'ಲಕ್ಷ್ಮೀ ನಿವಾಸ' ಧಾರಾವಾಹಿ ಸಿದ್ದೇಗೌಡರ ತಾಯಿ ಮತ್ತು ತಂಗಿ ಕೂಡ ಖ್ಯಾತ ನಟಿಯರೇ: ಯಾರವರು ಗೊತ್ತಾ?

ಎಷ್ಟೋ ಬಾರಿ ಒಂದೇ ಸೀರಿಯಲ್‌ನಲ್ಲಿ ಕುಟುಂಬಸ್ಥರು ನಟನೆ ಮಾಡಿರುತ್ತಾರೆ. ಆದರೆ ಅದು ನೋಡುಗರಿಗೆ ಗೊತ್ತೆ ಆಗುವುದಿಲ್ಲ. ಈಗ ಸಿದ್ದೇಗೌಡರ ವಿಚಾರವೂ ಹಾಗೇ. 'ಲಕ್ಷ್ಮೀ ನಿವಾಸ'ದ ಸಿದ್ದೇಗೌಡ ಅಲಿಯಾಸ್ ಧನಂಜಯ್ ಹಾಗೂ ಅವರ ತಾಯಿ ಕೂಡ ಈ ಧಾರಾವಾಹಿಯಲ್ಲಿ ನಟಿಸುತ್ತಿದ್ದಾರೆ. ಧನಂಜಯ ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ವಿಡಿಯೋವೊಂದನ್ನು ಹಂಚಿಕೊಂಡಿದ್ದಾರೆ. ಆ ವಿಡಿಯೋ ನೋಡಿದ ಮೇಲೆಯೇ ಗೊತ್ತಾಗಿದ್ದು ಸಿದ್ದೇಗೌಡರ ತಾಯಿ ಇವರೇ ಅಂತ. 'ಲಕ್ಷ್ಮೀ ನಿವಾಸ' ಸಿದ್ದೇಗೌಡ ಪಾತ್ರ ಮಾಡುತ್ತಿರುವ ಧನಂಜಯ್ ಅವರ ತಾಯಿಯ ಹೆಸರು ಅನ್ನಪೂರ್ಣ. ಇವರು  ಮತ್ತೆ ವಸಂತ, ಅರ್ಧಾಂಗಿ, ಲಕ್ಷ್ಮೀ ನಿವಾಸ ಸೇರಿದಂತೆ ಕೆಲ ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ.

ಇನ್ನೊಂದು ವಿಶೇಷವೆಂದರೆ ಧನಂಜಯ್ ಹಾಗೂ ಅವರ ತಾಯಿ ಅನ್ನಪೂರ್ಣ 'ಲಕ್ಷ್ಮೀ ನಿವಾಸ'ದಲ್ಲಿ ಒಟ್ಟಿಗೆ ಅಭಿನಯಿಸುತ್ತಿದ್ದಾರೆ. ಲಕ್ಷ್ಮೀ ನಿವಾಸ ಧಾರಾವಾಹಿಯಲ್ಲಿ ಇತ್ತಿಚೆಗಷ್ಟೇ ಎರಡು ಪಾತ್ರಗಳು ಹೊಸದಾಗಿ ಹುಟ್ಟಿಕೊಂಡಿವೆ. ಚೆಲ್ವಿ ಹಾಗೂ ಆಕೆಯ ಅವ್ವನ ಪಾತ್ರ. ಚೆಲ್ವಿ ಹೂ ಮಾರುವ ಹುಡುಗಿ. ಆಕೆಯ ತಾಯಿಗೆ ಕಣ್ಣು ಕಾಣಿಸುವುದಿಲ್ಲ. ದೇವಸ್ಥಾನ ಒಂದರ ಬಳಿ ಅವ್ವ ಮಗಳು ಹೂ ಮಾರುತ್ತಾ ಕೂರುತ್ತಾರೆ. ಸಿದ್ದೇಗೌಡ್ರ ರಿಯಲ್ ಅಮ್ಮ ಈ ಧಾರಾವಾಹಿಯಲ್ಲಿ ಕುರುಡಿಯಾಗಿ ಅಭಿನಯಿಸಿದ್ದಾರೆ.

ಧನಂಜಯ್ ತಂಗಿ ಕೂಡ ಕನ್ನಡ ಸಿನಿಮಾರಂಗದಲ್ಲಿ ನಟಿಯಾಗಿ ಗುರುತಿಸಿಕೊಂಡಿದ್ದಾರೆ. ಅವರ ಹೆಸರು ಮಹಾಲಕ್ಷ್ಮೀ. ಥಗ್ಸ್ ಆಫ್ ರಾಮಗಡ ಸಿನಿಮಾದಲ್ಲಿ ಮಹಾಲಕ್ಷ್ಮೀ ನಾಯಕಿಯಾಗಿ ನಟಿಸಿದ್ದಾರೆ. ನೃತ್ಯದಲ್ಲಿ ಪರಿಣತಿ ಹೊಂದಿರುವ ಇವರು, ಮಾಡೆಲ್ ಕೂಡ ಹೌದು. 

