸಿಕ್ಕಾಪಟ್ಟೆ ಜನಪ್ರಿಯತೆ ಪಡೆದುಕೊಂಡಿದ್ದಾರೆ. ಎಲ್ಲರ ಮುಂದೆ ನಿಯತ್ತಿನ, ಪ್ರಾಮಾಣಿಕ ಜೊತೆಗೆ ತುಂಬಾ ವಿನಯತೆಯಿಂದ ಇರುವ ಮನುಷ್ಯ. ಆದರೆ, ನಿಜವಾಗಿಯೂ ಆತ ಅವನೊಬ್ಬ ಸೈಕೋ. ತಾನು ಇಷ್ಟಪಟ್ಟ ಹುಡುಗಿಯನ್ನು ತಾನಲ್ಲದೇ ಬೇರೆ ಯಾರೂ ಮುಟ್ಟಬಾರದು ಎನ್ನುವ ಪಾಗಲ್ ಪ್ರೇಮಿ. ಒಳ್ಳೆತನದ ಮುಖವಾಡ ಹಾಕಿಕೊಂಡಿರುವ ಜಯಂತ್, ಪತ್ನಿ ವಿಷಯದಲ್ಲಿ ತುಂಬಾ ಪೊಸೆಸಿವ್. ಜಯಂತ್ ಅಸಲಿ ಮುಖ ಇನ್ನೂ ಜಾನುಗೆ ಇನ್ನೂ ತಿಳಿದಿಲ್ಲ. 

ಜಯಂತ್ ಪಾತ್ರದ ಭೀಕರತೆ ಏನು ಅನ್ನೋದರ ಪರಿಚಯ ಈಗಾಗಲೇ ವೀಕ್ಷಕರಿಗೆ ಸಿಕ್ಕಿದೆ. ಜಾಹ್ನವಿಯ ಮೈಮೇಲೆ ಹರಿದ ಜಿರಳೆಯನ್ನು ಹಾಲಿನ ಗ್ಲಾಸ್‌ನಲ್ಲಿ ಹಾಕಿಕೊಂಡು ಕುಡಿದ ಭೂಪ ಜಯಂತ್. ಇತ್ತೀಚಿನ ಸಂಚಿಕೆಯಲ್ಲಿ ಹೆಂಡತಿಯ ಮೈಮುಟ್ಟಿ ಪರೀಕ್ಷೆ ಮಾಡಿದ ಡಾಕ್ಟರ್ ಕೈಕಾಲು ಮುರಿದ್ದಾನೆ. ಮುಂದಿನ ದಿನಗಳಲ್ಲಿ ಜಾಹ್ನವಿ ತನ್ನ ಕಾಲೇಜು ಗೆಳೆಯ ವಿಶ್ವನ ಜೊತೆ ಮಾತನಾಡಿದ್ದೋ ಅಥವಾ ಸಲುಗೆಯಿಂದ ಅಪ್ಪಿಕೊಂಡಿದ್ದೋ, ಶೇಕ್ ಹ್ಯಾಂಡ್ ಕೊಟ್ಟುಕೊಂಡು ನಗು ನಗುತ್ತಾ ಮಾತನಾಡಿದ್ದು, ಜಾಹ್ನವಿಯನ್ನು ವಿಶ್ವ ಪ್ರೀತಿಸುತ್ತಿದ್ದದ್ದು ಗೊತ್ತಾದರೆ, ಜಯಂತ್ ಏನು ಮಾಡುತ್ತಾನೆ. ಅವರಿಬ್ಬರ ಗೆಳೆತನ ಬಗ್ಗೆ ಗೊತ್ತಾದರೆ ಜಯಂತ್ ಏನು ಮಾಡ್ತಾನೆ? ಜಾಹ್ನವಿಗೆ ಹಿಂಸೆ ಕೊಡ್ತಾನಾ? ಎಂಬೆಲ್ಲಾ ಪ್ರಶ್ನೆಗಳು ವೀಕ್ಷಕರಲ್ಲಿ ಮೂಡುತ್ತಿವೆ. 