ಮಹಾಲಕ್ಷ್ಮೀ ಅವರು 2024ರಲ್ಲಿ ನಡೆದ 'ಮಿಸ್ ಸೌತ್ ಇಂಡಿಯಾ' ಸ್ಪರ್ಧೆಯಲ್ಲಿ ಮೊದಲ ರನ್ನರ್ ಅಪ್ ಸ್ಥಾನ ಪಡೆದಿದ್ದರು. ಇದರ ಜೊತೆಗೆ ಮಿಸ್ ಫೋಟೋಜೆನಿಕ್ ಟೈಟಲ್ ವಿನ್ನರ್ ಕೂಡ ಆಗಿದ್ದಾರೆ. 

'ಲಕ್ಷ್ಮೀ ನಿವಾಸ' ಧಾರಾವಾಹಿಯಲ್ಲಿ ಸದ್ಯ ಸಿದ್ದೇಗೌಡ್ರು ಹಾಗೂ ಭಾವನಾ ಜೋಡಿ ವೀಕ್ಷಕರಿಗೆ ಮೋಡಿ ಮಾಡುತ್ತಿದೆ. ವಯಸ್ಸಿನಲ್ಲಿ ತನಗಿಂತ ಹಿರಿಯಳಾದ ಭಾವನಾಳ ಇಷ್ಟಪಡುವ ಸಿದ್ದೇಗೌಡರ ಲವ್‌ಸ್ಟೋರಿ ಸೀರಿಯಲ್‌ ಪ್ರಿಯರಿಗೆ ಸಖತ್ ಇಷ್ಟವಾಗಿದೆ. ಇವರಿಬ್ಬರು ಸದ್ಯ ಕಿರುತೆರೆಯ ಮೋಸ್ಟ್ ಫೇವರಿಟ್ ಜೋಡಿ ಎನಿಸಿಕೊಂಡಿದ್ದಾರೆ.  ಅಂದ್ಹಾಗೆ ಇದು ಧನಂಜಯ್ ಅಭಿನಯದ ಮೊದಲ ಸೀರಿಯಲ್. ಇದಕ್ಕೂ ಮೊದಲು ಇವರು ಯಾವ ಧಾರಾವಾಹಿಯಲ್ಲೂ ಅಭಿನಯಿಸಿರಲಿಲ್ಲ.

ಧನಂಜಯ ಅವರು ಹಲವು ವರ್ಷಗಳಿಂದ ಕನ್ನಡ ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದು, ಅದ್ಭುತ ಡಬ್ಬಿಂಗ್ ಆರ್ಟಿಸ್ಟ್ ಆಗಿ ಗುರುತಿಸಿಕೊಂಡಿದ್ದಾರೆ. ಇದರ ಜೊತೆಗೆ ಅವರು ಡ್ಯಾನ್ಸರ್ ಕೂಡ ಹೌದು. ಇವರನ್ನು ಎಲ್ಲರೂ ಪ್ರೀತಿಯಿಂದ 'ಡಿಜೆ' ಅಂತ ಕರೆಯುತ್ತಾರೆ. ಹಲವಾರು ವರ್ಷಗಳಿಂದ ನಟನಾ ಕ್ಷೇತ್ರದಲ್ಲಿರುವ ಧನಂಜಯ, ಈ ಹಿಂದೆ 'ಜಿಲ್ ಜಿಲ್' ಎಂಬ ಚಿತ್ರದಲ್ಲಿ ನಾಯಕನಾಗಿ ನಟಿಸಿದ್ದರು. ನಂತರ ಥಗ್ಸ್ ಆಫ್ ರಾಮಗಡ, ವಾಸಂತಿ ನಲಿದಾಗ, ಖಾಸಗಿ ಪುಟಗಳು ಸೇರಿದಂತೆ ಹಲವು ಸಿನಿಮಾಗಳಲ್ಲಿ ಬಣ್ಣಹಚ್ಚಿದ್ದಾರೆ. ವಾಸಂತಿ ನಲಿದಾಗ ಚಿತ್ರದಲ್ಲಿ ವಿಲನ್ ರೋಲ್‌ನಲ್ಲಿ ಅಭಿನಯಿಸಿದ್ದರು.