ಈ ಮಧ್ಯೆ ಸೋಶಿಯಲ್ ಮೀಡಿಯಾದಲ್ಲಿ ಜಯಂತ್‌ಗೆ ಮೊದಲೇ ಮದುವೆಯಾಗಿರಬಹುದು. ಅವನಿಗಿರುವ ಅತಿಯಾದ ಪೊಸೆಸಿವ್‌ನಿಂದಾಗಿ ಅವಳು ಬಿಟ್ಟು ಹೋಗಿರಬಹುದು. ಈ ಸೈಕೋ ತನ್ನ ಮೊದಲ ಪತ್ನಿಯನ್ನು ಸಾಯಿಸಿದ್ದರೂ ಆಶ್ಚರ್ಯವಿಲ್ಲ ಅಂತೆಲ್ಲಾ ಹೇಳಲಾಗ್ತಿದೆ. ಆದರೆ, ಧಾರಾವಾಹಿಯಲ್ಲಿ ಮಾತ್ರ ಎಲ್ಲೂ ಜಯಂತ್‌ಗೆ ಮೊದಲ ಮದುವೆಯಾಗಿತ್ತು ಅಂತ ಹೇಳಿಲ್ಲ. ಮುಂದೆ ಕಥೆಯಲ್ಲಿ ಬದಲಾವಣೆ ಆದರೂ ಆಗಬಹುದು.

ಮತ್ತೊಂದೆಡೆ, ತನ್ವಿ ರಾವ್ 'ಲಕ್ಷ್ಮೀ ಬಾರಮ್ಮ' ಸೀರಿಯಲ್‌ನಲ್ಲಿ ಕೀರ್ತಿ ಪಾತ್ರದ ಮೂಲಕ ಗಮನ ಸೆಳೆಯುತ್ತಿದ್ದಾರೆ. ತಾನು ಪ್ರೀತಿಸಿದ ಹುಡುಗನನ್ನು ಬೇರೆಯವರೊಂದಿಗೆ ಮದುವೆಯಾಗಲು ಬಿಟ್ಟು, ಈಗ ಹೇಗಾದರೂ ಅವನನ್ನು ಪಡೆಯಲೇಬೇಕು ಎಂದು ಪ್ರತಿಯೊಂದು ಹೆಜ್ಜೆಯಲ್ಲೂ ಹೊಸ ಪ್ಲ್ಯಾನ್ ಮಾಡ್ತಿರುವ ಪಾಗಲ್ ಪ್ರೇಮಿ. ಸದ್ಯ ಮಾಡರ್ನ್ ಡ್ರೆಸ್ ಬಿಟ್ಟು ಲಕ್ಷ್ಮೀ ತರಹ ಆಡುತ್ತಿರುವ ಕೀರ್ತಿ ವರ್ತನೆ ಕೂಡ ವೀಕ್ಷಕರಿಗೆ ವಿಚಿತ್ರ ಎನಿಸುತ್ತಿದೆ. 

ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಜಯಂತ್ ಹಾಗೂ ಕೀರ್ತಿ ಪಾತ್ರದ ಬಗ್ಗೆ ಸಿಕ್ಕಾಪಟ್ಟೆ ಚರ್ಚೆಯಾಗ್ತಿದ್ದು, ಇವರಿಬ್ಬರ ನಟನೆ ಮಾತ್ರ ಭೇಷ್ ಅಂತಿದ್ದಾರೆ. ಮುಂದಿನ ದಿನಗಳಲ್ಲಿ ಈ ಎರಡು ಧಾರಾವಾಹಿಗಳಲ್ಲೂ ದೊಡ್ಡ ಟ್ವಿಸ್ಟ್ ಸಿಗಲಿದ್ದು, ಕಿರುತೆರೆ ವೀಕ್ಷಕರು ಕಾತರದಿಂದ ಕಾಯುತ್ತಿದ್ದಾರೆ.